رۇسىيە تاشقى ئىشلار مىنىستىرلىقى ئەرمېنىيەدىكى باش ئەلچىسىنى مەسلىھەتلىشىش ئۈچۈن موسكۋاغا چاقىرغانلىقىنى خەۋەر قىلدى.
مىنىستىرلىق تەرىپىدىن ئېلان قىلىنغان باياناتتا، رۇسىيەنىڭ يېرېۋاندىكى باش ئەلچىسى سېرگېي كوپىركىننىڭ مەسلىھەتلىشىش ئۈچۈن موسكۋاغا چاقىرتىلغانلىقى ئەسكەرتىلدى.
بۇنىڭ ئەرمېنىيە ھاكىمىيىتىنىڭ ياۋروپا ئىتتىپاقى بىلەن يېقىنلىشىش يۆنىلىشىدە تاشلىغان قەدەملىرى بىلەن مۇناسىۋەتلىك ئىكەنلىكى قەيت قىلىنغان باياناتتا: «بۇ قەدەملەر ياۋروئاسىيا ئىقتىسادىي ئىتتىپاقى دائىرىسىدىكى ھەمكارلىققا زىيان يەتكۈزىدۇ» دېيىلدى.
رۇسىيە تاشقى ئىشلار مىنىستىرلىقىنىڭ باياناتچىسى مارىيا زاخاروۋا ئۆتكەن ھەپتە ئېلان قىلغان باياناتىدا، ئەرمېنىيەنىڭ ياۋروپا ئىتتىپاقى بىلەن يېقىنلىشىشىنىڭ ئىككى تەرەپلىك مۇناسىۋەتلەرنى ۋە ئىستراتېگىيەلىك شېرىكلىك مۇناسىۋىتىنى ئاجىزلاشتۇرغانلىقىنى بىلدۈرۈپ: «ئەرمېنىيە ھاكىمىيىتىنىڭ ياۋروپا ئىتتىپاقى بىلەن يېقىنلىشىش مۇساپىسى داۋاملىشىۋاتقان بىر پەيتتە، ياۋروئاسىيا ئىقتىسادىي ئىتتىپاقىدا تۇرۇش يۆنىلىشىدىكى پوزىتسىيەسىنى رۇسىيە قوبۇل قىلمايدۇ» دېگەن ئىدى.
رۇسىيە پىرېزىدېنتى ۋلادىمىر پۇتىنمۇ ئەرمېنىيە ياۋروپا ئىتتىپاقىغا ئەزا بولغان تەقدىردە، رۇسىيە بازىرىغا ئەۋەتىدىغان يېزا ئىگىلىك مەھسۇلاتلىرى ئۈچۈن ياۋروئاسىيا ئىقتىسادىي ئىتتىپاقى ئۆلچەملىرىنىڭ ئەمدى كۈچكە ئىگە بولمايدىغانلىقىنى بىلدۈرگەن ئىدى.
ئەرمېنىيەدىكى ۋەزىيەتنى ئۇكرائىناغا ئوخشاتقان پۇتىن: «ئۇكرائىنا كىرىزىسى بىر چاغلاردا ئۇكرائىنانىڭ ياۋروپا ئىتتىپاقىغا ئەزا بولۇش ئۇرۇنۇشلىرى بىلەن باشلانغان ئىدى» دېگەن ئىدى.
