تۈركىيە ھەمكارلىق ۋە ماسلاشتۇرۇش ئىدارىسى (تېكا – TİKA) بىلەن ساقچى باش ئىدارىسىنىڭ ھەمكارلىقىدا، ئېفىيوپىيەدىكى 20 ساقچىغا تور جىنايەتلىرىگە قارشى تۇرۇش بويىچە تەربىيە بېرىلدى.
تۈركىيە ھەمكارلىق ۋە ماسلاشتۇرۇش ئىدارىسى تەرىپىدىن ئېلان قىلغان باياناتقا ئاساسلانغاندا، «خەلقئارا ساقچىلارنى تەربىيەلەش ھەمكارلىق تۈرى» دائىرىسىدە ئېفىيوپىيەدە ئۆتكۈزۈلگەن بەش كۈنلۈك تەربىيەلەشنىڭ تاماملانغانلىقى بىلدۈرۈلدى.
پىروگراممىدا تور جىنايەتلىرىگە قارشى تۇرۇشقا مۇناسىۋەتلىك قانۇن-بەلگىلىمىلەر، جازا تەدبىرلىرى، جىنايەت تۈرلىرى ۋە بۇ جىنايەتلەرنى سادىر قىلىش ئۇسۇللىرى مۇزاكىرە قىلىندى.
مەزكۇر 20 ساقچىغا جىنايى ئىشلارنى تەكشۈرۈش جەريانىدا ئۇچۇر ۋە ھۆججەت توپلاش ھەمدە تەكشۈرۈش تېخنىكىسى بويىچە ئەمەلىي مىساللار ئاساسىدا تەربىيە بېرىلدى.
مەزكۇر تۈر دائىرىسىدە ئالدىنقى يىلى ئېفىيوپىيەدىكى 21 ساقچىغا ئاساسلىق تور تېخنىكىسى، تۈركىيەدە بولسا 12 ساقچىغا ئەدلىيەلىك تەسۋىر ھاسىل قىلىش بويىچە تەربىيە بېرىلگەن ئىدى.
تۈركىيە ھەمكارلىق ۋە ماسلاشتۇرۇش ئىدارىسىنىڭ ئەددىس - ئېبېيبە پىروگرامما ماسلاشتۇرۇش ئىشخانىسى 2005-يىلىدىن بۇيان ئېفىيوپىيەدە مائارىپ، سەھىيە، يېزا ئىگىلىك ۋە سۇ قاتارلىق ساھەلەردە 450 گە يېقىن تۈرنى ئەمەلگە ئاشۇردى.
