ئىتالىيەنىڭ ساياھەت شەھەرلىرىدىن بىرى بولغان كومونىڭ شەھەر باشلىقى ئالېسساندرو راپىنىس، بىر توك ۋېلىسىپىت ئۆزىگە سوقۇۋەتكەندىن كېيىن، شەھەرنىڭ بەزى تارىخىي كوچىلىرىدا ۋېلىسىپىت ۋە توك ۋېلىسىپىت ئىشلىتىشنى مەنئىي قىلىش قارارى چىقارغانلىقىنى جاكارلىدى.
ئىتالىيە ئاخبارات ۋاسىتىلىرىنىڭ خەۋىرىگە قارىغاندا، شەھەر باشلىقى راپىنىس شەھەر مەركىزىدىكى تەخمىنەن 30 كوچىدا ۋېلىسىپىت ۋە توك ۋېلىسىپىت ئىشلىتىشنى چەكلىمەكچى بولغان. يېڭى بەلگىلىمە بويىچە، ۋېلىسىپىت مىنىش مەنئىي قىلىنغان كوچىلاردا كىشىلەر ۋېلىسىپىتتىن چۈشۈپ پىيادە مېڭىشىغا توغرا كېلىدىكەن.
ئىتالىيەنىڭ ANSA ئاگېنتلىقىغا بايانات بەرگەن راپىنىس، ئىيۇن ئېيىدا شەھەرلىك ھۆكۈمەت بىناسىدىن ئايرىلىۋاتقان ۋاقتىدا بىر توك ۋېلىسىپىتنىڭ ئۆزىگە سوقۇۋەتكەنلىكىنى ئەسكەرتىپ مۇنداق دېدى:
«ھەتتا دوختۇرخانىغىمۇ بارمىدىم. بىر ۋېلىسىپىت مېنى سوقۇۋەتتى، مەن بۇ ھەقتە ئۇچۇر توپلىدىم ۋە بۇ تەدبىرنى يولغا قويدۇم.»
راپىنىس بۇ قارارنىڭ ۋېلىسىپىت ۋە توك ۋېلىسىپىتلەرنىڭ پىيادىلەرگە ئېلىپ كېلىدىغان بىخەتەرلىك خەۋپىنى ئازايتىشنى مەقسەت قىلىدىغانلىقىنى تەكىتلىدى.
سېنتەبىر ئېيىدا يولغا قويۇلىدىغان مەزكۇر بەلگىلىمىگە يەرلىك خەلق نارازىلىق بىلدۈرگەن بولۇپ، قارارنى ئەمەلدىن قالدۇرۇش ئۈچۈن ئىمزا توپلاش ھەرىكىتى باشلانغانلىقى ئۇقتۇرۇلدى.
