«‹CNN Arabic› تېلېۋىزىيەسى» نىڭ خەۋىرىگە قارىغاندا، ئامېرىكا پىرېزىدېنتى دونالد ترامپ كېلەر ئايدا چىقىدىغان ئوتتۇرا شەرق ساياھىتى دائىرىسىدە تۈركىيەدىمۇ زىيارەتتە بولۇشنى پىلانلىماقتا ئىكەن.

ئاقساراينىڭ يۇقىرى دەرىجىلىك بىر ئەمەلدارىنىڭ پەيشەنبە كۈنى «‹CNN Arabic› تېلېۋىزىيەسى» گە بۇ ھەقتە بەرگەن باياناتىدا بىلدۈرۈشىچە، ھەمدە بۇ پىلاندىن خەۋەردار ئىككى مەنبەگە كۆرە، ترامپ سەئۇدى ئەرەبىستان، قاتار ۋە ئەرەب بىرلەشمە خەلىپىلىكىدىن كېيىن تۈركىيەدە زىيارەتتە بولىدىكەن.

مەزكۇر مەنبەلەرنىڭ بىلدۈرۈشىچە، بۇ ھەقتە تېخىچە ئېنىق بىر قارار چىقىرىلمىغان بولۇپ، پىلاننىڭ تەپسىلاتلىرى ھەققىدە خىزمەت ئىشلەنمەكتە ئىكەن.

 تۈركىيە – ئامېرىكا مۇناسىۋەتلىرى ناھايىتى ياخشى

 ئاقسارايدىن يۇقىرى دەرىجىلىك بىر ئەمەلدارنىڭ «‹CNN Arabic› تېلېۋىزىيەسى» گە بەرگەن باياناتىدا بىلدۈرۈشىچە، ترامپ يېقىندا جۇمھۇر رەئىس رەجەپ تاييىپ ئەردوغان بىلەن ئېلىپ بارغان تېلېفون سۆھبىتىدە، تۈركىيەدە زىيارەتتە بولۇش مەسىلىسى توغرۇلۇق سۆھبەتلەشكەن.

 مەنبەلەرگە كۆرە، ئامېرىكا پىرېزىدېنتى ترامپنىڭ ساياھىتى جەريانىدا ئىسرائىلىيەنى زىيارەت قىلىش پىلانى يوق ئىكەن.

ئاقساراي ئانادولۇ ئاگېنتلىقىنىڭ بۇ مەسىلە ھەققىدىكى مەلۇمات بېرىش تەلىپىگە تېخىچە جاۋاب قايتۇرمىدى.

ترامپ ئىلگىرى ئەردوغان بىلەن بولغان مۇناسىۋىتىنىڭ ناھايىتى ياخشى ئىكەنلىكى توغرىسىدىكى پىكىرلىرىنى ئوتتۇرىغا قويغانىدى. ترامپ بۇ ھەپتىنىڭ باشلىرىدا ئاقسارايدا ئىسرائىلىيە باش مىنىستىرى بېنيامىن نېتانياھۇ بىلەن بىرگە مۇخبىرلارنى كۈتۈۋېلىش يىغىنى ئۆتكۈزگەندە بەرگەن باياناتىدا: «تۈركىيە ۋە رەھبىرى ئەردوغان بىلەن بولغان مۇناسىۋىتىم ئادەتتىن تاشقىرى دەرىجىدە ناھايىتى ياخشى» دېگەنىدى.

پىرېزىدېنت ترامپ ئەردوغاننى «مىجەزى كەسكىن ۋە ناھايىتى ئەقىل پاراسەتلىك ئادەم، چۈنكى ئۇ ھېچكىم قىلالمىغان بىر ئىشنى قىلدى» دەپ تەرىپلىگەن، بۇ سۆزلىرى ئارقىلىق «بەششار ئەسەدنىڭ سۈرىيەدىكى ھاكىمىيىتىنىڭ ئاخىرلىشىنى تۈركىيە ئەمەلگە ئاشۇردى» دېگەن باياناتلىرىغا ئىشارەت قىلغانىدى.

ئەگەر بۇ زىيارەت ئەمەلگە ئاشسا، بۇ ترامپنىڭ پىرېزىدېنت بولغاندىن بۇيان تۈركىيەگە قىلغان تۇنجى زىيارىتى بولىدۇ.

ترامپتىن ئىلگىرىكى ئامېرىكانىڭ سابىق پىرېزىدېنتلىرىدىن جورج بۇش 2004-يىلى تۈركىيەدە زىيارەتتە بولغان، باراك ئوباما بولسا 2009 - ۋە 2015-يىللىرى تۈركىيەگە زىيارەتكە كەلگەنىدى.