ئىسرائىلىيە مالىيە مىنىستىرى بېزالېل سموترىچ تەنقىدچىلەر تەرىپىدىن خەلقئارا قانۇنغا خىلاپ ھەمدە كەلگۈسىدە قۇرۇلىدىغان پەلەستىن دۆلىتىنىڭ شەكىللىنىشىگە توسالغۇ بولىدۇ دەپ قارالغان 3 مىڭ 600 يۈرۈشلۈك تۇرالغۇ بەرپا قىلىش پىلانىنى قوللىدى.

ئاخبارات ۋاسىتىلىرىدا پەيشەنبە كۈنى ئېلان قىلىنغان خەۋەرلەرگە قارىغاندا، ئىسرائىلىيە مالىيە مىنىستىرى بېزالېل سموترىچ ئىشغالىيەت ئاستىدىكى شەرقىي قۇددۇستا 3 مىڭ 600 يۈرۈشلۈك تۇرالغۇدىن تەشكىل تاپقان يېڭى بىر قانۇنسىز يەھۇدىيلار ئولتۇراق رايونى قۇرۇش پىلانىنى تەستىقلىغان.

«7-قانال» تېلېۋىزىيەسىنىڭ خەۋىرىگە ئاساسلانغاندا، «مىشمار يەھۇدا» ناملىق بۇ ئولتۇراق رايونى شەھەرنىڭ شەرق تەرىپىدىكى 3 مىڭ 380 دۆنۈم (835 گېكتار) يەرگە قۇرۇلىدىكەن.

سموترىچ ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، بۇ ئولتۇراق رايونىنىڭ «قۇددۇسنى شەرقتىن قوغدايدىغان ئىستراتېگىيەلىك بازا» سۈپىتىدە خىزمەت قىلىدىغانلىقىنى ۋە بۇنىڭ رايون ئۈستىدىكى كونتروللۇقنى كۈچەيتىش سىياسىتىنىڭ بىر قىسمى ئىكەنلىكىنى بىلدۈردى.

گەرچە يېڭى ئولتۇراق رايونى خەلقئارا قانۇنغا خىلاپ بولسىمۇ، سموترىچ بۇنىڭ «ئون مىڭلىغان تۇرالغۇ بىلەن تەمىنلەش» ۋە «قۇددۇسنىڭ شەرقىي  قىسمىنىڭ مۇداپىئەسىنى كۈچەيتىش» تە مۇھىم رول ئوينايدىغانلىقىنى ئىلگىرى سۈردى.

سموترىچ بۇ «تارىخىي» پىلاننىڭ ئىسرائىلىيەنىڭ زېمىن پۈتۈنلۈكىنى مۇستەھكەملەشتە ۋە ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدا بىر پەلەستىن دۆلىتى قۇرۇلۇشىنىڭ ئالدىنى ئېلىشتا تۈرتكىلىك رول ئوينايدىغانلىقىنى بايان قىلدى.

ئىسرائىلىيە كابىنېتى يەنە 12-دېكابىر ئىيوردان دەرياسىنىڭ غەربىي قىرغىقىدا 19 قانۇنسىز ئولتۇراق رايونى قۇرۇش پىلانىنىمۇ تەستىقلاپ، بېسىۋېلىش تەدبىرلىرىنى تېخىمۇ كۈچەيتتى.

ئىسرائىلىيەدىكى «ھازىرنىڭ ئۆزىدىلا تىنچلىق ئورنىتىش» (Peace Now) كىشىلىك ھوقۇق گۇرۇپپىسى، تەخمىنەن 500 مىڭ قانۇنسىز ئىسرائىلىيەلىك كۆچمەننىڭ ئىيوردان دەرياسىنىڭ غەربىي قىرغىقىدا، يەنە 250 مىڭ كۆچمەننىڭ ئىشغالىيەت ئاستىدىكى شەرقىي قۇددۇستا قۇرۇلغان ئولتۇراق رايونلاردا ياشايدىغانلىقىنى دوكلات قىلدى.

ئىيوردان دەرياسىنىڭ غەربىي قىرغىقىنىڭ كېڭەيتىلىپ، رەسمىي ھالدا بېسىۋېلىنىشى، بىرلەشكەن دۆلەتلەر تەشكىلاتىنىڭ قارارلىرىدا كۆرسىتىلگەن ئىسرائىلىيە ۋە پەلەستىندىن تەشكىل تاپقان «ئىككى دۆلەتلىك ھەل قىلىش چارىسى» نىڭ ئەمەلىيلىشىش ئېھتىماللىقىنى ئەمەلىيەتتە يوققا چىقارماقتا.

ئىسرائىلىيە 1948-يىلى پەلەستىن زېمىنىدا قۇرۇلغان بولۇپ، كېيىن قالغان پەلەستىن رايونلىرىنىمۇ بېسىۋالغان. كېيىنكى ئىسرائىلىيە ھۆكۈمەتلىرى بېسىۋالغان جايلاردىن چېكىنىپ چىقىشنى ۋە شەرقىي قۇددۇسنى پايتەخت قىلغان مۇستەقىل پەلەستىن دۆلىتىنىڭ قۇرۇلۇشىنى رەت قىلىپ كەلمەكتە.