ئامېرىكا قۇرۇلغانلىقىنىڭ 250 يىللىقى بولغان «4-ئىيۇل مۇستەقىللىق كۈنى»نى تەبرىكلەش پائالىيەتلىرى دائىرىسىدە ئۆتكۈزۈلگەن مۇراسىملارغا قاتنىشىش ئۈچۈن نىيۇ يوركقا كەلگەن تۈركىيە دېڭىز ئارمىيەسىگە تەۋە «TCG ئۇرۇچ رەئىس» پاراخوتى خۇدسون دەرياسىغا لەڭگەر تاشلاپ، تۈركىيەگە ۋەكىللىك قىلدى.
176 خادىمى بار بۇ پاراخوت خۇدسون دەرياسىدا توختاپ، 8-ئىيۇلغىچە نىيۇ يورك پورتىدا تۇرىدۇ.
«TCG ئۇرۇچ رەئىس»نىڭ پاراخوت باشلىقى، دېڭىز ئارمىيەسى سىتاپ پولكوۋنىكى كەمال ۋارلى ئانادولۇ ئاگېنتلىقىغا بەرگەن باياناتىدا، تۈركىيە دېڭىز ئارمىيەسىنىڭ «كۆك ۋەتەن»دىكى توسۇش ۋە ھەرىكەت كۈچىگە ۋەكىللىك قىلىدىغان ئەڭ مۇھىم ئۇرۇش پاراخوتلىرىدىن بىرى بولغان «TCG ئۇرۇچ رەئىس»نىڭ ئەڭ گەۋدىلىك ئالاھىدىلىكىنىڭ — يەرلىك ۋە مىللىي مۇداپىئە تېخنىكىلىرى بىلەن ئەتراپلىق زامانىۋىلاشتۇرۇلۇپ، كەلگۈسىنىڭ جەڭ ئېھتىياجىغا ماسلاشتۇرۇلغانلىقى ئىكەنلىكىنى تىلغا ئالدى.
پولكوۋنىك ۋارلى، «TCG ئۇرۇچ رەئىس»نى زامانىۋىلاشتۇرۇش خىزمىتىنىڭ 2025-يىلى مۇۋەپپەقىيەتلىك تاماملانغانلىقىنى تىلغا ئېلىپ مۇنداق دېدى: «زامانىۋىلاشتۇرۇش پائالىيىتى دائىرىسىدە، «TCG ئۇرۇچ رەئىس» ئىلغار جەڭ باشقۇرۇش سىستېمىسى، يېڭى ئەۋلاد رادارلار، ئېلېكترونلۇق ئۇرۇش ئىقتىدارى، سېنزورلار، ئالاقە ئۇل ئەسلىھەلىرى ۋە قوماندانلىق-كونترول سىستېمىلىرى بىلەن جابدۇلۇپ، دەۋرنىڭ تەلىپىگە ماس ھالدا قايتىدىن قۇرۇپ چىقىلدى».
پولكوۋنىك ۋارلى، ئامېرىكا قۇرۇلغانلىقىنىڭ 250 يىللىقىنى تەبرىكلەش پائالىيىتى دائىرىسىدە پىلانلانغان بۇ زىيارەتنىڭ تۈركىيەنىڭ ناتو /ىچىدىكى ئاكتىپ رولىنى ۋە خەلقئارا دېڭىز بىخەتەرلىكىگە قوشقان تۆھپىسىنى يەنە بىر قېتىم نامايان قىلغانلىقىنى بىلدۈردى.
مەزكۇر پائالىيەتكە 20 دىن ئارتۇق دۆلەت ئۆزلىرىنىڭ ھەربىي ۋە تارىخىي پاراخوتلىرى بىلەن قاتناشتى.
«TCG ئۇرۇچ رەئىس» 1997-يىلى تۈركىيە دېڭىز ئارمىيەسىنىڭ قورال-ياراغ تىزىملىكىگە كىرگۈزۈلگەن.
پاراخوتنىڭ 8-ئىيۇل كۈنى نىيۇ يوركتىن دۇبلىنغا قاراپ يولغا چىقىشى پىلانلانماقتا.
