پەيشەنبە كۈنى ئېلان قىلىنغان سانلىق مەلۇماتلارغا ئاساسلانغاندا، تۈركىيە جۇمھۇرىيىتى مەركىزىي بانكىسىنىڭ رەسمىي خەلقئارالىق زاپاسلىرى 16-يانۋارغىچە بولغان ئارىلىقتا تۇنجى قېتىم 200 مىليارد دوللارلىق چەكتىن ئېشىپ كەتكەن.
بانكا ئالدىنقى ھەپتە 196 مىليارد 100 مىليون دوللار بولغان زاپاسنىڭ %4.6 (يەنى 9 مىليارد 100 مىليون دوللار) ئېشىپ، 205 مىليارد 200 مىليون دوللارغا يەتكەنلىكىنى ئۇقتۇردى.
ئالماشتۇرغىلى بولىدىغان چەت ئەل پۇلى تۈرىدىكى زاپاسلار بولسا ئالدىنقى ھەپتىگە سېلىشتۇرغاندا %6.7 ئېشىپ، 76 مىليارد 400 مىليون دوللارغا يەتكەن.
بانكىنىڭ (ئالتۇن ئامانەت پۇللىرى ۋە ماس كېلىدىغان ئالتۇن پېرېۋوتلىرىنى ئۆز ئىچىگە ئالغان) ئالتۇن زاپاسلىرى ئوخشاش مەزگىلدە %3.7 ئېشىپ، 121 مىليارد دوللارغا يەتكەن.
بانكىنىڭ خەلقئارا پۇل فوندى تەشكىلاتى دىكى ئومۇمىي زاپاس ئورنى ۋە ئالاھىدە پۇل ئېلىش ھوقۇقى %0.2 ئازىيىپ، 7 مىليارد 700 مىليون دوللارغا تۆۋەنلىگەن.
تۈركىيە خەزىنە ۋە مالىيە مىنىستىرى مەمەت شىمشەك يولغا قويۇلغان پىروگرامما سايىسىدا ئۇمۇمىي زاپاسنىڭ تەخمىنەن 107 مىليارد دوللار ئېشىپ، 205 مىليارد 200 مىليون دوللارغا يەتكەنلىكىنى بىلدۈردى.
شىمشەك تۈركىيەنىڭ ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا مۇنداق دېدى:
«پېرېۋوتلار (Swap) نى ھېسابقا ئالمىغاندا، ساپ زاپاستىكى ئېشىش 139 مىليارد 300 مىليون دوللار بولدى. خەلقئارالىق ئۆلچەملەر بويىچە زاپاسنىڭ يېتەرلىك بولۇشىغا كاپالەتلىك قىلدۇق.»
مىنىستىر شىمشەك 143 مىليارد دوللارلىق شەرتلىك مەجبۇرىيەتتىن قۇتۇلۇش مۇساپىسىنى تاماملاش ئالدىدا تۇرۇۋاتقانلىقلىرىنى ۋە بۇنىڭ چەت ئەل پۇلى ئورنىدا جەمئىي 280 مىليارد دوللاردىن ئاشىدىغان بىر ياخشىلىنىشنى قولغا كەلتۈرگەنلىكىنى ئەسكەرتىپ مۇنداق دېدى:
«ماكرو پۇل مۇئامىلە مۇقىملىقىنىڭ كۈچىيىشى خەتەر نىسبىتىمىزنىڭ تۆۋەنلىشىگە مۇھىم تۆھپە قوشماقتا ۋە ئىقتىسادىمىزنى تاشقى تەسىرلەرگە قارشى تېخىمۇ چىداملىق ھالغا كەلتۈرمەكتە.»
