ئاۋسترالىيە مېدىيا شىركىتى (ABC) نىڭ خەۋىرىگە قارىغاندا، ئاۋسترالىيە ئۇكرائىنانىڭ رۇسىيەنى چېكىندۈرۈشىگە ياردەم بېرىش ئۈچۈن ئۇرۇشنىڭ زەربىسىگە ئۇچرىغان بۇ دۆلەتكە ئىشلىتىشتىن توختىتىلغان بىر تۈركۈم ئابرامىس تانكىلىرىنىڭ «يولغا چىققانلىقى»غا كاپالەت بەردى.
ABC نىڭ دۈشەنبە كۈنىدىكى خەۋىرىگە ئاساسلانغاندا، ئالبانىز ھۆكۈمىتى ئۆتكەن يىلى ئىشلىتىشتىن توختىتىلغان بىر تۈركۈم تانكىلارنى ئۇكرائىناغا ئىئانە قىلىشقا ۋەدە بەرگەن، ئەمما تانكىلار ئاۋسترالىيەدە تۇتۇپ قېلىنغان؛ مۇداپىئە ئەمەلدارلىرى كېچىكىشنىڭ قىسمەن ئامېرىكانىڭ قارشىلىقىدىن كېلىپ چىققانلىقىنى ئىلگىرى سۈرگەنىدى.
بۇ ھەربىي ماشىنىلار ئاخىرى ئۇرۇش مەيدانىغا قاراپ ئۇزۇن دېڭىز سەپىرىنى باشلىغان بولسىمۇ، ئامېرىكا ئەمەلدارلىرى ئاۋسترالىيەنىڭ ئۇكرائىناغا تانكىلارنى ئىئانە قىلىش قارارىدىن كۈچلۈك دەرىجىدە ئۈمىدسىزلەنگەنلىكىنى بىلدۈردى.
ABC نىڭ زىيارىتىنى قوبۇل قىلغان ۋە ئىسمىنى ئاشكارىلاشنى خالىمىغان بىر ئامېرىكا ئەمەلدارى مۇنداق دېگەن: «ئۆتكەن يىلى، دونالد ترامپ پىرېزىدېنت بولۇشتىن ئىلگىرىمۇ، بىز ئاۋسترالىيەلىكلەرنى بۇ ئابرامىس تانكىلىرىنى ئەۋەتىشنىڭ مۇرەككەپ ئاقىۋەتلەرنى كەلتۈرۈپ چىقىرىدىغانلىقىنى، ئۇرۇش مەيدانىغا يېتىپ بارغاندىن كېيىنمۇ ئۇكرائىنالىقلارنىڭ بۇلارنى ئىشلىتىش ۋە ئاسراشتا قىينىلىدىغانلىقى ھەققىدە ئاگاھلاندۇرغان ئىدۇق.»
ئالبانىز بىلەن زېلېنىسكىي ئوتتۇرىسىدىكى يېقىنقى سۆھبەتلەر، ئاۋسترالىيەنىڭ رۇسىيەگە بولغان بېسىمنى ئەڭ يۇقىرى چەككە يەتكۈزۈشكە قانداق ياردەم بېرەلەيدىغانلىقى مەسىلىسىگە مەركەزلەشتى.
رۇسىيەگە بېسىم ئىشلىتىش
ئاۋسترالىيە ئۇكرائىنانى تەخمىنەن 962 مىليون ئامېرىكا دوللىرى قىممىتىدە ياردەم بىلەن تەمىنلىدى.
ئالبانىز مۇخبىرلارغا تانكىلارنىڭ تاپشۇرۇش ۋاقىت جەدۋىلى ھەققىدىكى تەپسىلاتلارنى ئاشكارىلاشتىن ئۆزىنى قاچۇردى ۋە بۇنى ئاشكارىلاشنىڭ ئۇكرائىنانىڭ ئۇرۇش تىرىشچانلىقىغا زىيان يەتكۈزىدىغانلىقىنى ئىلگىرى سۈردى.
زېلېنىسكىي تانكىلارغا ئالاقىدار ئۇچۇرنى تاپشۇرۇپ ئالغاندىن كېيىن ئالبانىزغا مىننەتدارلىق بىلدۈردى ۋە ئاۋسترالىيەنىڭ ئۇكرائىنانىڭ رۇسىيە تاجاۋۇزچىلىقىغا قارشى تۇرۇشىغا ياردەم بېرىش يولىدىكى تىرىشچانلىقلىرىنى يۇقىرى باھا بەردى.
ئاۋسترالىيە ھازىرغا قەدەر تەخمىنەن 1400 رۇسىيەلىك شەخس، ئورۇن ۋە تەشكىلاتقا ئېمبارگو يۈرگۈزگەن بولسىمۇ، ئەمما زېلېنىسكىي كانبېررانىڭ تېخىمۇ كۆپ قەدەم تاشلىشىنى ئۈمىد قىلىدىغانلىقىنى بىلدۈردى.
ئالبانىز، ئاۋسترالىيەنىڭ «رۇسىيەگە بېسىم ئىشلىتىش ئۈچۈن نېمىلەرنى قىلالايدىغانلىقىنى مۇزاكىرە قىلىشنى داۋاملاشتۇرىدىغانلىقى»نىڭ سىگنالىنى بەردى.
ئالبانىز يەنە، ياۋروپا كومىتېتى رەئىسى ئۇرسۇلا ۋون دېر لېيېننىڭ ئاۋسترالىيە بىلەن بىرلىكتە يېڭى بىر بىخەتەرلىك ھەمكارلىقى تەكلىپىنى ئوتتۇرىغا سونغاندىن كېيىن، ياۋروپا ئىتتىپاقىنىڭ مۇداپىئە ھەمكارلىقىنى چوڭقۇرلاشتۇرۇش يۆنىلىشىدىكى تەشەببۇسلىرىغىمۇ ئېھتىياتچان مۇئامىلە قىلدى.
رومادا ۋون دېر لېيېن بىلەن كۆرۈشكەندىن كېيىن، ئاۋسترالىيەنىڭ بۇ پىكىرگە «مۇتلەق قىزىقىدىغانلىقى»نى،ئەمما ئۇنىڭ بۇ جەھەتتە «تولىمۇ باشلانغۇچ باسقۇچلاردا»ئىكەنلىكىنى ئېيتتى.
