توم بارراك تۈرك ھاۋا يوللىرىنىڭ بوئىڭ ئايروپىلانلىرى سېتىۋېلىش كېلىشىمى «تاماملاندى» دېدى. بۇ تەرەققىيات ئامېرىكا ئايروپىلان ئىشلەپچىقارغۇچى شىركىتى بوئىڭ بىلەن تۈركىيە ھاۋا يوللىرى شىركىتى ئوتتۇرىسىدا مۇھىم بىر كېلىشىم بولۇشى مۇمكىنلىكىنى دەلىللەيدىغان بىر بايانات بولدى.

توم بارراك ئاقساراي سىرتىدا سودىنىڭ تاماملىنىپ – تاماملىنىمىغانلىقىنى سۈرۈشتۈرگەن گېزىتچىلەرگە: «كېلىشىم تامام» دېدى، ئەمما تېخىمۇ كۆپ تەپسىلات بەرمىدى.

بارراكنىڭ باياناتلىرى تۈركىيە جۇمھۇر رەئىسى رەجەپ تاييىپ ئەردوغان بىلەن ئامېرىكا پىرېزىدېنتى دونالد ترامپنىڭ سۆھبىتىدىن كېيىن ئېلان قىلىندى.

تۈرك ھاۋا يوللىرى ئۆتكەن ھەپتە بوئىڭ بىلەن بېرىلگۈسى زاكاز توغرىسىدىكى سۆھبەتلەرنىڭ داۋاملىشىۋاتقانلىقىنى ئېلان قىلغانىدى.

تۈرك ھاۋا يوللىرى ئۇچۇر – ئالاقە ئىشلىرى بۆلۈمىنىڭ يۇقىرى دەرىجىلىك ئەمەلدارى يەھيا ئۈستۈن ئۆتكەن ھەپتە بۇ توغرىدا: «بۇ، ئۇزۇن ۋاقىتتىن بۇيان بوئىڭ بىلەن سۆھبەتلەر داۋاملىشىۋاتقان بىر تېما، ئەمما تېخى بىر كەسكىن قارار چىقىرىلمىدى» دېگەنىدى.

بوئىڭ ياكى تۈرك ھاۋا يوللىرى بارراكنىڭ باياناتلىرىغا قارىتا ئاشكارا ئىنكاس بىلدۈرمىدى.

تۈرك ھاۋا يوللىرىنىڭ كېڭىيىش ئىستراتېگىيەسى

تۈرك ھاۋا يوللىرى بىلەن بوئىڭ ئۆتكەن يىلى تۈرك ھاۋا يوللىرىنىڭ يەرشارى ھاۋا يۈك بازىرىدىكى ئورنىنى كۈچەيتىش ئۈچۈن تۆت دانە 777 يۈك ئايروپىلانى زاكاز قىلىش توغرىسىدا كېلىشىم ھاسىل قىلغانىدى.

بۇ كېلىشىم تۈرك ھاۋا يوللىرىنىڭ كېڭىيىش ئىستراتېگىيەسىگە ماس كېلىدۇ؛ بۇ ئىستراتېگىيە، تۈرك ھاۋا يوللىرىنىڭ ئېشىۋاتقان مەنزىل تورى ئۈچۈن يۈك ۋە يولۇچى توشۇش ئىقتىدارىنى ئاشۇرۇشىنى ئۆز ئىچىگە ئالىدۇ.

يەنە بىر تۈرك ھاۋا يولى شىركىتى بولغان پېگاسۇس (Pegasus) ئۆتكەن يىلى 200 بوئىڭ ئايروپىلانى ئۈچۈن زاكاز بېرىدىغانلىقىنى ئېلان قىلغانىدى. بۇمۇ تۈركىيە ئاۋىياتسىيە بازىرىنىڭ ئامېرىكا ئايروپىلان ئىشلەپچىقارغۇچىسى بوئىڭ ئۈچۈن مۇھىملىقىنى كۆرسىتىدۇ.

بوئىڭ ياۋروپالىق رەقىبى ئايربۇس (Airbus) بىلەن بولغان رىقابەتنى داۋاملاشتۇرۇش بىلەن بىرگە، يېڭى توختام تۈزۈش ئۈچۈن تىرىشماقتا.

ئىستانبۇل ئايرودۇرۇمىنىڭ مۇھىم بىر يەرشارى مەركىزى سۈپىتىدە خىزمەت قىلىشى بىلەن  تۈركىيەنىڭ كېڭىيىۋاتقان ئاۋىياتسىيە ساھەسى ھەر ئىككى شىركەت ئۈچۈن مۇھىم نۇقتا بولۇپ قالدى.

بارراكنىڭ ئاغزاكى تەستىقلىشى، تاماملىنىشقا يۈزلەنگەن بىر كېلىشىمنى كۆرسىتىپ بېرىدىغاندەك قىلسىمۇ، زاكازنىڭ چوڭلۇقى ۋە يەتكۈزۈش ۋاقتى توغرىسىدىكى ئېنىقسىزلىك داۋام قىلماقتا.

ساھە مۇتەخەسسىسلىرى تۈرك ھاۋا يوللىرىنىڭ بوئىڭ بىلەن تۈزۈلىدىغان ھەر قانداق يېڭى كېلىشىمنىڭ، ئېشىۋاتقان ئېھتىياجنى قاندۇرۇش ئۈچۈن ئۇزۇن مۇساپىلىك يولۇچى ئايروپىلانلىرىنى ۋە قوشۇمچە يۈك ئايروپىلانلىرىنى ئۆز ئىچىگە ئالىدىغانلىقىنى ئوتتۇرىغا قويماقتا.

ئەردوغان بىلەن ترامپنىڭ ئۇچرىشىشىدا بوئىڭ سۆھبەتلىرى تىلغا ئېلىنمىغان بولسىمۇ، تېخىمۇ كەڭ ئىقتىسادىي ۋە بىخەتەرلىك مەسىلىلىرىنى ئۆز ئىچىگە ئالدى.

ئەمما بارراكنىڭ تەستىقلىشى، كېلىشىمنىڭ ھەم ئامېرىكا – تۈركىيە مۇناسىۋەتلىرى ھەم يەرشارى ئاۋىياتسىيە بازىرىنىڭ يوشۇرۇن ئەھمىيىتىنى گەۋدىلەندۈردى.