غەززەگە قاراپ كېتىۋاتقان خەلقئارا سۇمۇد فىلوتىدىكى تۈركىيە ئەترىتى پەيشەنبە كۈنى ئانادولۇ ئاگېنتلىقىغا بەرگەن باياناتىدا، ئىسرائىلىيە كۈچلىرىنىڭ فىلوتنى غەززەدىن 600 دېڭىز مىلىدىن ئارتۇق يىراقلىقتا، گىرېتسىيە دېڭىز تەۋەلىكىنىڭ بىرنەچچە مىل سىرتىدىكى خەلقئارا سۇ تەۋەلىكىدە توسقانلىقىنى ۋە 18 تۈركىيە پۇقراسىنى تۇتقۇن قىلغانلىقىنى ئېيتتى.

تۈركىيە ئەترىتى ئانادولۇ ئاگېنتلىقىغا بەرگەن باياناتىدا، ئىسرائىلىيە كۈچلىرىنىڭ چارشەنبە كۈنى كېچىدە كىرىت ئارىلى ئوچۇق دېڭىزىدا كېمىلەرنى قورشاۋ ئاستىغا ئالغانلىقىنى ۋە باسقۇن قىلىپ پاراخوتتىكى 170 تىن ئارتۇق كىشىلىك ھوقۇق پائالىيەتچىسىنى تۇتقۇن قىلغانلىقىنى بىلدۈردى.

تۇتقۇن قىلىنغان تۈركىيە پۇقرالىرىنىڭ ئىسىملىرى تۆۋەندىكىچە: مۇستافا ئەنەس توپال، مۇھەممەد ئۆزدەم، ئەلى دەنىز، يۇنۇس كاۋا، شاھىن ياسلىق، مۇستافا ئارسلان، ئابدۇلسەلام دەمىر، نەۋزات ئويلەك، نەۋزات گۈزەل، خېلىل ئەردوغمۇش، ئابدۇللاتىف فاسلى، ھۈسەيىن شۇئەيب ئوردۇ، مەھمۇت ئاقاي، گۆركەم دۇرۇ، مەھمەت ئاتلى، مۇكرەمىن كۆسە، رامازان تەكدەمىر ۋە مەھمۇت چاغاتاي ياۋۇز.

ئىسرائىلىيە دېڭىز ئارمىيەسى غەززەدە ئۇزۇندىن بۇيان داۋاملىشىۋاتقان قورشاۋنى بۇزۇپ تاشلاش مەقسىتىدە يولغا چىققان فىلوتقا تەۋە پاراخوتلارنى چارشەنبە كۈنى كېچىدە توستى.

مەزكۇر گۇرۇپپا، ئىسرائىلىيە كۈچلىرىنىڭ فىلوتنى كىرىت ئارىلىغا يېقىن خەلقئارا سۇ تەۋەلىكىدە قورشاۋ ئاستىغا ئالغانلىقىنى، ئالاقىنى ئۈزۈپ تاشلىغانلىقىنى ۋە 21 پاراخوتنى قولغا چۈشۈرگەنلىكىنى، ۋەقەدىن كېيىن 17 پاراخوتنىڭ قېچىپ قۇتۇلۇپ گىرېتسىيە سۇ تەۋەلىكىگە كىرگەنلىكىنى ئەسكەرتتى.

غەززەگە ئىنسانىي ياردەم توشۇۋاتقان فىلوت ئىسرائىلىيەنىڭ قورشاۋىنى بۇزۇپ تاشلاشنى ۋە دېڭىز يولى ئارقىلىق ئىنسانىي بىر كارىدور ئېچىشنى نىشان قىلماقتا.

بۇ ھەرىكەت، ئىبرانىي تىلىدا چىقىدىغان ئاخبارات ۋاسىتىلىرىنىڭ ئىسرائىلىيەنىڭ تۈرلۈك دۆلەتلەردىن كەلگەن تەخمىنەن 1000 كىشىلىك ھوقۇق پائالىيەتچىسىنى توشۇۋاتقان ۋە جەمئىي 100 ئەتراپىدا پاراخوتتىن تەشكىل تاپقان فىلوتنى توسۇشقا تەييارلىق قىلىۋاتقانلىقىنى خەۋەر قىلىشىدىن بىرنەچچە سائەت كېيىن يۈز بەردى.

ئىسرائىلىيە 2007-يىلىدىن بۇيان غەززەنى قامال قىلىۋاتقان بولۇپ، تەخمىنەن 2 مىليون 400 مىڭ پەلەستىنلىكتىن 1 مىليون 500 مىڭى ئىسرائىلىيەنىڭ رايونغا قارىتا ئېلىپ بېرىۋاتقان ئىرقىي قىرغىنچىلىق ئۇرۇشى جەريانىدا ئۆي-ماكانلىرىنىڭ ۋەيران قىلىنىشىدىن كېيىن ئۆيسىز قالدى.