پەلەستىن ئەسىرلىرى ئاخبارات ئىشخانىسى پەلەستىنلىك رەھبەر مەرۋان بارگۇتىنىڭ ئىسرائىلىيە تۈرمىسىدە تاياق يېيىش نەتىجىسىدە قوۋۇرغا سۆڭەكلىرىنىڭ سۇنغانلىقىنى خەۋەر قىلدى.
پەلەستىن ئىشخانىسى چارشەنبە كۈنى تېلېگرام ئارقىلىق ئېلان قىلغان باياناتىدا، بارگۇتىنىڭ سېنتەبىرنىڭ ئوتتۇرىلىرىدا ئىسرائىلىيەنىڭ جەنۇبىدىكى رامون تۈرمىسىدىن شىمالىدىكى مېگىددو تۈرمىسىگە يۆتكىلىۋاتقاندا ئىسرائىلىيەلىك تۈرمە ساقچىلىرى تەرىپىدىن تاياق يېگەنلىكىنى بىلدۈردى.
باياناتتا، بارگۇتىنىڭ ھوشىدىن كەتكەنلىكى ۋە تۆت قوۋۇرغا سۆڭىكىنىڭ سۇنغانلىقى ئىپادىلەندى.
66 ياشلىق بارگۇتى، پەلەستىن دۆلەت رەئىسى مەھمۇد ئابباس رەھبەرلىكىدىكى فەتھ تەشكىلاتىنىڭ يۇقىرى دەرىجىلىك رەھبەرلىرىدىن بىرى بولۇپ، پەلەستىن سىياسىتىدىكى ئەڭ تونۇلغان ۋە ئالقىشقا ئېرىشكەن شەخسلەرنىڭ بىرى ھېسابلىنىدۇ.
بارگۇتى ئىككىنچى قېتىملىق ئىنتىفادا (قوزغىلاڭ) غا مۇناسىۋەتلىك ئەيىبلەشلەر سەۋەبىدىن بەش قېتىم مۇددەتسىز قاماق جازاسىغا ھۆكۈم قىلىنىپ، 2002-يىلىدىن بۇيان ئىسرائىلىيە تۈرمىلىرىدە ياتماقتا.
غەززە تىنچلىق پىلانى
ئۆتكەن ھەپتە ئامېرىكا پىرېزىدېنتى دونالد ترامپ، ئىسرائىلىيە بىلەن ھاماسنىڭ 29-سېنتەبىر ئېلان قىلغان بىر پىلاننىڭ بىرىنچى باسقۇچى ئۈستىدە كېلىشكەنلىكىنى جاكارلىدى. بۇ پىلان غەززەدە ئۇرۇش توختىتىشنى، پەلەستىنلىك ئەسىرلەر بەدىلىگە بارلىق ئىسرائىلىيەلىك گۆرۈگە ئېلىنغانلارنى قويۇپ بېرىشنى ۋە ئىسرائىلىيە قىسىملىرىنىڭ غەززەدىن باسقۇچلۇق چېكىنىپ چىقىشىنى ئۆز ئىچىگە ئالىدۇ.
پىلاننىڭ بىرىنچى باسقۇچى جۈمە كۈنى يولغا قويۇلدى.
پىلاننىڭ ئىككىنچى باسقۇچىدا، ھاماسنىڭ قاتنىشىشى بولمىغان ھالدا غەززەدە يېڭى بىر باشقۇرۇش مېخانىزمى قۇرۇش، كۆپ دۆلەتلىك بىر كۈچ تەشكىللەش ۋە ھاماسنى قورالسىزلاندۇرۇش كۆزدە تۇتۇلغان.
2023-يىلى ئۆكتەبىردىن بۇيان، ئىسرائىلىيە ھۇجۇملىرىدا كۆپىنچىسى ئاياللار ۋە بالىلاردىن بولۇپ تەخمىنەن 68 مىڭ پەلەستىنلىك ھاياتىدىن ئايرىلدى، غەززە بولسا ئاساسەن ياشىغىلى بولمايدىغان بىر خارابىلىككە ئايلاندى.
