ئىران تاشقى ئىشلار مىنىستىرى ئابباس ئاراقچى «زەنگەزۇر كارىدورى» دەپمۇ بىلىنىدىغان «خەلقئارا تىنچلىق ۋە پاراۋانلىق ئۈچۈن ترامپ لىنىيەسى» (TRIPP) گە مۇناسىۋەتلىك باياناتىدا: «رايونىمىز ۋە ئەتراپىمىزدا ئامېرىكانىڭ قانداقتۇر بىر مەۋجۇتلۇق كۆرسىتىشىدىن ئەندىشە قىلىمىز» دېدى.
ئىران دۆلەتلىك تېلېۋىزىيەسىنىڭ خەۋىرىگە قارىغاندا، ئابباس ئاراقچى «ترامپ لىنىيەسى» توغرىسىدا توختىلىپ، بۇ مەسىلىگە نىسبەتەن ئىنتايىن سەزگۈر ئىكەنلىكلىرىنى ئەسكەرتكەن.
ئۇ بۇ مەسىلە ئۈستىدە ئەرمېنىيە بىلەن سۆھبەت ئۆتكۈزگەنلىكىنى ۋە ئەرمېنىيەنىڭ ئىراننىڭ بىخەتەرلىكىگە قارشى ھەرقانداق بىر قەدەم تاشلىمايدىغانلىقىنى بىلىدىغانلىقىنى ئىلگىرى سۈرگەن.
ئەزەربەيجان پىرېزىدېنتى ئىلھام ئەلىيېۋ بىلەن ئەرمېنىيە باش مىنىستىرى نىكول پاشىنيان، ئامېرىكا پىرېزىدېنتى دونالد ترامپنىڭ ساھىبخانىلىقىدا 8-ئاۋغۇست ئاقسارايدا ئۆتكۈزۈلگەن ئۈچ تەرەپ باشلىقلار يىغىنىدا، ئەزەربەيجاننىڭ ئاساسىي قۇرۇقلۇقى بىلەن ناخچىۋان ئاپتونوم جۇمھۇرىيىتى ئوتتۇرىسىدا توسالغۇسىز تۇتاشتۇرۇشنى ئىشقا ئاشۇرىدىغان بۇ لىنىيەنى (TRIPP) يولغا قويۇشنى قارار قىلغان ئىدى.
«زەنگەزۇر كارىدورى» دەپمۇ ئاتىلىدىغان مەزكۇر لىنىيە دائىرىسىدە تۆمۈريول، تاشيول، ئېنېرگىيە ۋە ئالاقە ئۇل ئەسلىھەلىرىنى بەرپا قىلىش نىشان قىلىنماقتا.
