تۈركىيە جۇمھۇرىيىتى دۆلەت مۇداپىئە مىنىستىرلىقى بايانات ئېلان قىلىپ، ئىراندىن قويۇپ بېرىلگەن، ئىراق ۋە سۈرىيە ھاۋا تەۋەلىكىدىن ھالقىپ ئۆتكەندىن كېيىن تۈركىيە ھاۋا تەۋەلىكىگە يۈزلەنگەنلىكى بايقالغان بىر دانە باللىستىك باشقۇرۇلىدىغان بومبىنىڭ، شەرقىي ئاقدېڭىزغا ئورۇنلاشتۇرۇلغان ناتو ھاۋا ۋە باشقۇرۇلىدىغان بومبا مۇداپىئە قىسىملىرى تەرىپىدىن دەل ۋاقتىدا بىر تەرەپ قىلىنغانلىقىنى بىلدۈردى.
خاتايدىكى پارچىلار ھاۋا مۇداپىئە سىستېمىسىغا تەۋە
مەزكۇر تەھدىت ھاۋادا يوقىتىلغاندىن كېيىن، خاتاينىڭ دۆرتيول ناھىيەسىگە چۈشكەن پارچىلار توغرىسىدا ئۇچۇار بېرىلگەن باياناتتا: «خاتاي ۋىلايىتىنىڭ دۆرتيول ناھىيەسىگە چۈشكەن پارچىلارنىڭ، مەزكۇر تەھدىتنى ھاۋادا توسۇپ قالغان ھاۋا مۇداپىئە سىستېمىسىغا تەۋە ئىكەنلىكى ئېنىقلاندى. ۋەقەدە ئادەم ئۆلۈش ياكى يارىلىنىش ئەھۋالى كۆرۈلمىدى» دېيىلدى
«تەھدىت قەيەردىن كەلسە كەلسۇن، قەتئىي قايتۇرما زەربە بېرىلىدۇ»
تۈركىيەنىڭ رايون خاراكتېرلىك مۇقىملىق ۋە تىنچلىقنى ياقىلايدىغانلىقى تەكىتلەنگەن باياناتتا، دۆلەتنىڭ زېمىن پۈتۈنلۈكى ۋە پۇقرالارنىڭ بىخەتەرلىكىنى قوغداش جەھەتتىكى ئىرادىسى ۋە ئىقتىدارىنىڭ ئەڭ يۇقىرى سەۋىيەدە ئىكەنلىكى ئالاھىدە تىلغا ئېلىندى.
باياناتتا يەنە مۇنداق دەپ كۆرسىتىلدى: «كىمدىن ۋە قەيەردىن كېلىشىدىن قەتئىينەزەر، زېمىنىمىز ۋە پۇقرالىرىمىزنىڭ بىخەتەرلىكىنى قوغداشقا تولۇق قادىرمىز. ھاۋا تەۋەلىكىمىزنى قوغداشقا قارىتىلغان ھەرقانداق قەدەم قەتئىيلىك بىلەن، ئىككىلەنمەستىن تاشلىنىدۇ. دۆلىتىمىزگە قارىتىلغان ھەرقانداق دۈشمەنلەرچە پوزىتسىيەگە قارشى تېگىشلىك جاۋاب قايتۇرۇش ھوقۇقىمىزنىڭ ساقلىنىپ قالىدىغانلىقىنى ئەسلىتىپ ئۆتىمىز.»
رايون خاراكتېرلىك توقۇنۇش ئاگاھلاندۇرۇشى
بارلىق تەرەپلەرنى توقۇنۇشلارنىڭ كېڭىيىپ كېتىشىگە سەۋەب بولىدىغان ھەرىكەتلەردىن يىراق تۇرۇشقا چاقىرغان مىنىستىرلىق، بۇ دائىرىدە ناتو ۋە باشقا ئىتتىپاقداشلار بىلەن بولغان مەسلىھەتلىشىشلەرنىڭ داۋاملىشىدىغانلىقىنى قەيت قىلدى.
تاشقى ئىشلار مىنىستىرى خاقان فىدان ئىرانلىق كەسپىدىشى بىلەن تېلېفونلاشتى
دىپلوماتىك مەنبەلەردىن ئىگىلەنگەن ئۇچۇرلارغا قارىغاندا، تاشقى ئىشلار مىنىستىرى خاقان فىدان ئىران تاشقى ئىشلار مىنىستىرى ئابباس ئاراقچى بىلەن تېلېفوندا سۆھبەتلەشكەن. مىنىستىر فىدان سۆھبەتتە، ئىراندىن قويۇپ بېرىلگەندىن كېيىن تۈركىيە ھاۋا تەۋەلىكىگە يۈزلەنگەنلىكى بايقالغان ۋە ھاۋادا يوقىتىلغان باللىستىك بومبىغا قارىتا تۈركىيەنىڭ ئىنكاسىنى بىۋاسىتە يەتكۈزگەن.
رايوندىكى جىددىيچىلىككە ئىشارەت قىلغان فىدان، ۋەزىيەتنىڭ تېخىمۇ يامانلىشىپ كېتىشىگە سەۋەب بولىدىغان قەدەملەردىن ساقلىنىشنىڭ زۆرۈرلۈكىنى تەكىتلىگەن.
