ئەنگلىيە ھۆكۈمىتىنىڭ بىر ۋەزىرى ئەنگىلىيەنىڭ 2029-يىلى ئۆتكۈزۈلىدىغان ئومۇمىي سايلامدىن بۇرۇن پەلەستىن دۆلىتىنى ئېتىراپ قىلىدىغانلىقىنى جاكارلىدى.
دۈشەنبە كۈنى Sky News تېلېۋىزىيەسىنىڭ زىيارىتىنى قوبۇل قىلغان سودا ئىشلىرى ۋەزىرى جوناتھان رېينولدس، ۋەزىرلەرنىڭ پەلەستىن دۆلىتىنى ئېتىراپ قىلىشنى خالايدىغانلىقىنى ۋە بۇنى ئەمەلگە ئاشۇرىدىغانلىقىنى ئېيتتى.
رېينولدس بۇ قەدەمنىڭ ھازىرقى پارلامېنت مەزگىلىدە ئەمەلگە ئاشىدىغان-ئاشمايدىغانلىقى توغرىسىدىكى سوئالغا: «شۇنداق، ئەگەر بىز ئېھتىياجلىق بولغان قەدەمنى تاشلىيالىساق، بۇ ھازىرقى پارلامېنت مەزگىلىدىلا ئەمەلگە ئاشىدۇ» دەپ جاۋاب بەردى.
رېينولدس سۆزىگە ئىلاۋە قىلىپ مۇنداق دېدى:
«لېكىن شۇنى ئۇنتۇماڭ، بىز بۇنى پەقەت بىر قېتىملا قىلالايمىز. ئەگەر بۇ قەدەم سىمۋوللۇق شەكىلدە تاشلىنىپ، توقۇنۇشنى ئاخىرلاشتۇرمىسا، بىزنىڭ كېيىنكى قەدىمىمىز قانداق بولىدۇ؟»
رېينولدس غەززەنىڭ ئەھۋالىنىڭ ئىنتايىن قىيىن ئىكەنلىكىنى ئەسكەرتىپ مۇنداق دېدى:
«ھاۋادىن ياردەم بۇيۇملىرىنى تاشلاش ئارقىلىق تارقىتىش مەسىلىسىدە ئەمدى ساقلاپ تۇرالمايمىز، بىرەر ئىش قىلىشىمىز كېرەك. ھەممىمىز ئىنسانپەرۋەرلىك جەھەتتىكى يېتەرسىزلىكنى كۆرۈۋاتىمىز.»
بەزى خەۋەرلەرگە قارىغاندا، ئەنگىلىيە باش ۋەزىرى كېير ستارمېر ھۆكۈمەتنىڭ بىر قىسىم يۇقىرى دەرىجىلىك ئەزالىرىنىڭ پەلەستىن دۆلىتىنى دەرھال ئېتىراپ قىلىش ھەققىدىكى بېسىمىغا دۇچ كەلمەكتە ئىكەن.
ئەنگلىيە پارلامېنتى تاشقى مۇناسىۋەتلەر كومىتېتىمۇ يېقىندا ھۆكۈمەتنى، ئىسرائىلىيەلىكلەر ۋە پەلەستىنلىكلەر ئۈچۈن ئىككى دۆلەتلىك ھەل قىلىش چارىسى تېپىش تەييارلىقلىرى دائىرىسىدە، پەلەستىن دۆلىتىنى «دادىللىق ۋە قەتئىيلىك بىلەن» دەرھال ئېتىراپ قىلىشقا چاقىردى.
كومىتېت رەئىسى ئېمىلىي تورنبېرى بۇ ھەقتە ئېلان قىلغان باياناتىدا مۇنداق دېدى:
«كۆپ ساندىكى ئەنگىلىيە پۇقرالىرى ھۆكۈمەتنىڭ قەدىمىنىڭ داۋاملىق يېتەرسىز ۋە كېچىكىپ قېلىشىدىن چوڭقۇر ئۈمىدسىزلەندى.»
ستارمېرغا قىلىنىۋاتقان بېسىمنىڭ يەنە بىر ئىپادىسى شۇكى، 200 دىن ئارتۇق پارلامېنت ئەزاسى پارتىيەلەر ھالقىغان ھالدا پەلەستىن دۆلىتىنى ئېتىراپ قىلىشقا چاقىرىق قىلىنغان بىر مەكتۇپقا ئىمزا قويدى.
