ترامپ ئۇكرائىنا ئۇرۇشى ۋە ئىسرائىلىيەنىڭ غەززەگە قاراتقان ئۇرۇشىنىڭ، ئەگەر ئۆزى ۋەزىپىدە تۇرغان مەزگىل بولغان بولسا يۈز بەرمەيدىغانلىقىنى ئىلگىرى سۈرگەن ئىدى.
ئامېرىكا قوشما ئىشتاتلىرىنىڭ سابىق پىرېزىدېنتى دونالد ترامپ ئۆتكەن يىلى ئۆتكۈزۈلگەن خۇسۇسىي ئىئانە توپلاش پائالىيەتلىرىدە موسكۋا ۋە بېيجىڭنى بومباردىمان قىلىش بىلەن تەھدىت سالغانلىقىنى ئېيتتى.
CNN تەرىپىدىن ئاشكارىلانغان ئۈن لېنتىسىغا ئاساسلانغاندا، ترامپ بۇ تەھدىتلەرنى رۇسىيە ۋە خىتاينىڭ ئۇكرائىنا ۋە تەيۋەنگە ھۇجۇم قىلىشىنىڭ ئالدىنى ئېلىش مەقسىتىدە ئوتتۇرىغا قويغان.
بۇ باياناتلارنىڭ ترامپنىڭ 2024-يىللىق پىرېزىدېنتلىق سايلام پائالىيىتى دائىرىسىدە نىيۇ يورك ۋە فلورىدادا ئۆتكۈزۈلگەن يېپىق ئىئانە توپلاش يىغىنلىرىدا ئېيتىلغانلىقى خەۋەر قىلىندى.
ئۈن لېنتىسىدا ترامپ رۇسىيە پىرېزىدېنتى ۋلادىمىر پۇتىننى ئۇكرائىناغا «كىرمەسلىك» كە ئاگاھلاندۇرغانلىقىنى ۋە موسكۋانى ۋەيران قىلىش بىلەن تەھدىت سالغانلىقىنى ئېيتقان.
ترامپنىڭ ئۈن لېنتىسىدا: «مەن پۇتىنغا: ‹ئەگەر سەن ئۇكرائىناغا كىرسەڭ، مەن موسكۋانى ۋەيران قىلىمەن. باشقا تاللىشىم يوق› دېدىم. ئۇ ماڭا ئىشەنمىدى، ئەمما مېنىڭچە ئۇ %10 ئىشەندى» دېگەن سۆزلىرى ئاڭلىنىدۇ.
ترامپ يەنە خىتاي دۆلەت رەئىسى شى جىنپىڭغىمۇ ئوخشاش بىر ئاگاھلاندۇرۇش بەرگەنلىكىنى ۋە تەيۋەنگە قارىتا ھەرقانداق بىر ھەرىكەت يۈز بەرگەن تەقدىردە بېيجىڭنى بومباردىمان قىلىش بىلەن تەھدىت سالغانلىقىنى ئىلگىرى سۈردى.
ترامپنىڭ سۆزلىرى ئۈن لېنتىسىدا: «مەن ئۇنىڭغا: ‹ئەگەر سەن تەيۋەنگە ھۇجۇم قىلساڭ، بىز بېيجىڭنى بومباردىمان قىلىمىز› دېدىم. ئۇ مېنى ساراڭ دەپ ئويلىدى. ئەمما بىز ھېچقانداق مەسىلىگە يولۇقمىدۇق» دېگەنلىكى مەلۇم.
« مېنىڭ ھاكىمىيەت دەۋرىم بولغان بولسا ئىىدى غەززە ۋە ئۇكرائىنا ئۇرۇشلىرى يۈز بەرمەيتتى»
ئوخشاش ئۈن لېنتىسىدا ترامپ پرېزىدېنتلىق تەختىدە ئۆزىنىڭ ئورنىدا جو بايدىننىڭ ئولتۇرغانلىقى سەۋەبىدىن ئۇكرائىنا ئۇرۇشى ۋە غەززەدىكى توقۇنۇشلارنىڭ پارتلىغانلىقىنى ئىلگىرى سۈردى.
«ئەگەر مەن پرېزىدېنت بولغان بولسام، بۇلارنىڭ ھېچقايسىسى يۈز بەرمەيتتى» دېدى.
ئىسرائىلىيە داۋاملىشىۋاتقان مۇزاكىرىلەرگە پىسەنت قىلماستىن، غەززەگە قاراتقان ھۇجۇملىرىنى داۋاملاشتۇرماقتا.
ترامپنىڭ ئوقۇغۇچىلار نامايىشى ھەققىدىكى بايانلىرى
ئاشكارىلىنىپ كەتكەن ئۈن لېنتىسىدا ترامپنىڭ ئامېرىكا قوشما ئىشتاتلىرى ئۇنىۋېرسىتېتلىرىدىكى پەلەستىننى قوللايدىغان نامايىشلارغا نارازىلىق بىلدۈرگەنلىكى ئورۇن ئالىدۇ.
ترامپ قالايمىقانچىلىقنى توختىتىشنىڭ بىر يولى سۈپىتىدە نامايىشقا قاتناشقان ئوقۇغۇچىلارنى چېگرادىن قوغلاپ چىقىرىشنى تەۋسىيە قىلىدۇ.
ترامپنىڭ ئۈن لېنتىسىدا: «مەن نامايىشقا قاتناشقان ئوقۇغۇچىلارنى چېگرادىن قوغلاپ چىقارغان بولاتتىم» دېگەن سۆزلىرى ئاڭلىنىدۇ.
