ئامېرىكا بىلەن ئىران ئوتتۇرىسىدا پاكىستاننىڭ پايتەختى ئىسلامئابادتا ئىمزالانغان رامكا كېلىشىمىدىن بۇيان 60 كۈن ئۆتتى.

ئىران دۆلەت تېلېۋىزىيەسىنىڭ خەۋەر قىلىشىچە، تاشقى ئىشلار مىنىستىرلىقىنىڭ باياناتچىسى ئىسمائىل بەقائى ھەپتىلىك ئاخبارات ئېلان قىلىش يىغىنىدا مۇخبىرلارنىڭ سوئاللىرىغا جاۋاب بەرگەن. بەقائى كېلىشىم تېكىستىدە «60 كۈنلۈك مۆھلەت» دېگەن نامدا ھېچقانداق بەلگىلىمىنىڭ يوقلۇقىنى، ئىراننىڭ ئۆز سىياسەتلىرىنى بېسىم، ئۇلتېماتۇم (ئاخىرقى ئاگاھلاندۇرۇش) ياكى ۋاقىت چەكلىمىسى ئاستىدا بېكىتمەيدىغانلىقىنى تەكىتلىگەن.

باياناتچى يەنە، كېلىشىمدە كۆزدە تۇتۇلغان 60 كۈنلۈك مۇددەتنىڭ بىر ئۇلتېماتۇم ئەمەسلىكىنى، بەلكى ئېمبارگونى بىكار قىلىش ۋە يادرو پائالىيەتلىرىدىن ئىبارەت ئىككى تېما ئاستىدا ئېلىپ بېرىلىدىغان سۆھبەتلەر ئۈچۈن بېكىتىلگەن بىر ۋاقىت ئارىلىقى ئىكەنلىكىنى چۈشەندۈردى. ئۇنىڭ ئېيتىشىچە، كېلىشىم ئىمزالىنىپ بىر قانچە ھەپتە ئۆتمەيلا ئامېرىكا كېلىشىم تېكىستىگە ئاشكارا خىلاپلىق قىلغان. شۇ سەۋەبتىن سۆھبەتلەر باشلانمىغان ۋە بۇ 60 كۈنلۈك مۇددەتمۇ ئىناۋىتىنى يوقاتقان.

نۆۋەتتە تېھران ھۆكۈمىتى ئامېرىكا بىلەن بولىدىغان سۆھبەتنى قايتا باشلاش ئۈچۈن بىر قىسىم شەرتلەرنى ئوتتۇرىغا قويماقتا. شۇنىڭ بىلەن بىر ۋاقىتتا، ۋاشىنگتوننىڭ ئىرانغا قاراتقان يېڭى ئىقتىسادىي تەدبىرلىرى ۋە ھورمۇز بوغۇزىدا كۆرۈلگەن كىرىزىس يەنىلا كۈنتەرتىپتىكى قىزىق نۇقتا بولۇشنى داۋاملاشتۇرماقتا.