بىرلەشكەن دۆلەتلەر تەشكىلاتى باش كاتىپىنىڭ قىبرىس ئارىلىنى زىيارەت قىلىشقا تەييارلىق قىلىۋاتقان پەيتىدە ئېلىپ بېرىلغان تېلېفون سۆھبىتىدە، ئىككى تەرەپ ئوتتۇرا شەرق ۋە شەرقىي ئاقدېڭىزدىكى نۆۋەتتىكى ئۆزگىرىشلەر ھەققىدە مۇزاكىرە ئېلىپ باردى.
تۈركىيە جۇمھۇرىيىتى تاشقى ئىشلار مىنىستىرى خاقان فىدان يەكشەنبە كۈنى بىرلەشكەن دۆلەتلەر تەشكىلاتى باش كاتىپى ئانتونىيو گۇتېررېس بىلەن تېلېفوندا كۆرۈشۈپ، رايونلۇق ئۆزگىرىشلەرنى مۇزاكىرە قىلدى.
تۈركىيە دىپلوماتىك مەنبەلىرىنىڭ بىلدۈرۈشىچە، خاقان فىدان بىلەن گۇتېررېس، بىرلەشكەن دۆلەتلەر تەشكىلاتى باش كاتىپىنىڭ سۈرىيە ۋە قىبرىس ئارىلىغا قىلىدىغان زىيارەتلىرى مۇناسىۋىتى بىلەن رايونلۇق ئۆزگىرىشلەرنى ئەتراپلىق مۇزاكىرە قىلغان.
بىرلەشكەن دۆلەتلەر تەشكىلاتى باش كاتىپى ئانتونىيو گۇتېررېس يەكشەنبە كۈنى ئىسرائىلىيەنىڭ سۈرىيەدىكى دەپسەندىچىلىكلىرىگە مۇناسىۋەتلىك تەپسىلىي دوكلاتنىڭ مۇشۇ ئاينىڭ كېيىنكى كۈنلىرىدە خەۋپسىزلىك كېڭىشىگە سۇنۇلىدىغانلىقىنى ئېيتتى.
بىرلەشكەن دۆلەتلەر تەشكىلاتى پەيشەنبە كۈنى باش كاتىپ ئانتونىيو گۇتېررېسنىڭ تىنچلىق مۇساپىسىنى ئىلگىرى سۈرۈش مەقسىتىدە قىبرىسقا بارىدىغانلىقىنى ئۇقتۇردى.
بىرلەشكەن دۆلەتلەر تەشكىلاتى باياناتچىسى ستېفان دۇجاررىك مۇخبىرلارنى كۈتۈۋېلىش يىغىنىدا: «باش كاتىپ ياخشى نىيەت ۋەزىپىسىنىڭ بىر قىسمى ۋە قىبرىس مەسىلىسىگە بولغان تەۋرەنمەس ساداقىتىنىڭ ئىپادىسى سۈپىتىدە 27-29-ئىيۇل كۈنلىرى قىبرىسقا بارىدۇ» دەپ بايانات بەردى.
گۇتېررېسنىڭ شىمالىي قىبرىس تۈرك جۇمھۇرىيىتى جۇمھۇر رەئىسى تۇفان ئەرھۈرمان ۋە جەنۇبىي قىبرىس رۇم ھاكىمىيىتى رەھبىرى نىكوس خرىستودۇلىدىس بىلەن كۆرۈشىدىغانلىقىنى ئەسكەرتكەن دۇجاررىك، باش كاتىپنىڭ يەنە باشقا ئالاقىدار تەرەپلەر بىلەن بىر يەرگە جەم بولۇپ، بىرلەشكەن دۆلەتلەر تەشكىلاتىنىڭ قىبرىستا تۇرۇشلۇق تىنچلىق ساقلاش قىسمى (UNFICYP) نىڭ نەق مەيداندىكى خىزمەتلىرىنىمۇ ئۆز ئىچىگە ئالغان تىنچلىق مۇساپىسىنى ئىلگىرى سۈرۈش تىرىشچانلىقلىرىنى ۋە ئارالدىكى مۇقىملىقنى قوللاش تەشەببۇسلىرىنى مۇزاكىرە قىلىدىغانلىقىنى بىلدۈردى.
