ئامېرىكانىڭ ئوتتۇرا شەرققە «USS Theodore Roosevelt» ئاۋىياماتكىسى ۋە يەنە بىر دېڭىز پىيادە ئەسكەرلەر دىۋىزىيەسى ئەۋەتىشنى قارار قىلغانلىقى خەۋەر قىلىندى.
ئىسرائىلىيەدە تارقىتىش بېرىدىغان i24 تېلېۋىزىيەسىنىڭ بىر ئامېرىكالىق ئەمەلدارنى مەنبە قىلغان خەۋىرىدە، ئامېرىكانىڭ ئۈچىنچى ئاۋىياماتكىسى ۋە ئىككىنچى دېڭىز پىيادە ئەسكەرلەر دىۋىزىيەسىنى ئوتتۇرا شەرققە ئەۋەتىدىغانلىقى قەيت قىلىندى.
«يېدىئوت ئاھرونوت» گېزىتىنىڭ خەۋىرىدە، بۇ قارارنىڭ ئامېرىكا پىرېزىدېنتى دونالد ترامپنىڭ نويابىردىكى ئوتتۇرا مەزگىللىك سايلامدىن كېيىن ئىرانغا قايتا ھۇجۇم قىلىدىغانلىقى ھەققىدىكى تەھدىتلىرىدىن كېيىن ئېلىنغانلىقى ئىلگىرى سۈرۈلدى.
«The Hill» گېزىتى بولسا، «USS Theodore Roosevelt» ئاۋىياماتكىسىنىڭ رايوندىكى پاراخوتلارنىڭ بىرى بىلەن ئورۇن ئالماشتۇرۇش ئۈچۈن ئوتتۇرا شەرققە قاراپ يولغا چىققانلىقىنى يازدى.
ئامېرىكا ئوتتۇرا شەرققە قوشۇمچە 10 مىڭ ئەتراپىدا ئەسكەرنى يولغا سالدى
«ۋال سترېت ژۇرنىلى» گېزىتىگە ئۇچۇر بەرگەن ئامېرىكالىق ئەمەلدارلارمۇ پېنتاگوننىڭ ئوتتۇرا شەرققە قوشۇمچە 9 مىڭدىن 10 مىڭغىچە ئەسكەر ئەۋەتىدىغانلىقىنى بىلدۈردى.
ئەمەلدارلارنىڭ ئېيتىشىچە، «USS Theodore Roosevelt» ئاۋىياماتكىسى 27-سېنتەبىردە سان دىيېگودىكى ئاساسلىق پورتىدىن ئايرىلغان. دېڭىز پىيادە ئەسكەرلىرىنى توشۇيدىغان ئۈچ قوش ماكانلىق ھەربىي پاراخوتتىن تەركىب تاپقان «USS Makin Island» قوش ماكانلىق تەييارلىق گۇرۇپپىسىمۇ 28-سېنتەبىردە يولغا چىققان بولۇپ، نويابىرنىڭ ئاخىرىغىچە رايونغا يېتىپ بارىدۇ.
«USS Theodore Roosevelt» ئاۋىياماتكىسى 2023-يىلى 7-ئۆكتەبىردىن كېيىن ئوتتۇرا شەرققە ئەۋەتىلگەن، بىر مەزگىلدىن كېيىن نۆۋەت ئالماشتۇرۇش ئۈچۈن ئامېرىكاغا قايتقانىدى.
ئامېرىكانىڭ ھازىر ئوتتۇرا شەرقتە «USS George H.W. Bush» ۋە «USS George Washington»ناملىق ئىككى ئاۋىياماتكىسى، شۇنداقلا تەخمىنەن 50 مىڭ ئەسكىرى بار.
