كىيېۋ رۇسىيەنىڭ ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبا ھۇجۇمى تەھدىتى سەۋەبىدىن ھوشيار ھالەتتە تۇرماقتا. ئۇكرائىنا پايتەختى كىيېۋنىڭ شەھەر باشلىقى ۋىتالىي كلىچكو، پارتلاشلارنىڭ كىيېۋنى لەرزىگە سالغانلىقىنى بىلدۈردى.
كلىچكو شەنبە كۈنى سەھەردە تېلېگراممىدا سۇپىسىدا بايانات ئېلان قىلىپ: «پايتەختتە پارتلاشلار يۈز بەردى. ھاۋا مۇداپىئە سىستېمىلىرى ئىشقا كىرىشتۈرۈلدى. شەھەر ۋە رايون دۈشمەننىڭ بىرلەشمە ھۇجۇمىغا ئۇچرىماقتا» دېدى.
كلىچكو، «كۈچلۈك» ھۇجۇمدا كەم دېگەندە سەككىز ئادەمنىڭ يارىلانغانلىقىنى، ئىككى كىشىنىڭ دوختۇرخانىغا ئېلىپ بېرىلغانلىقىنى ۋە باشقا يارىدارلارنىڭ ۋەقە يۈز بەرگەن جايدا داۋالانغانلىقىنى بىلدۈردى.
ئۇكرائىنا ھاۋا ئارمىيەسى، پايتەختكە باللىستىك باشقۇرۇلىدىغان بومبىلارنىڭ ئېتىلغانلىقى بىلدۈرۈپ، ئاھالىنى ھوشيارلىقىنى ئۆستۈرۈش توغرىسىدا ئاگاھلاندۇردى.
پايتەخت پۇقرالار ۋە ھەربىي ئىدارىسى باشلىقى تىمۇر تكاچېنكو، سىۋىياتوشىنىسكىي رايونىدا ئىككى ئوت ئاپىتى يۈز بەرگەنلىكىنى، ئوبولونسكىي رايونىغا باشقۇرۇلىدىغان بومبا قالدۇقلىرىنىڭ چۈشكەنلىكىنى ۋە سولوميانسكىي رايونىدىكى بىر تۇرالغۇ بىناسىغا ئۇچقۇچىسىز ھاۋا ئاپپاراتىنىڭ قالدۇقلىرىنىڭ چۈشكەنلىكىنى دوكلات قىلدى.
دائىرىلەرنىڭ بىلدۈرۈشىچە، رۇسىيەنىڭ باشقۇرۇلىدىغان بومبىلىرى جۈمە كۈنى ئۇكرائىنانىڭ پورت شەھىرى ئودېسسادا ئىككى كىشىنى ئۆلتۈرگەن ۋە بىر قانچە كىشىنى يارىلاندۇرغان.
رۇسىيە ھەربىي تەرىپى، سەيشەنبە كۈنىدىن بۇيان ئۇكرائىنانىڭ 788 دانە ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا بىلەن ھۇجۇم قىلغانلىقىنى، بۇلاردىن 776 سىنىڭ ئېتىپ چۈشۈرۈلگەنلىكىنى ئېلان قىلدى.
«مىڭغا مىڭ ئالماشتۇرۇش»
شەنبە كۈنىدىكى ھۇجۇملار، ئۇكرائىنا بىلەن رۇسىيە جۈمە كۈنى كەڭ كۆلەملىك ئەسىر ئالماشتۇرۇشنى باشلىغاندىن كېيىن يۈز بەردى. ئەگەر بۇ ئالماشتۇرۇش تاماملانسا، بۇ، رۇسىيە-ئۇكرائىنا ئۇرۇشى پارتلىغاندىن بۇيانقى ئەڭ چوڭ كۆلەملىك ئەسىر ئالماشتۇرۇش بولىدۇ.
ھەر ئىككى تەرەپ دەسلەپكى باسقۇچتا 390 دىن ئادەمنى تاپشۇرۇۋالغان بولۇپ، ئۆتكەن ھەپتە ئىستانبۇلدا ئۆتكۈزۈلگەن بىۋاسىتە سۆھبەتلەردە ھاسىل قىلىنغان كېلىشىمگە ئاساسەن ھەر بىر تەرەپتىن جەمئىي 1000 دىن كىشىنى ئالماشتۇرۇشى كۈتۈلمەكتە.
رۇسىيە، ئەسىر ئالماشتۇرۇش تاماملانغاندىن كېيىن ئۇكرائىناغا تىنچلىق كېلىشىمى لايىھەسىنى سۇنىدىغانلىقىنى بىلدۈردى. رۇسىيە تاشقى ئىشلار مىنىستىرى سېرگېي لاۋروۋ جۈمە كۈنى قىلغان سۆزىدە، موسكۋانىڭ ئىستانبۇلدا باشلانغان دىپلوماتىك مۇساپىگە سادىق ئىكەنلىكىنى تەكىتلىدى.
لاۋروۋ: «<مىڭغا مىڭ> فورمۇلاسىغا ئاساسلانغان بۇ ئەسىر ئالماشتۇرۇش رۇسىيە بىلەن ئۇكرائىنا ئوتتۇرىسىدا ئۈچ يىلدىن بۇيان ھاسىل قىلىنغان تۇنجى بىۋاسىتە كېلىشىم ھېسابلىنىدۇ» دېدى.
«تەييارلىق خىزمەتلىرىمىزنى تاماملاۋاتىمىز» دېگەن لاۋروۋ، ئالماشتۇرۇش ئەمەلىيلەشكەندىن كېيىن كېلىشىم لايىھەسىنىڭ سۇنۇلىدىغانلىقىنى سۆزلىرىگە ئىلاۋە قىلدى.
ئۇ يەنە خەلقئارانىڭ بۇ ئىشقا بىلدۈرگەن ئىنكاسىدىن نارازىلىقىنى بىلدۈردى. «ئۇكرائىنانىڭ پۇقرالار نىشانلىرىغا قىلغان ھۇجۇملىرى ۋە ئۇرۇش پىرىنسىپلىرىغا خىلاپلىق قىلىش قىلمىشلىرىغا بىرلەشكەن دۆلەتلەر تەشكىلاتىنىڭ ئىنكاس قايتۇرۇشىنى كۈتمەكتىمىز» دېدى.
ئىستانبۇلدىكى سۆھبەتلەر، ئەسىر ئالماشتۇرۇشتەك ئىنسانپەرۋەرلىك ھەرىكەتلىرىگە ۋەدە بېرىشنى ئۆز ئىچىگە ئالغان دەسلەپكى ئىلگىرىلەشلەرنى قولغا كەلتۈرگەن ئىدى.
