شىمالىي كورېيە چاچما بومبىلىق باللىستىك باشقۇرۇلىدىغان بومبىلارنى سىناق قىلدى
كىم جۇڭئۇن تاكتىكىلىق باشقۇرۇلىدىغان بومبىلارنىڭ ئەڭ ئاخىرقى قورال سىناقلىرى جەريانىدا ئاراللارغا جايلاشقان نىشانلارغا دەل تەگكەنلىكىدىن «زور خۇشاللىق» ھېس قىلغانلىقىنى بىلدۈردى.
شىمالىي كورېيە يېقىنقى مەزگىللەردە ئېلىپ بارغان سىناق تەرىقىسىدە ئوق چىقىرىش پائالىيەتلىرىنىڭ بىرىدە، نۇرغۇنلىغان قىسقا مۇساپىلىك باللىستىك باشقۇرۇلىدىغان بومبىلارنى سىناق قىلدى.
شىمالىي كورېيە رەھبىرى كىم جۇڭئۇننىڭ نازارىتى ئاستىدا يەكشەنبە كۈنى ئېلىپ بېرىلغان ئوق چىقىرىشلار، يېقىنقى ھەپتىلەردە ئېلىپ بېرىلغان پاراخوتقا قارشى چارلىغۇچى باشقۇرۇلىدىغان بومبىلار ۋە چاچما بومبىلارنى (cluster bombs) ئۆز ئىچىگە ئالغان باشقا قورال سىناقلىرىدىن كېيىن يۈز بەردى.
شىمالىي كورېيە دۆلەت خەۋەر ئاگېنتلىقى KCNA نىڭ خەۋىرىدە: «تەخمىنەن 136 كىلومېتىر يىراقلىقتىكى بىر ئارالنىڭ ئەتراپىدىكى نىشان رايونىغا قويۇپ بېرىلگەن بەش دانە تاكتىكىلىق باللىستىك باشقۇرۇلىدىغان بومبا، 12.5-13 گېكتارلىق بىر دائىرىگە ئىنتايىن يۇقىرى زىچلىقتا دەل نىشانغا تەگدى» دېيىلدى.
باياناتتا، سىناقنىڭ «ياخشىلانغان قۇرۇقلۇقتىن قۇرۇقلۇققا قويۇپ بېرىلىدىغان تاكتىكىلىق باللىستىك باشقۇرۇلىدىغان بومبا خۋاسوڭفو-11 را (Hwasongpho-11 Ra) نىڭ ئوق بېشى كۈچىگە باھا بېرىش» مەقسىتىدە ئېلىپ بېرىلغانلىقى ئۇقتۇرۇلدى.
كىم جۇڭئۇن چاچما بومبىلىق باللىستىك باشقۇرۇلىدىغان بومبىلارنى ئىشلىتىشنىڭ «مەلۇم بىر نىشان رايونىنى بېسىقتۇرۇش ئۈچۈن يۇقىرى زىچلىقتىكى زەربە بېرىش ئىقتىدارىنى ئاشۇرالايدىغانلىقىنى» تىلغا ئالدى.
يەنە ئىككى دانە قوغلىغۇچى پاراخوت
كىم جۇڭئۇن ئاپرېل ئېيىنىڭ بېشىدا، ئۆتكەن يىلى دېڭىزغا چۈشۈرۈلگەن ئىككى دانە 5000 توننىلىق قوغلىغۇچى پاراخوتنىڭ (destroyer) بىرى بولغان «چوي خيون» (Choe Hyon) دىن ئىستراتېگىيەلىك چارلىغۇچى باشقۇرۇلىدىغان بومبىلارنىڭ سىناق قىلىنىشىنى نازارەت قىلدى.
شىمالىي كورېيە ئۆز فىلوتىغا قوشۇش ئۈچۈن يەنە ئىككى دانە 5000 توننىلىق قوغلىغۇچى پاراخوت ياساۋاتىدۇ.
جەنۇبىي كورېيەلىك بىر پارلامېنت ئەزاسى، شىمالىي كورېيەنىڭ نامپو پورتىدا بىر قوغلىغۇچى پاراخوتنىڭ قۇرۇلۇشىنىڭ تېزلىتىلگەنلىكىنى ۋە «رۇسىيەدىن كەلگەن ھەربىي ياردەملەر سايىسىدا دېڭىز ئارمىيە كۈچلىرىنىڭ زامانىۋىلىشىشىنىڭ سۈرئىتى ئاشقانلىقىنى» ئېيتتى.
سېئۇل بۈگۈن باش ئىشتاب مەھكىمىسىنىڭ شەرق دېڭىزىغا قاراپ قويۇپ بېرىلگەن نۇرغۇن باشقۇرۇلىدىغان بومبىلارنى بايقايدىغانلىقىنى خەۋەر قىلدى.
باياناتتا: «باشقۇرۇلىدىغان بومبىلار تەخمىنەن 140 كىلومېتىر ئۇچتى» دېيىلدى ھەمدە جەنۇبىي كورېيە ۋە ئامېرىكا دائىرىلىرىنىڭ تەپسىلىي بىر ئانالىز ئېلىپ بېرىۋاتقانلىقى ئەسكەرتىلدى.
باياناتقا ئاساسلانغاندا، سېئۇل «قەتئىي ۋە بىرلىككە كەلگەن مۇداپىئە پوزىتسىيەسى» نى نامايان قىلماقتا ۋە «ھەر قانداق ئىغۋاگەرچىلىككە قايتۇرما زەربە بېرىدۇ» دېگەن.