«نىيۇيورك ۋاقىت گېزىتى»دە ئېلان قىلىنغان بىر دوكلاتقا قارىغاندا، ئىراننىڭ ئىككى يۇقىرى دەرىجىلىك ئەمەلدارى بىلەن ئامېرىكانىڭ بىر ئەمەلدارى مۇنداق دەپ كۆرسەتكەن: ئىران دۈشەنبە كۈنى يوللىغان رەسمىي جاۋابىدا ئىنتايىن قىسقا مۇددەتلىك، يەنى كۆپ بولغاندا بەش يىلغىچە ئوران قۇيۇلدۇرۇشنى توختىتىپ تۇرۇشنى تەكلىپ قىلغان.
ئامېرىكا ئەمەلدارى پىرېزىدېنت دونالد ترامپنىڭ ئىراننىڭ بۇ تەكلىپىنى رەت قىلىپ، بۇ مۇددەتنىڭ 20 يىل بولۇشى كېرەكلىكى پىكرىدە چىڭ تۇرغانلىقىنى بىلدۈرگەن. ۋاشىنگتون يەنە تېھراندىن يۇقىرى دەرىجىدە قويۇقلاندۇرۇلغان ئۇراننى ئۆز زېمىنىدىن چىقىرىۋېتىشنى تەلەپ قىلغان. خەۋەرگە قارىغاندا، ئىران بۇ تەلەپكە قارشى چىقىپ، ماتېرىيالنىڭ دۆلەت ئىچىدە ساقلاپ قېلىپ، ئۇنى قوراللارغا ئىشلىتىشكە ماس كەلمەيدىغان سەۋىيەگىچە سۇيۇلدۇرۇشنى تەكلىپ قىلغان. ئامېرىكا ئەمەلدارلىرى بولسا، ئىراننىڭ كەلگۈسىدە بۇ ماتېرىيالنى قايتىدىن قويۇقلاندۇرۇش ئىقتىدارىنى ساقلاپ قالىدىغانلىقى توغرىسىدىكى ئەندىشىلەرنىڭ داۋاملىشىۋاتقانلىقىنى ئوتتۇرىغا قويغان.
كېيىنكى نۆۋەتلىك يۈزتۇرا مۇزاكىرىلەرگە مۇناسىۋەتلىك سۆھبەتلەر داۋاملىشىۋاتقان بولۇپ، تېخىچە مۇئەييەن بىر ۋاقىت توغرىسىدا ئورتاق تونۇش ھاسىل قىلىنمىغان.
«چوڭ بىر كېلىشىم»
دۈشەنبە كۈنى «فوكس خەۋەرلىرى» رىياسەتچىسى برېت بايرنىڭ زىيارىتىنى قوبۇل قىلغان ئامېرىكا مۇئاۋىن پىرېزىدېنتى ج د ۋانىس ئىسلامئابادتىكى سۆھبەتلەردە ئىلگىرىلەش قولغا كەلتۈرۈلگەنلىكىنى، ئىران ئەمەلدىرلىرى بىلەن «بەزى ياخشى سۆھبەتلەر» نىڭ ئۆتكۈزۈلگەنلىكىنى ئېيتتى.
ۋانىس «توپنىڭ ئەمدى ئىراننىڭ مەيدانىدا» ئىكەنلىكىنى ئېيتىپ، ئەسلىي مەسىلىنىڭ تېھراننىڭ مۇساپىنى ئىلگىرى سۈرۈش ئۈچۈن يېتەرلىك تەدبىرلەرنى يولغا قويۇش ياكى قويماسلىقىدا ئىكەنلىكى دېگەنلەرنى بىلدۈردى. ئۇ ئىراننىڭ ئازراق بولسىمۇ پوزىتسىيەسىنى تەڭشەش خاھىشىنى نامايان قىلغانلىقىنى، ئەمما بۇنىڭ «يېتەرلىك دەرىجىدە ئىلگىرىلىمىگەنلىكى»نى قەيت قىلدى. سۆھبەتلەرنىڭ قايتىدىن باشلىنىش ئېھتىماللىقى ھەققىدە توختالغان ۋانس، بۇ سوئالنى «ئەڭ ياخشىسى ئىرانلىقلاردىن سوراش كېرەكلىكىنى» قەيت قىلدى.
ئۇ ھورمۇز بوغۇزى ھەققىدىكى بىر سوئالغا جاۋاب بېرىپ، بوغۇز مەسىلىسىنىڭ تۈزۈلۈش ئېھتىماللىقى بولغان ھەرقانداق بىر كېلىشىمنىڭ مەركىزىدىن ئورۇن ئالىدىغانلىقىنى ئېيتتى. «ھاسىل قىلىنىدىغان چوڭ بىر كېلىشىم» بارلىقىنى بىلدۈرگەن ۋانىس، ئەمما بۇنى ئىشقا ئاشۇرۇش مەسئۇلىيىتىنىڭ نۆۋەتتە ئىراندا ئىكەنلىكىنى تەكىتلىدى.
