تۈركىيە بىرازىلىيە بىلەن تۈزگەن مۇداپىئە سانائىتى ھەمكارلىق كېلىشىمىنى تەستىقلاپ، ئىككى دۆلەتنىڭ مۇداپىئە ئورگانلىرى ۋە شىركەتلىرى ئوتتۇرىسىدىكى ھەمكارلىقنى تېخىمۇ چوڭقۇرلاشتۇرۇشقا يول ئاچتى.
كېلىشىمنى ۋە مۇناسىۋەتلىك دىپلوماتىك خاتىرىلەرنى تەستىقلىغان جۇمھۇر رەئىسلىك قارارى جۈمە كۈنى رەسمىي گېزىتتە ئېلان قىلىندى. 2022-يىلى 25-مارت كۈنى ئىمزالانغان بۇ كېلىشىم، مۇداپىئە مەھسۇلاتلىرى ۋە مۇلازىمەتلىرىنى تەتقىق قىلىپ تەرەققىي قىلدۇرۇش، ئىشلەپچىقىرىش، سېتىۋېلىش ۋە ئاسراش جەھەتتە ھەمكارلىشىش ئارقىلىق، ھەر ئىككى دۆلەتنىڭ مۇداپىئە ئىقتىدارىنى كۈچەيتىشنى مەقسەت قىلىدۇ.
كېلىشىم يەنە مۇداپىئە ھەمكارلىقى دائىرىسىدىكى تېخنولوگىيەلىك ۋە ئەشيا ئوبوروتى جەھەتتىكى قوللاشلارنىمۇ ئۆز ئىچىگە ئالىدۇ. بۇ كېلىشىم تۈركىيە ۋە بىرازىلىيەدىكى ئاممىۋى ئورگانلار بىلەن مۇداپىئە شىركەتلىرى ئوتتۇرىسىدىكى ھەمكارلىق ئۈچۈن قانۇنىي ئاساس تۇرغۇزىدۇ. ئورتاق مۇداپىئە لايىھەلىرى، ئورتاق ئىشلەپچىقىرىش، تېخنولوگىيە ئالماشتۇرۇش ۋە ئۆزئارا تەمىنلەش قاتارلىقلار يوشۇرۇن ھەمكارلىق ساھەلىرى قاتارىدىن ئورۇن ئالىدۇ.
تۈركىيە بۈيۈك مىللەت مەجلىسى (پارلامېنتى) كېلىشىمنى 23-ئىيۇن كۈنى تەستىقلىغان بولۇپ، ئاخىرقى تەستىق ئۈچۈن جۇمھۇر رەئىس رەجەپ تاييىپ ئەردوغانغا سۇنۇلغان ئىدى. بىرازىلىيە تەرەپ بولسا ئۆز ئىچكى تەستىق رەسمىيەتلىرىنى تاماملاپ، كېلىشىمنى 10-سېنتەبىر كۈنى ئۆزلىرىنىڭ رەسمىي گېزىتىدە ئېلان قىلغان ئىدى. جۇمھۇر رەئىسلىك قارارى پەيشەنبە كۈنى ئىمزالاندى ۋە رەسمىي گېزىتنىڭ جۈمە كۈنىدىكى سانىدا ئېلان قىلىنىپ يولغا قويۇلدى.
