ب د ت نىڭ باش كاتىپى ئانتونىيو گۇتېررېس ب د ت خەۋپسىزلىك كېڭىشىنىڭ يۇقىرى دەرىجىلىك ئەمەلدارلار قاتناشقان ئىسرائىلىيە-پەلەستىن مەسىلىسىگە مۇناسىۋەتلىك يىغىندا سۆز قىلدى.

ئۇ ئوتتۇرا شەرقنىڭ چوڭقۇر بۇرۇلۇش باسقۇچىنى باشتىن كەچۈرۈۋاتقانلىقىنى بىلدۈرۈپ: «بۇ رايون ئېنىقسىزلىققا تولغان، ئەمما پۇرسەتلەرمۇ بار. ئوتتۇرا شەرق قايتا شەكىللىنىۋاتىدۇ، بۇ جەريان نەتىجىسىنىڭ قانداق بولىدىغانلىقى تېخى ئېنىق ئەمەس» دېدى.

ئۇ مۇنداق دەپ كۆرسەتتى: «ئوتتۇرا شەرقنىڭ بۇ داۋالغۇش دەۋرىدىن تىنچلىق، ئىززەت-ھۆرمەت ۋە ئۈمىدكە تولغان ئۇپۇق بىلەن چىقىشىغا كاپالەتلىك قىلىش بىزنىڭ ئورتاق مەسئۇلىيىتىمىز.»

ئۇ غەززەدىكى ئۇرۇش توختىتىش ۋە مەھبۇسلارنى قويۇپ بېرىش كېلىشىمىنىڭ ئۇزۇندىن بۇيان ئىنتىزار بولغان «خاتىرجەملىك» بىلەن تەمىنلىگەنلىكىنى بايان قىلدى.

ئۇ غەززەگە 630 دىن ئارتۇق ئىنسانپەرۋەرلىك ياردەم يۈك ماشىنىسىنىڭ يېتىپ بارغانلىقىنى، تەرەپلەرنىڭ كېلىشىمنى تولۇق ئىجرا قىلىشى كېرەكلىكىنى تەكىتلەپ: «بۇ كېلىشىمنىڭ بارلىق ئەسىرلەرنىڭ قويۇپ بېرىلىشىگە ۋە غەززەدە ئۇزۇن مۇددەتلىك ئۇرۇش توختىتىشقا سەۋەب بولۇشىنى كاپالەتكە ئىگە قىلىشىمىز كېرەك. غەززەدىكى ئۇرۇش توختىتىشنىڭ تۆۋەندىكى ئوخشىمىغان تۆت مەسىلىگە تەسىر كۆرسىتىشىنى ئۈمىد قىلىمىز. بىرىنچىسى، ب د ت يېقىن شەرقتىكى پەلەستىنلىك مۇساپىرلارغا ياردەم قىلىش ئاگېنتلىقى پائالىيەتلىرىنىڭ توسقۇنلۇققا ئۇچرىماستىن داۋاملىشىشى. ئىككىنچىسى، ياردەملەرنىڭ بىخەتەر مۇھىتتا كۆپەيتىلگەن ھالدا موھتاجلارغا يەتكۈزۈلۈشى ۋە جەمئىيەت تەرتىپىنىڭ قايتىدىن ئورنىتىلىشى. ئۈچىنچىسى، ھاياتىي ئەھمىيەتكە ئىگە ياردەملەرگە ئېرىشىش، بولۇپمۇ تىببىي يۆتكەش تەلەپ قىلىنىدىغان بىمارلار ئۈچۈن خەلقئارالىق غا ياردەمنىڭ كاپالەتكە ئىگە قىلىنىشى. تۆتىنچى، پۇقرالارنىڭ قوغدىلىشى بىلەن پۇقرالارنىڭ بىخەتەر ھالدا يۇرت-ماكانلىرىغا قايتىشى ئۈچۈن زۆرۈر تەدبىرلەرنىڭ يولغا قويۇلۇشىدۇر» دېدى.

ئۇ ئاخىرىدا: «مەن ب د ت ۋە بارلىق ئەزا دۆلەتلەرنى غەززەدىكى ئۇرۇش توختىتىشنى، توقۇنۇشلارنىڭ ئۇزۇن مۇددەتلىك ئاخىرلاشتۇرۇشنى، جىنايەتچىلەرنىڭ مەسئۇلىيىتىنى سۈرۈشتۈرۈشنى، ئەسلىگە كەلتۈرۈش ۋە قايتا قۇرۇشنى قوللاشقا چاقىرىمەن» دېدى.