جۇمھۇر رەئىس رەجەپ تاييىپ ئەردوغان ئىسرائىلىيەنىڭ سۈرىيە ۋە لىۋانغا قاراتقان ھۇجۇملىرىنىڭ، بۇ ئىككى دۆلەتكە ئوخشاشلا ئەمدىلىكتە تۈركىيەگىمۇ تەھدىت ئېلىپ كېلىدىغان بىر نۇقتىغا كەلگەنلىكىنى تىلغا ئېلىپ، ئىسرائىلىيەنىڭ «تاجاۋۇزچىلىقى» نىڭ پۈتكۈل دۇنياغا تەھدىت شەكىللەندۈرىدىغانلىقىنى ۋە چوقۇم توختىتىلىشى كېرەكلىكىنى بىلدۈردى.
چارشەنبە كۈنى تۈركىيە بۈيۈك مىللەت مەجلىسى (پارلامېنتى) دە پارلامېنت ئەزالىرىغا خىتاب قىلغان جۇمھۇر رەئىس ئەردوغان، ئىسرائىلىيەنى ئاقدېڭىزنى ۋە تېخىمۇ كەڭ بىر رايوننى تېخىمۇ كەڭ كۆلەملىك مۇقىمسىزلىققا ئىتتىرىدىغان ئۇرۇنۇشلاردا بولۇش بىلەن ئەيىبلەپ مۇنداق دېدى:
«تۈركىيەنىڭ بىخەتەرلىكى پەقەت خاتايدىنلا باشلانمايدۇ، بەلكى ھەلەبتىن باشلىنىدۇ، دەمەشق تىن باشلىنىدۇ. تۈركىيەدىكى بىخەتەرلىك بېيرۇتتىن باشلىنىدۇ. بىز قېرىنداشلىرىمىزنىڭ دۆلەتلىرىدە ھېچقانداق زورلۇق-زومبۇلۇققا يول قويمايمىز، قېرىنداشلىرىمىزغا قارىتىلغان ھېچقانداق ھۇجۇمغا سۈكۈت قىلىپ تۇرمايمىز. دەرۋەقە، دۆلەت بىخەتەرلىكى چېگرادىن ھالقىپ كەتتى.»
جۇمھۇر رەئىس ئەردوغان يەنە، تۈركىيەنىڭ «ۋەدە قىلىنغان تۇپراقلار» (ئارزى مەۋئۇد) خام خىيالىنىڭ ئاخىرقى نىشانىنىڭ نېمە ئىكەنلىكىنى ئوبدان بىلىدىغانلىقىنى تىلغا ئېلىپ: «ئاللاھنىڭ ئىزنى بىلەن بۇنىڭغا ھەرگىز يول قويمايمىز» دېدى.
باشقا دۆلەتلەرنى ئىسرائىلىيە بىلەن بىر سەپتە تۇرماسلىق ھەققىدە ئاگاھلاندۇرغان ئەردوغان: «ھېچكىم خەۋپكە تەۋەككۈل قىلمىسۇن. ھېچكىم زىيونىست قىرغىنچىلىق شايكىسىغا ئەگەشمىسۇن» دېدى.
ئەردوغان ئىسرائىلىيەنىڭ ھەرىكەتلىرى چەكلەنمىسە تېخىمۇ ئېغىر ئاقىۋەتلەرنىڭ كېلىپ چىقىدىغانلىقى ھەققىدە ئاگاھلاندۇرۇش بېرىپ مۇنداق دېدى:
«ئەگەر ئىسرائىلىيەنىڭ بۇ قاراقچىلىقىغا تاقابىل تۇرۇلمىسا، بۇنىڭ جازاسىنى رايون بىلەن بىرگە پۈتكۈل ئىنسانىيەت تارتىدۇ. ئىسرائىلىيە چوقۇم توختىتىلىشى كېرەك. بۇ ئىنسانىيەتنىڭ ۋە ئىنسانىيەتنىڭ مەڭگۈ باش تارتالمايدىغان مۇقەددەس بۇرچىدۇر. تارىخنىڭ تەكرارلىنىشىغا يول قويماسلىق كېرەك.
ھېچكىمنىڭ خەۋپكە تەۋەككۈل قىلماسلىقى ۋە ئىسرائىلىيەنىڭ پىتنىخور كېمىسىگە ئولتۇرماسلىقى كېرەك. ئەگەر ئاقدېڭىزدا تۈركىيەنىڭ ۋە قىبرىس تۈرك خەلقىنىڭ ھەق-ھوقۇقلىرىغا دەخلى-تەرۇز قىلىنسا، شۇنى بىلىپ قويۇڭلاركى، بىزنىڭ جاۋابىمىز ئىنتايىن ئېنىق ۋە ئىنتايىن قاتتىق بولىدۇ.»
ئىسرائىلىيەنىڭ چوقۇم توختىتىلىشى كېرەكلىكىنى تەكىتلىگەن ئەردوغان، تېخىمۇ كۆپ جىددىيچىلىكنىڭ ئالدىنى ئېلىشنىڭ ئىنسانىيەتنىڭ ئورتاق مەسىلىسىگە ئايلانغانلىقىنى، ۋەزىيەتنىڭ تېخىمۇ يامانلىشىپ كېتىشىنى توسۇشنىڭ بارلىق ئىنسانىيەتنىڭ مەسئۇلىيىتى ئىكەنلىكىنى ئېيتتى.
