تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان چارشەنبە كۈنى ئېلان قىلغان باياناتىدا، ئىسرائىلىيە ھۆكۈمىتىنىڭ ئىرانغا قارشى داۋاملىشىۋاتقان «قانۇنسىز ئۇرۇشنىڭ» بىرىنچى دەرىجىلىك جاۋابكارى ئىكەنلىكىنى ئېيتتى.
تۈركىيە رەھبىرى ئەردوغان پايتەخت ئەنقەرەدە ئادالەت ۋە تەرەققىيات پارتىيەسىنىڭ گۇرۇپپا يىغىنىدا سۆزلىگەن نۇتىقىدا: «رايونىمىزنى ئۇرۇش ئوتىغا ئىتتىرىپلا قالماي، پۈتكۈل ئىنسانىيەتنىڭ زىممىسىگە ناھايىتى ئېغىر ئىقتىسادىي يۈك يۈكلىگەن بۇ قانۇنسىز ئۇرۇشنىڭ بىرىنچى دەرىجىلىك جاۋابكارى توقۇنۇش، قالايمىقانچىلىق ۋە كىرىزىسقا خۇمار بولۇپ قالغان ئىسرائىلىيە ھۆكۈمىتىدۇر» دېدى.
ئەردوغان سۆزىنى داۋاملاشتۇرۇپ: «ئۇرۇشتا تۆكۈلگەن ھەر بىر تامچە قاننىڭ نېتانياھۇنىڭ سىياسىي ئۆمرۈنى ئۇزارتىدىغان بىر <ھاياتلىق سۈيى> بولىدىغانلىقىنى ئۇنتۇماسلىق كېرەك» دېدى.
ئۇ يەنە سۆزلىرىگە ئىلاۋە قىلىپ مۇنداق دېدى:
«ئەقىل-پاراسەتنىڭ غەلىبە قىلىشىنى، بۇنىڭ قان تۆكۈلمەستىن تىنچلىققا يول ئېچىشىنى ئۈمىد قىلىمىز. بىز بۇنىڭ ئۈچۈن قولىمىزدىن كېلىشىچە تىرىشچانلىق كۆرسىتىشنى ئىزچىل داۋاملاشتۇرىمىز.»
