ئامېرىكا مۇئاۋىن پىرېزىدېنتى ج د ۋانس چارشەنبە كۈنى غەززەدىكى ئۇرۇش توختىتىش كېلىشىمىنىڭ ئىجرا قىلىنىشى ۋە نەتىجىسىگە ئۈمىدۋار ئىكەنلىكىنى بىلدۈردى.
ۋانس قۇددۇستىكى ئىشخانىسىدا نېتانياھۇ بىلەن كۆرۈشكەندىن كېيىن مۇخبىرلارغا: «ئۇرۇش توختىتىشنىڭ داۋاملىشىدىغانلىقىغا ۋە پۈتكۈل ئوتتۇرا شەرقتە تېخىمۇ ياخشى كەلگۈسى بەرپا قىلالايدىغانلىقىمىزغا ئۈمىدۋارمەن. بىراق، بۇ بىر ئاز تىرىشچانلىق تەلەپ قىلىدۇ» دېدى.
ۋانس سۆزىنى داۋاملاشتۇرۇپ: «پەقەت يېقىنقى يەتتە كۈن ئىچىدە قىلىنغان ئىشلارغا قاراپلا، بۇ يەردە ئىلگىرى ئەسلا قىلىنمىغان بىر ئىشنى ئەمەلگە ئاشۇرۇش ئۈچۈن كىشىنى ھەيران قالدۇرىدىغان بىر يولدا كېتىۋاتقانلىقىمىزنى ئويلايمەن» دېدى.
ئامېرىكا مۇئاۋىن پىرېزىدېنتى غەززەدىكى ئۇرۇش توختىتىشنىڭ «بىر پۇرسەت» ۋە ئىبراھىم كېلىشىملىرى ئاساسىدا تەرەققىي قىلدۇرۇلىدىغان «ھالقىلىق بىر باسقۇچ» دەپ قارىلىۋاتقانلىقىنى بىلدۈردى.
ئىرقىي قىرغىنچى نېتانياھۇ بولسا، ئامېرىكا مۇئاۋىن پىرېزىدېنتى بىلەن غەززەنى قايتا قۇرۇش ۋە ئۇرۇش توختىتىش كېلىشىمى دائىرىسىدە غەززەدە باشقۇرۇش ۋە بىخەتەرلىك مېخانىزملىرىنى قۇرۇشنى مۇزاكىرە قىلغانلىقىنى ئېيتتى.
ئىسرائىلىيە تاراتقۇلىرىنىڭ خەۋىرىگە قارىغاندا، ۋانسنىڭ شۇ كۈنى كەچتە ئىسرائىلىيە پىرېزىدېنتى ئىسھاق ھېرزوگ بىلەن كۆرۈشۈشى كۈتۈلمەكتە.
ئامېرىكا مۇئاۋىن پىرېزىدېنتى 10-ئۆكتەبىر غەززەدە يولغا قويۇلغان ئۇرۇش توختىتىشنىڭ ئىجرا قىلىنىشىنى نازارەت قىلىش ۋە ئامېرىكا پىرېزىدېنتى دونالد ترامپنىڭ پىلانىنىڭ ئىككىنچى باسقۇچىنى يۇقىرى دەرىجىلىك ئىسرائىلىيە ئەمەلدارلىرى بىلەن مۇزاكىرە قىلىش ئۈچۈن سەيشەنبە كۈنى ئىسرائىلىيەگە ئۈچ كۈنلۈك زىيارەتكە كەلگەن ئىدى.
بىرىنچى باسقۇچ پەلەستىنلىك تۇتقۇنلار بەدەلىگە ئىسرائىلىيەلىك گۆرۈگە ئېلىنغانلارنى قويۇپ بېرىشنى ئۆز ئىچىگە ئالاتتى.
بۇ پىلان يەنە غەززەنى قايتا قۇرۇش ۋە ھاماس قاتناشمىغان يېڭى بىر باشقۇرۇش مېخانىزمى قۇرۇشنى ئۆز ئىچىگە ئالىدۇ.
غەززەدىكى سەھىيە مىنىستىرلىقىنىڭ بىلدۈرۈشىچە، ئىسرائىلىيەنىڭ 2023-يىلى ئۆكتەبىردىن بۇيان داۋاملاشتۇرۇۋاتقان ئىرقىي قىرغىنچىلىق خاراكتېرىدىكى ئۇرۇشى غەززەدە 68 مىڭ 200 دىن ئارتۇق كىشىنىڭ ئۆلۈشىگە ۋە 170 مىڭ 300 دىن ئارتۇق كىشىنىڭ يارىلىنىشىغا سەۋەب بولغان.
