ئامېرىكا جەنۇبىي قوماندانلىق ئىشتابى تىنچ ئوكياندا زەھەرلىك چېكىملىك توشۇۋاتقانلىقى ئىلگىرى سۈرۈلگەن بىر پاراخوتقا قىلىنغان ھۇجۇمدا تۆت نەپەر «زەھەرلىك چېكىملىك تېررورچىسى» نىڭ ئۆلتۈرۈلگەنلىكىنى جاكارلىدى.

ئامېرىكا جەنۇبىي قوماندانلىق ئىشتابى چارشەنبە كۈنى ئېلان قىلغان باياناتىدا، ئامېرىكا ئارمىيەسىنىڭ شەرقىي تىنچ ئوكياندا «زەھەرلىك چېكىملىك ئەتكەسچىلىكى پائالىيەتلىرى بىلەن شۇغۇللىنىۋاتقان» بىر «تېررورلۇق تەشكىلاتى تەرىپىدىن باشقۇرۇلىدىغان بىر پاراخوتقا ھالاكەتلىك ھۇجۇم قىلغانلىقى» نى بىلدۈردى.

باياناتتا: «جەمئىي تۆت نەپەر ئەر زەھەرلىك چېكىملىك تېررورچىسى ئۆلتۈرۈلدى، ھېچبىر ئامېرىكا ئەسكىرى زىيانغا ئۇچرىمىدى» دېيىلدى.

بۇ قېتىمقى ھۇجۇم بىلەن بىرلىكتە، ئامېرىكانىڭ كارىب دېڭىزى ۋە شەرقىي تىنچ ئوكياندىكى ھۇجۇملىرىدا ئۆلگەنلەرنىڭ سانى 99 غا يەتتى. ئامېرىكا سېنتەبىر ئېيىدىن بۇيان كارىب دېڭىزى ۋە شەرقىي تىنچ ئوكياندا زەھەرلىك چېكىملىك ئەتكەسچىلىكى بىلەن شۇغۇللىنىۋاتقانلىقى ئىلگىرى سۈرۈلگەن پاراخوتلارغا ھۇجۇم قىلماقتا.

ئامېرىكا پىرېزىدېنتى ترامپ ۋېنېزۇئېلا دېڭىز قىرغاقلىرىدا كەڭ كۆلەملىك ھەربىي ئورۇنلاشتۇرۇشلارنى ئېلىپ بېرىپ، بۇ ھەپتە كاراكاسقا بارىدىغان ۋە ئۇ يەردىن قايتىدىغان، شۇنداقلا نۆۋەتتە ئېمبارگو يۈرگۈزۈلۈۋاتقان نېفىت پاراخوتلىرى ئۈچۈن قامال ئېلان قىلدى.

بۇ ئۆزگىرىشلەر، ئامېرىكا ئېلىپ بېرىۋاتقان ھەربىي ھەرىكەتلەرنىڭ زەھەرلىك چېكىملىك ئەتكەسچىلىكىنىڭ ئالدىنى ئېلىشتىنمۇ بەكرەك ھاكىمىيەت ئۆزگەرتىشنى نىشان قىلىدىغانلىقىنى ئىلگىرى سۈرۈۋاتقان ۋېنېزۇئېلا پىرېزىدېنتى نىكولاس مادۇروغا بولغان بېسىمنى بارغانسېرى كۈچەيتمەكتە.