ئىسرائىلىيە ئاخبارات ۋاسىتىلىرى ئىسرائىلىيەنىڭ راكېتامىيۇت ھۇجۇملىرىنىڭ ئالدىنى ئېلىش مەقسىتىدە لىۋاننىڭ جەنۇبىدىكى بىرىنچى يېزا لىنىيەسىنى بېسىۋېلىشنى پىلانلاۋاتقانلىقىنى خەۋەر قىلدى.

12-قانالنىڭ خەۋىرىدە، سىياسىي دائىرىلەرنىڭ لىۋاندىكى تانكىغا قارشى باشقۇرۇلىدىغان بومبىلار ئېتىلغان دەپ قارالغان ھەرقانداق رايوننى ئارمىيەنىڭ «كېيىنكى بۇيرۇققىچە» بېسىۋېلىشى توغرىسىدا يوليورۇق چۈشۈرۈشنى پىلانلىغانلىقى ئەسكەرتىلىپ مۇنداق دېيىلدى:

«ئىسرائىلىيە خەلققە تەھدىت سالىدىغان بارلىق رايونلارنى، بولۇپمۇ لىۋاننىڭ جەنۇبىدىكى بىرىنچى يېزا لىنىيەسىنى كونترول قىلىشنى نىشان قىلماقتا.»

خەۋەردە، بۇلارنىڭ قايسى يېزىلار ئىكەنلىكى ھەققىدە تەپسىلىي مەلۇمات بېرىلمىدى.

ئىسرائىلىيە ئارمىيەسى 2024-يىلى نويابىردىن باشلاپ يولغا قويۇلغان ئۇرۇش توختىتىش كېلىشىمىگە قارىماي، ھىزبۇللاھ بىلەن چېگرا ھالقىغان ھۇجۇملار يۈز بېرىۋاتقان يېقىنقى كۈنلەردە پۈتۈن لىۋاندا ھاۋا ھۇجۇملىرىنى قويۇقلاشتۇردى.

لىۋان دائىرىلىرىنىڭ بىلدۈرۈشىچە، 2-مارتتىن بۇيان ئىسرائىلىيەنىڭ ھۇجۇملىرىدا كەم دېگەندە 968 كىشى ھاياتىدىن ئايرىلغان، 2432 كىشى يارىلانغان.

نۆۋەتتىكى جىددىي ۋەزىيەت 28-فېۋرالدىن بۇيان تەخمىنەن 1300 كىشىنىڭ ئۆلۈمىنى كەلتۈرۈپ چىقارغان ئىرانغا قارىتىلغان ئامېرىكا-ئىسرائىلىيە بىرلەشمە ھەرىكىتىدىن كېيىن ئوتتۇرىغا چىققان.

تېھران ئىسرائىلىيەدىن باشقا يەنە ئىيوردانىيە، ئىراق ۋە پارس قولتۇقى دۆلەتلىرىنى نىشان قىلغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى بىلەن قايتۇرما زەربە بېرىۋاتقان بولۇپ، بۇ جەرياندا «ئامېرىكانىڭ ھەربىي مال-مۈلۈكلىرى» نى نىشان قىلغانلىقىنى ئىلگىرى سۈرمەكتە.