ئامېرىكا قوشما ئىشتاتلىرى پىرېزىدېنتى دونالد ترامپ ئېھتىياج تۇغۇلغان تەقدىردە ئامېرىكا دېڭىز ئارمىيەسىنىڭ ھورمۇز بوغۇزىدىن ئۆتىدىغان نېفىت پاراخوتلىرىغا ياندىشىپ مېڭىپ، ئۇلارنى قوغداش ۋە پارس قولتۇقىدىن ئۆتىدىغان پاراخوتلار ئۈچۈن سۇغۇرتا كاپالىتى بېرىش توغرىسىدا يوليورۇق چۈشۈردى.

پىرېزىدېنت ترامپ ئۆزىنىڭ «Truth Social» سۇپىسىدىكى ئادرېسىدا ئېلان قىلغان ئۇچۇرىدا، ئامېرىكا خەلقئارا تەرەققىيات پۇل-مۇئامىلە ئىدارىسىنى مۇۋاپىق تەننەرخ بىلەن «سىياسىي خەتەر سۇغۇرتىسى ۋە كاپالىتى» بىلەن تەمىنلەشكە بۇيرۇغانلىقىنى بىلدۈردى.

ترامپ بۇ ھەقتە توختىلىپ: «بۇنىڭدىن كېيىن، بارلىق دېڭىز سودا پاراخوتلىرىنىڭ، بولۇپمۇ ئېنېرگىيە توشۇيدىغان پاراخوتلارنىڭ پارس قولتۇقىدىن ئۆتۈشىدىكى مالىيە بىخەتەرلىكىگە كاپالەتلىك قىلىش ئۈچۈن، ئامېرىكا تەرەققىيات پۇل-مۇئامىلە ئىدارىسىگە ئىنتايىن مۇۋاپىق باھادا سىياسىي خەتەر سۇغۇرتىسى ۋە كاپالىتى بېرىشنى بۇيرۇدۇم» دېدى. ئۇ يەنە بۇنىڭ قاپلاش دائىرىسىنىڭ بارلىق دېڭىز قاتنىشى لىنىيەلىرى ئۈچۈن كۈچكە ئىگە بولىدىغانلىقىنى سۆزلىرىگە ئىلاۋە قىلدى.

ترامپ سۆزىنى داۋاملاشتۇرۇپ: «زۆرۈر تېپىلسا، ئامېرىكا قوشما ئىشتاتلىرى دېڭىز ئارمىيەسى ئەڭ قىسقا ۋاقىت ئىچىدە ھورمۇز بوغۇزىدا نېفىت پاراخوتلىرىغا ياندىشىپ مېڭىشنى باشلايدۇ. نېمىلا بولمىسۇن، ئامېرىكا قوشما ئىشتاتلىرى ئېنېرگىيەنىڭ دۇنيادا ئەركىن ئايلىنىشىغا كاپالەتلىك قىلىدۇ» دېدى. ئۇ يەنە، ئامېرىكانىڭ ئىقتىسادىي ۋە ھەربىي كۈچىنىڭ «تەڭداشسىز» ئىكەنلىكىنى تەكىتلەپ، قوشۇمچە تەدبىرلەرنىڭمۇ يولغا قويۇلۇشى مۇمكىنلىكىنى ئەسكەرتتى.

بۇ باياناتلار، بۇ ھەپتە ئىراننىڭ يەر شارى ئېنېرگىيە تەمىناتى ئۈچۈن مۇھىم دېڭىز يولى ھېسابلانغان مەزكۇر بوغۇزدىن ئۆتىدىغان پاراخوتلارنى زەربە ئوبيېكتى قىلىدىغانلىقى ھەققىدىكى تەھدىتىدىن كېيىن ئوتتۇرىغا چىقتى. يېقىنقى كۈنلەردە رايوندا بەزى نېفىت پاراخوتلىرىنىڭ ھۇجۇمغا ئۇچرىغانلىقى خەۋەر قىلىنغانىدى.

يەنە بىر تەرەپتىن، «Skuld»، «Steamship Mutual» ۋە «North Standard» قاتارلىق بىر قىسىم دېڭىز سۇغۇرتا شىركەتلىرى خېرىدارلىرىغا ئۇقتۇرۇش چۈشۈرۈپ، ئەتراپتىكى دېڭىز تەۋەلىكىدە ئۇرۇش سەۋەبىدىن كېلىپ چىققان زىيانلارنى سۇغۇرتا قىلىشنى توختىتىدىغانلىقىنى بىلدۈرگەن ئىدى.

ھورمۇز بوغۇزى پارس قولتۇقىنى ئەرەب دېڭىزىغا تۇتاشتۇرىدىغان تار بىر دېڭىز ئۆتكىلى بولۇپ، دۇنيا نېفىت توشۇش ئىشلىرىدىكى ئەڭ مۇھىم لىنىيەلەرنىڭ بىرىدۇر. رايوندا كۈنسېرى ئېشىۋاتقان جىددىيچىلىك، سودا پاراخوتلىرىنىڭ بىخەتەرلىكى ۋە يەر شارى ئېنېرگىيە بازارلىرىغا كۆرسىتىدىغان يوشۇرۇن تەسىرى جەھەتتە خەلقئارا جەمئىيەتنىڭ ئەندىشىسىنى كۈچەيتمەكتە.