فىلىپپىن تەرەپ، دۆلەتنىڭ تېررورلۇق تەلىم-تەربىيەسى ئۈچۈن ئىشلىتىلگەنلىكىگە دائىر بىرەر دەلىلنىڭ يوقلۇقىنى ئېلان قىلدى؛ بۇ بايانات، ئاۋىسترالىيەدىكى بوندى دېڭىز ساھىلىدا يۈز بەرگەن كەڭ كۆلەملىك ھۇجۇمنىڭ جاۋابكارى دەپ قارىلىۋاتقان كىشىلەرنىڭ، ئۆتكەن يىلى نويابىر ئېيىنى جەنۇبتىكى قوراللىق ھەرىكەتلىرى بىلەن تونۇلغان بىر ئارالدا ئۆتكۈزگەنلىكى ئوتتۇرىغا چىققاندىن بىر كۈن كېيىن ئېلان قىلىندى.

فىلىپپىن پىرېزىدېنتلىق مەھكىمىسى باياناتچىسى كلائىر كاسترو چارشەنبە كۈنى ئۆتكۈزگەن مۇخبىرلارنى كۈتۈۋېلىش يىغىنىدا سۆز قىلىپ: «(پىرېزىدېنت فېردىناند ماركوس) فىلىپپىننى دائېشنىڭ تەلىم-تەربىيە بازىسى دەپ تەسۋىرلەيدىغان ئومۇملاشتۇرۇشلارنى ۋە خاتا ئېنىقلىمىلارنى كەسكىن رەت قىلىدۇ» دېدى.

ئۇ دۆلەت بىخەتەرلىك كېڭىشىنىڭ باياناتىنى ئوقۇۋېتىپ: «دۆلەتنىڭ تېررورلۇق تەلىم-تەربىيەسى ئۈچۈن ئىشلىتىلگەنلىكىگە دائىر دەۋالارنى قۇۋۋەتلەيدىغان ھېچقانداق دەلىل سۇنۇلمىدى... يەنى، بوندى دېڭىز ساھىلى ۋەقەسىگە چېتىشلىق كىشىلەرنىڭ فىلىپپىندا ھەر قانداق بىر تەلىم-تەربىيە ئالغانلىقىغا دائىر دەلىللەنگەن بىرەر دوكلات ياكى ئىسپات يوق» دېگەنلەرنى قەيت قىلدى.

سەيشەنبە كۈنى، دۆلەتلىك كۆچمەنلەر ئىدارىسى سىدنېيدىكى بوندى دېڭىز ساھىلىدا ئۆتكۈزۈلگەن بىر خانۇكا بايرىمى پائالىيىتىدە 15 كىشىنى ئۆلتۈرۈش ۋە ئونلارچە كىشىنى يارىلاندۇرۇش بىلەن ئەيىبلەنگەن ساجىد ئەكرەم بىلەن ئوغلى ناۋىدنىڭ 1-نويابىردا دۆلەتكە كىرىپ، جەنۇبتىكى داۋاۋ (Davao) ۋىلايىتىگە قاراپ ماڭغانلىقىنى دەلىللىدى.

«رەھبەرلىك يوق»

داۋاۋ جايلاشقان مىنداناۋ ئارىلى، مەركىزىي ھۆكۈمەتكە قارشى ئېلىپ بېرىلىۋاتقان قوراللىق ھەرىكەتلەر جەھەتتە ئۇزۇن تارىخقا ئىگە.

ئاۋسترالىيە ئەمەلدارلىرى بۇ ئىككى كىشىنىڭ سەپەر جەريانىدا قوراللىق ئۇنسۇرلار بىلەن كۆرۈشكەن ياكى كۆرۈشمىگەنلىكىنى تەكشۈرمەكتە.

شۇنىڭ بىلەن بىرگە، فىلىپپىن ئارمىيەسى چارشەنبە كۈنى، ماراۋى مۇھاسىرىسىدىن بۇيان مىنداناۋدا ھېلىھەم ھەرىكەت قىلىۋاتقان قوراللىق گۇرۇپپىلارنىڭ يىللار ئىچىدە زور دەرىجىدە ئاجىزلاشتۇرۇلغانلىقىنى بىلدۈردى.

فىلىپپىن ئارمىيەسى باياناتچىسى پولكوۋنىك فىرانسېل پادىلا ئەتىگەندە ئۆتكۈزۈلگەن مۇخبىرلارنى كۈتۈۋېلىش يىغىنىدا، «2024-يىلىنىڭ بېشىدىن بۇيان ھېچقانداق چوڭ تىپتىكى تېررورلۇق ھەرىكىتى ياكى تەلىم-تەربىيە پائالىيىتىنى خاتىرىلىمىدۇق...» دېدى.

ئۇ قوراللىق گۇرۇپپىلار ھەققىدە توختىلىپ: «ئۇلار بۆلۈنۈپ كەتكەن بولۇپ، رەھبەرلىكى يوق» دېگەنلەرنى سۆزلىرىگە ئىلاۋە قىلدى.

پولكوۋنىك زېركىس تىرىنىداد مۇخبىرلارغا قىلغان سۆزىدە، ئاتا-بالا ئىككىيلەننىڭ نويابىر ئېيىدىكى فىلىپپىندا ئۆتكۈزگەن ۋاقىتىنىڭ مۇھىم بىرەر تەلىم-تەربىيە ئېلىش ئۈچۈن يېتەرلىك ھېسابلانمايدىغانلىقىنى بىلدۈرۈپ، «تەلىم-تەربىيەنى ئاران 30 كۈندىلا ئالغىلى بولمايدۇ... بولۇپمۇ مەرگەنلىك تەلىم-تەربىيەسى ئالماقچى بولسىڭىز» دېگەنلەرنى قەيت قىلدى.