ۈركىيە دۆلەت مۇداپىئە مىنىستىرلىقى ئىسرائىلىيەنىڭ سۈرىيەدىكى ئەبۇ زۇھۇر ھاۋا ئارمىيە بازىسىغا قىلغان ھۇجۇمىدىن ئىلگىرى ياكى ھۇجۇم جەريانىدا، ئۇ يەردە ھېچقانداق تۈركىيە ھەربىي ھەيئىتىنىڭ يوقلۇقىنى ئېلان قىلدى.
دۆلەت مۇداپىئە مىنىستىرلىقى ئۇچۇر-ئالاقە ئىشلىرى مەسئۇلى ۋە مىنىستىرلىق باياناتچىسى بىرىگادا گېنېرالى زەكى ئاقتۈرك، ھەپتىلىك ئاخبارات ۋاسىتىلىرىنى خەۋەرلەندۈرۈش يىغىنىدا سۆز قىلدى. زەكى ئاقتۈرك، ئىسرائىلىيەنىڭ غەززە پىلانىنى رەت قىلىشى ۋە رايوندىكى ھۇجۇملىرىنى داۋاملاشتۇرۇشىنىڭ، ئادالەتلىك ۋە سىجىل تىنچلىق ئورنىتىش تىرىشچانلىقلىرىغا توسالغۇ بولۇۋاتقانلىقىغا ئەسكەرتىپ مۇنداق دېدى:
«ئىسرائىلىيە ئىمزالانغان رامكا كېلىشىمىگە قارىماي، لىۋاننىڭ جەنۇبىدىكى ھۇجۇملىرىنى ۋە ھەربىي پائالىيەتلىرىنى داۋاملاشتۇرماقتا. سۈرىيەگە قىلغان ئەڭ ئاخىرقى ھۇجۇملىرى ئارقىلىق بۇ دۆلەتنىڭ زېمىن پۈتۈنلۈكى، ئىگىلىك ھوقۇقى ۋە بىرلىكىنى نىشان قىلماقتا. خەلقئارا جەمئىيەتنىڭمۇ ئىسرائىلىيەنىڭ رايوننىڭ تىنچلىقى ۋە مۇقىملىقىغا تەھدىت ئېلىپ كېلىۋاتقان قىلمىشلىرىغا قارشى، خەلقئارا قانۇن ۋە ئىنسانىي قىممەت قاراشلارغا ئىگە چىققان ھالدا، تېخىمۇ ئېنىق ۋە ئۈنۈملۈك تەدبىرلەرنى قوللىنىشى تولىمۇ زۆرۈردۇر.»
ئىسرائىلىيەنىڭ 18-ئاۋغۇستتا سۈرىيەدىكى ئەبۇ زۇھۇر ھاۋا ئارمىيە بازىسىغا قىلغان ھۇجۇمى ھەققىدە توختالغان زەكى ئاقتۈرك: «ئاساسلىق نىشانىمىز رايونىمىزنىڭ تېخىمۇ كۆپ توقۇنۇش ۋە مۇقىمسىزلىق پاتقىقىغا پېتىپ قېلىشنىڭ ئالدىنى ئېلىش، تىنچلىق ۋە خەۋپسىزلىكنى سىجىل ھالەتكە كەلتۈرۈشتۇر. بۇ دائىرىدە سۈرىيەنىڭ ئىگىلىك ھوقۇقى ۋە زېمىن پۈتۈنلۈكىنى قوغداش، مۇقىم ۋە بىخەتەر قۇرۇلمىغا ئىگە قىلىش يۆنىلىشىدىكى خىزمەتلىرىمىز ۋە تۆھپىلىرىمىز قەتئىي داۋاملىشىدۇ» دېدى.
