تۈركىيە جۇمھۇر رەئىسى رەجەپ تاييىپ ئەردوغان جۈمە (2026-يىلى 1-ماي) كۈنى تۈركىيە رادىيو-تېلېۋىزىيە ئىدارىسى-ت ر ت  قۇرۇلغانلىقىنىڭ 62 يىللىقىنى تەبرىكلەپ،  ت ر ت نى دۇنيا تاراتقۇلىرىدىكى «مۇھىم تايانچ نۇقتا» ۋە كۈنسېرى كۆپىيىۋاتقان ساختا ئۇچۇرلارغا تاقابىل تۇرغۇچى كۈچ دەپ ماختىدى.

جۇمھۇر رەئىس رەجەپ تاييىپ ئەردوغان ت ر ت باش مۇدىرى مەھمەت زاھىد سوباجىغا ئەۋەتكەن تەبرىك تېلېگراممىسىدا، ت ر ت نىڭ كۆپ تىللىق تارقىتىش ئىقتىدارىنى كۈچەيتىپ، رەقەملىك سۇپىلارغا ماسلاشقانلىقىنى، شۇنىڭ بىلەن بىر ۋاقىتتا «دۆلىتىمىزنىڭ ئاۋازى» ۋە «خەلقىمىزنىڭ خاتىرىسى» بولۇش رولىنى داۋاملىق جارى قىلدۇرۇۋاتقانلىقىنى بىلدۈردى.

1964-يىلى قۇرۇلغان ت ر ت، تۈركىيەنىڭ ئاممىۋى تارقىتىش ئورگىنى بولۇپ، ئاساسلىق مەبلىغى ئىجازەت ھەققى ۋە ھۆكۈمەت ياردەم پۇلى ئارقىلىق كاپالەتكە ئىگە قىلىنىدۇ.

جۇمھۇر رەئىس رەجەپ تاييىپ ئەردوغان ت ر ت نىڭ تۈركىيەنىڭ مەيدانىنى خەلقئارادا تونۇشتۇرۇش ۋە دۆلەتنىڭ «ئادالەت كۈرىشى» نى ئىلگىرى سۈرۈشتە مۇھىم رول ئوينايدىغانلىقىنى ئېيتىپ،  داۋاملىق «يۇقىرى سۈپەتلىك ۋە ئاخبارات ساھەسىگە يېتەكچىلىك قىلىدىغان مەزمۇنلار» نى ئىشلەپچىقىرىشى كېرەكلىكىنى تەكىتلىدى.

ئۇ يەنە ت ر ت نىڭ «دۆلىتىمىزنىڭ، مىللىتىمىزنىڭ ۋە بارلىق مەزلۇملارنىڭ ئاۋانگارت ئاۋازى بولۇپ قالىدىغانلىقى» غا ئىشىنىدىغانلىقىنى ئەسكەرتتى.

ئۇ مۇنداق دېدى: «TRT نىڭ <تۈركىيە ئەسىرى> تەسەۋۋۇرىمىزنى تارقىتىش ساھەسىگە ئېلىپ كىرىشتە، شۇنداقلا دۆلىتىمىزنىڭ توغرا مەيدانىنى ۋە ئادالەت كۈرىشىمىزنى خەلقئارا جەمئىيەتكە تېخىمۇ كۈچلۈك يەتكۈزۈش تىرىشچانلىقىمىزدا ئوينىغان رولى ئىنتايىن مۇھىم.»

«تۈركىيە ئەسىرى» ئەردوغاننىڭ 2023-يىلى جۇمھۇرىيەت قۇرۇلغانلىقىنىڭ 100 يىللىقى مۇناسىۋىتى بىلەن ئوتتۇرىغا قويغان ئاساسلىق سىياسىي تەسەۋۋۇرى بولۇپ، ئۇ تۈركىيەنىڭ دىپلوماتىيە، مۇداپىئە، ئىقتىساد ۋە تاراتقۇ قاتارلىق ساھەلەردىكى دۇنياۋى تەسىرىنى كېڭەيتىشنى مەقسەت قىلىدۇ، شۇنداقلا ئىستراتېگىيەلىك ئالاقە ۋە خەلقئارا تەسىر كۈچىگە ئالاھىدە ئەھمىيەت بېرىدۇ.

ت ر ت دۆلەت ئىچى ۋە خەلقئارالىق قاناللار، رادىيو ۋە رەقەملىك سۇپىلاردىن تەركىب تاپقان كەڭ تورنى باشقۇرۇۋاتقان بولۇپ، دۇنياغا 40 تىن ئارتۇق تىلدا تارقىتىش بېرىدۇ. بۇنىڭ ئىچىدە ت ر ت ۋورلد (TRT World)، ت ر ت ئەرەبچە (TRT Arabi)، ت ر ت ئىسپانچە (TRT Espanol) قاتارلىق مەخسۇس خەلقئارالىق قاناللار بار.