ئىتالىيە دۆلەت مۇداپىئە مىنىستىرى گۇيدو كروسېتتو چارشەنبە كۈنى غەززەگە قاراپ يولغا چىققان بىر فىلوتقا ياردەم بېرىش مەقسىتىدە ئىتالىيە دېڭىز ئارمىيەسىگە تەۋە بىر ھەربىي پاراخوتنى رايونغا ئەۋەتتى. تەشكىللىگۈچىلەر، فىلوتقا تەۋە بىر قانچە كېمىنىڭ گرېتسىيە دېڭىز تەۋەلىكىدە نۇرغۇن ئۇچقۇچىسىز ئايروپىلانلار تەرىپىدىن نىشانغا ئېلىنغانلىقىنى بىلدۈرگەن ئىدى.
كروسېتتو: «‹فىلۇتتىكى› ئىتالىيە پۇقرالىرىغا ياردەم بېرىش مەقسىتىدە باش مىنىستىر بىلەن كۆرۈشتۈم ۋە ئىتالىيە دېڭىز ئارمىيەسىنىڭ كۆپ مەقسەتلىك ‹فاسان› ناملىق ھەربىي پاراخوتىنىڭ دەرھال ئارىلىشىشىغا رۇخسەت قىلدىم. بۇ پاراخوت ‹بىخەتەر دېڭىز ھەرىكىتى› دائىرىسىدە كرىت ئارىلىنىڭ شىمالىدا سەپەر قىلىۋاتاتتى» دېدى.
مىنىستىر: «پاراخوت، يۈز بېرىش ئېھتىمالى بولغان قۇتقۇزۇش ھەرىكەتلىرى ئۈچۈن رايونغا قاراپ يولغا چىقتى» دەپ قوشۇمچە قىلدى.
كروسېتتو فىلوتقا «ھازىرچە كىملىكى ئېنىق بولمىغان جىنايەتچىلەر» تەرىپىدىن قىلىنغان «ئۇچقۇچىسىز ئايروپىلان ھۇجۇمى»نى «ئەڭ كۈچلۈك شەكىلدە ئەيىبلەيدىغانلىقىنى» ئىپادىلىدى.
ئىتالىيە تاشقى ئىشلار مىنىستىرى ئانتونىيو تاجانىمۇ ئىسرائىلىيەدىن «ئىتالىيە پۇقرالىرى، پارلامېنت ئەزالىرى ۋە ياۋروپا پارلامېنتى ئەزالىرى»نىڭ بىخەتەرلىكىگە كاپالەتلىك قىلىشنى تەلەپ قىلغانلىقىنى بىلدۈردى.
مىنىستىرلىق ئىسرائىلىيەگە «ئىسرائىلىيە قىسىملىرىغا تاپشۇرۇلغان ھەر قانداق ھەرىكەتنىڭ خەلقئارا قانۇنغا ۋە مۇتلەق ئېھتىياتچانلىق پرىنسىپىغا ئۇيغۇن ھالدا ئېلىپ بېرىلىشى كېرەكلىكىنى» ئالدىن ئۇقتۇرغانلىقىنى ئېلان قىلدى.
«مۇتلەق قوغداش»
«مىنىستىر تاجانى ئىتالىيەنىڭ تېل ئاۋىۋدىكى ئەلچىخانىسىدىن ئۇچۇر توپلاشنى تەلەپ قىلدى، شۇنداقلا ئىسرائىلىيە ھۆكۈمىتىگە پاراخوتتىكى خادىملارنىڭ مۇتلەق قوغدىلىشىغا كاپالەتلىك قىلىش تەلىپىنى قايتا يەتكۈزۈشنى ئېيتتى» دەپ قوشۇمچە قىلىندى.
دۇنياۋى سۇمۇد فىلوتى سەيشەنبە كېچىسى گرېتسىيە دېڭىز تەۋەلىكىدە سەپەر قىلىۋاتقاندا، فىلوتنىڭ ئەتراپىدا ئوندىن ئارتۇق پارتىلاش ئاڭلانغانلىقىنى ۋە پالۇبىغا چۈشكەن «كىملىكى ئېنىق بولمىغان جىسىملار» سەۋەبىدىن زىيانغا ئۇچرىغانلىقىنى خەۋەر قىلدى.
دۇنياۋى سۇمۇد فىلوتى بۇ ئاينىڭ بېشىدا بارسېلونادىن يولغا چىقىپ، غەززەگە قىلىنىۋاتقان ئىسرائىلىيە قورشاۋىنى بۇزۇپ تاشلاپ، رايونغا ياردەم يەتكۈزۈشنى نىشان قىلىدۇ.
فىلوت ھازىر كۆپىنچىسى كرىت ئارىلى دېڭىز تەۋەلىكىدە تۇرۇۋاتقان 51 پاراخوتتىن تەركىب تاپقان.
فىلوتقا قوشۇلۇشنى كۈتۈۋاتقان پاراخوتلار تۇنىستا يەنە ئىككى گۇمانلىق ئۇچقۇچىسىز ئايروپىلان ھۇجۇمىغا ئۇچرىغان ئىدى.
ئىيۇن ۋە ئىيۇل ئايلىرىدا پائالىيەتچىلەرنىڭ غەززەگە دېڭىز يولى بىلەن يېتىپ بېرىش ئۇرۇنۇشلىرىنى توسۇپ كەلگەن ئىسرائىلىيە دۈشەنبە كۈنى بايانات ئېلان قىلىپ، فىلوتنىڭ پەلەستىن زېمىنىغا يېتىپ كېلىشىگە يول قويمايدىغانلىقىنى بىلدۈرگەن ئىدى.
