يابانىيەنىڭ شەرقىي شىمالىي قىرغاقلىرىدا تۇتۇلغان 243 كىلوگىراملىق بىر كۆك قاناتلىق تۇنا بېلىقى، داڭلىق سۇشى رېستورانلار زەنجىرىنى باشقۇرىدىغان بىر شىركەت تەرىپىدىن سېتىۋېلىندى.

 دۈشەنبە كۈنى توكيودىكى تويوسۇ بېلىق بازىرىدا يىلنىڭ تۇنجى كىمئارتۇق سودىسىدا، بىر تۇزلۇق سۇ بېلىقى 510 مىليون 300 مىڭ يېن (3 مىليون 200 مىڭ دوللار) غا سېتىلدى.

ياپونىيەنىڭ شەرقىي شىمالىدىكى ئائومورى ۋىلايىتىگە قاراشلىق ئومئا دېڭىز تەۋەلىكىدە تۇتۇلغان 243 كىلوگىراملىق كۆك قاناتلىق تۇنا بېلىقىنى، داڭلىق سۇشى زەنجىرى «سۇشىزانماي» (Sushizanmai) نى باشقۇرىدىغان توكيوغا جايلاشقان «كىيومۇرا شىركىتى» (Kiyomura Corp.) سېتىۋالدى.

كيوودو ئاگېنتلىقىنىڭ خەۋەر قىلىشىچە، كىيومۇرا شىركىتىنىڭ خوجايىنى كىيوشى كىمۇرا: «يىلنىڭ تۇنجى تۇنا بېلىقى تەلەي ئېلىپ كېلىدۇ. ئىمكانىيەتنىڭ بارىچە كۆپ كىشىنىڭ بۇنى يەپ، ئۆزىنى روھلۇق ھېس قىلىشىنى ئۈمىد قىلىمىز» دېگەن.

تۇنا بېلىقى «سۇشىزانماي» نىڭ سۇكىجىدىكى ئاساسلىق شۆبىسىدە پارچىلىنىدۇ ۋە پۈتۈن مەملىكەتتىكى شۆبىلىرىگە ئەۋەتىلىدۇ. شىركەت رېكورت يارىتىلغان باھاغا قارىماي، تۇنا بېلىقىنى خېرىدارلارغا ئادەتتىكى باھادا ساتىدىغانلىقىنى جاكارلىدى.

توكيو شەھەرلىك ھۆكۈمىتىنىڭ بىلدۈرۈشىچە، بۇ يىللىق ئەڭ يۇقىرى باھا 1999-يىلىدىن بۇيانقى مۇشۇنىڭغا ئوخشاش كىمئارتۇق سودىلىرىغا ئائىت سانلىق مەلۇماتلار ئىچىدىكى ئەڭ يۇقىرى باھا بولۇپ ھېسابلىنىدىكەن.

كىمئارتۇق سودىسىدا تۈرلۈك تۇنا بېلىقلىرى ئورۇن ئالغان بولۇپ، سېتىۋالغۇچىلار بىلەن ساتقۇچىلار ئوتتۇرىسىدىكى جانلىق ئالاقە كىشىلەرنىڭ دىققىتىنى تارتتى. كىمئارتۇق سودىسىنى كۆرۈش ئۈچۈن نۇرغۇنلىغان چەت ئەللىك ساياھەتچىلەرمۇ كەلدى.

سېتىۋالغۇچىلار ئادەت بويىچە يىلنىڭ تۇنجى كىمئارتۇق سودىسىدا يۇقىرى سوممىدا پۇل خەجلەيدۇ؛ بۇنىڭ تەلەي ئېلىپ كېلىدىغانلىقىغا ئىشىنىلىدۇ ۋە رېستورانلار ئۈچۈن بازار ئېچىش پۇرسىتى يارىتىپ بېرىدۇ.