دىپلوماتىيەلىك مەنبەلەردىن ئېلىنغان ئۇچۇرلارغا ئاساسلانغاندا، تاشقى ئىشلار مىنىستىرى خاقان فىدان تاشقى ئىشلار مىنىستىرلىقى ئىستراتېگىيەلىك تەتقىقاتلار مەركىزى (سام) ۋە چاتام ھاۋس تەرىپىدىن ئەنقەرەدە ئۆتكۈزۈلگەن «ئەنقەرە باشلىقلار يىغىنىدىن كېيىنكى ياۋروپا بىخەتەرلىكى: ياۋروپا مىقياسىدا ناتو ئىتتىپاقداشلىرى ئوتتۇرىسىدىكى ھەمكارلىقنى كۈچەيتىش» تېمىلىق پائالىيەتتە سۆز قىلغان.
ناتونىڭ يېڭى دەۋردە ئىستراتېگىيەلىك ئىقتىدار قۇرۇلۇشىغا ئەھمىيەت بېرىشى كېرەكلىكىنى كۆرسىتىپ ئۆتكەن فىدان، ناتونىڭ پەقەتلا نۆۋەتتىكى تەھدىتلەرگە تاقابىل تۇرىدىغان بىر قۇرۇلما بولۇپ قالماستىن، بەلكى تېخىمۇ ئۇزۇن مۇددەتلىك ۋە بىر گەۋدىلەشكەن بىخەتەرلىك تەسەۋۋۇرىنى يېتىلدۈرۈشى كېرەكلىكىنى ئوتتۇرىغا قويدى.
فىدان ئامېرىكا بىلەن ياۋروپا ئوتتۇرىسىدا بەزى سۈركىلىشلەر بولسىمۇ، بۇ سۈركىلىشلەرنىڭ ناتو باشلىقلار يىغىنىدا كونتروللۇقتىن چىقىپ كەتكەن كىرىزىسقا ئايلىنىپ كەتمەيدىغانلىقىنى ۋە ئۇنى تىزگىنلىگىلى بولىدىغانلىقىنى، ئامېرىكا پىرېزىدېنتى دونالد ترامپنىڭ ناتو باشلىقلار يىغىنىغا قاتنىشىشىنىڭ مەسىلىلەرنى بىر تەرەپ قىلىش جەھەتتىن مۇھىم ئەھمىيەتكە ئىگە ئىكەنلىكىنى تەكىتلىدى.
ياۋروپا بىخەتەرلىكىدە تۈركىيەنىڭ مەركىزىي رولى
ياۋروپا بىخەتەرلىكىنى پەقەت ياۋروپا ئىتتىپاقىغىلا يىغىنچاقلاشقا بولمايدىغانلىقىنى ۋە تېخىمۇ بىر گەۋدىلەشكەن ئامىللارغا ئېھتىياجلىق ئىكەنلىكىنى تىلغا ئالغان فىدان، بۇ دائىرىدە تۈركىيەنىڭ مەركىزىي رولىنى ئالاھىدە تەكىتلىدى.
فىدان تۈركىيەنىڭ، ئۇكرائىنانىڭ زېمىن پۈتۈنلۈكى ۋە ئىگىلىك ھوقۇقىنى قوللايدىغانلىقىنى جەزملەشتۈرۈش بىلەن بىرگە، ئەنقەرەنىڭ رۇسىيە بىلەن بولغان دىپلوماتىيەلىك ئالاقە ۋە سۆھبەت يوللىرىنى ئوچۇق تۇتۇشىنىڭمۇ ياۋروپا بىخەتەرلىكى نۇقتىسىدىن زۆرۈر ئىكەنلىكىنى بىلدۈردى.
ناتونىڭ مۇداپىئە سانائىتى ئىقتىدارىنى پەقەت ياۋروپا ئىتتىپاقىنى مەركەز قىلغان ھالدىلا ئويلىماسلىق كېرەكلىكىنى ئەسكەرتكەن فىدان، تۈركىيە ۋە ئەنگلىيەگە ئوخشاش كۈچلۈك مۇداپىئە سانائىتىگە ئىگە دۆلەتلەرنىڭمۇ ياۋروپا بىخەتەرلىكى دائىرىسىدىكى مۇداپىئە ھەمكارلىقىنىڭ تەبىئىي ۋە زۆرۈر ئاكتىيورلىرى سۈپىتىدە كۆرۈلىدىغانلىقىنى تىلغا ئالدى.
