فىرانسىيە ئاگېنتلىقىنىڭ (AFP) چارشەنبە (2026-يىلى 6-ماي) كۈنى قولغا چۈشۈرگەن بىر ھۆججىتىگە ئاساسلانغاندا، شىمالىي كورېيە ئاساسىي قانۇنىدىن جەنۇبىي كورېيە بىلەن بىرلىشىشكە ئائىت بارلىق مەزمۇنلارنى چىقىرىۋەتكەن. بۇ ھەرىكەت پىيوڭياڭنىڭ سېئۇلغا قارىتا تېخىمۇ دۈشمەنلىك سىياسىتىنى يولغا قويۇشقا ئۇرۇنۇۋاتقانلىقى دەپ قارالدى.

جەنۇبىي كورېيە بىرلىشىش مىنىستىرلىقى ئۆتكۈزگەن ئاخبارات ئېلان قىلىش يىغىنىدا كۆرسىتىلگەن شىمالىي كورېيە ئاساسىي قانۇنىنىڭ ئەڭ يېڭى نۇسخىسىدا، شىمالىي كورېيەنىڭ مەقسىتى «ئانا ۋەتەننىڭ بىرلىكىنى ئەمەلگە ئاشۇرۇش» دېيىلگەن ماددا ئەمدى كۆرۈنمەيدۇ.

بۇ ئەھۋال، شىمالىي كورېيە رەھبىرى كىم جوڭئۇن مارت ئېيىدىكى سىياسىي نۇتقىدا سېئۇلنى «ئەڭ دۈشمەن دۆلەت» دەپ ئاتىغاندىن كېيىن ئوتتۇرىغا چىقتى. ھۆججەتتە مارت ئېيىدا يولغا قويۇلغانلىقى كۆرسىتىلگەن تۈزىتىش كىرگۈزۈلگەن ئاساسىي قانۇنغا يەنە، شىمالىي كورېيەنىڭ زېمىن چىگراسىنى ئېنىق بەلگىلەيدىغان يېڭى بىر ماددا قوشۇلغان. ئۇنىڭدا،  جەنۇبىي كورېيەنىڭ رەسمىي نامى تىلغا ئېلىنىپ تۇرۇپ، شىمالىي كورېيە زېمىنىنىڭ شىمالدا خىتاي ۋە رۇسىيە، «جەنۇبتا بولسا، كورېيە جۇمھۇرىيىتى» بىلەن چېگرالىنىدىغانلىقى ئەسكەرتىلگەن.

شىمالىي كورېيە يېڭى ئاساسىي قانۇنىدا، «ئۆز زېمىنىغا قىلىنغان ھەر قانداق دەخلى-تەرزگە مۇتلەق يول قويمايدىغانلىقى» نى ئەسكەرتكەن.

جەنۇبىي كورېيەنىڭ تىنچلىقپەرۋەر پىرېزىدېنتى لى جەيميوڭ (Lee Jae-myung) ئىككى دۆلەتنىڭ «تىنچلىق گۈللىرىنى ئېچىلدۇرۇش» تەقدىرىگە ئىگە ئىكەنلىكىنى ئېيتىپ، شىمالنى شەرتسىز سۆھبەتلىشىشكە چاقىرغان.

بىراق،  شىمالىي كورېيە لى ھۆكۈمىتىنىڭ بۇ چاقىرقلىرىغا جاۋاب قايتۇرمىدى ۋە جەنۇبنى قايتا-قايتا ئۆزىنىڭ «ئەڭ دۈشمەن» رەقىبى دەپ ئاتىدى.

كىم جوڭئۇن يادرو قورال كۈچىنى ئاشۇرۇشقا ۋەدە بەردى، پىيوڭياڭ ئاپرېل ئېيىدا تۆت قېتىم باشقۇرۇلىدىغان بومبا سىنىقى قىلدى. بۇ ئىككى يىلدىن كۆپرەك ۋاقىتتىن بۇيان بىر ئاي ئىچىدە قىلىنغان ئەڭ كۆپ باشقۇرۇلىدىغان بومبا سىنىقى بولۇپ ھېسابلىنىدۇ.

پىيوڭياڭ يەنە رۇسىيە بىلەن تېخىمۇ يېقىنلىشىپ، ئۇكرائىنادىكى ئۇرۇشنى قوللاش ئۈچۈن ئەسكەر ئەۋەتتى ۋە زەمبىرەك ئوقلىرى بىلەن تەمىنلىدى.

مۇناسىۋەتلىك ئۇچۇرلارTRT World - North Korea test-fires cluster-bomb ballistic missiles

/