ئامېرىكا ئاۋام پالاتاسى ئامېرىكا دۆلەت مەجلىسىنىڭ تەستىقى بولمىغانلىقى سەۋەبىدىن قىلىنغان قاتتىق تەنقىدلەرگە قارىماي، دونالد ترامپنىڭ ئىرانغا قارشى ئۇرۇش ئېلان قىلىش ھوقۇقىنى چەكلەشنى مەقسەت قىلغان تەشەببۇسنى رەت قىلدى.
ئامېرىكا ئاۋام پالاتاسى پىرېزىدېنت ترامپنىڭ دۆلەت مەجلىسىدىن تەستىق ئالماي تۇرۇپ ئىرانغا قارىتىلغان ھۇجۇملارنى باشلىغانلىقى سەۋەبىدىن قاتتىق تەنقىدكە ئۇچراۋاتقان بىر مەزگىلدە، ترامپنىڭ ئىرانغا قارشى ئۇرۇش ئېلان قىلىش ھوقۇقىنى چەكلەش تەشەببۇسىنى رەت قىلدى.
پالاتا ئەزالىرى جۇمھۇرىيەتچىلەردىن توماس ماسسىي ۋە دېموكراتلاردىن رو خاننانىڭ رەھبەرلىكىدە سۇنۇلغان، ترامپنىڭ تېھرانغا قارشى ھەربىي ھەرىكەتلەرنى داۋاملاشتۇرۇشتىن بۇرۇن دۆلەت مەجلىسىنىڭ ماقۇللۇقىنى ئېلىشىنى تەلەپ قىلىدىغان ئىككى پارتىيەلىك قارار لايىھەسىنى رەت قىلدى.
مەزكۇر لايىھە كېڭەش پالاتاسى شۇنىڭغا ئوخشاش بىر تەشەببۇسنى رەت قىلىپ بىر كۈن ئۆتكەندىن كېيىن، 212 گە قارشى 219 ئاۋاز بىلەن رەت قىلىندى. بۇ ئەھۋال دۆلەت مەجلىسىنىڭ توقۇنۇشنىڭ دەسلەپكى كۈنلىرىدە ئاقساراي بىلەن تىركىشىشنى خالىمايدىغانلىقىنى ئاشكارىلاپ قويدى.
بۇ لايىھە ھەر ئىككى پالاتانىڭ ماقۇللۇقىدىن ئۆتكەن تەقدىردىمۇ، ترامپ قانۇننى ۋېتو قىلىۋېتەلەيتتى.
ئاۋازغا قويۇش ھەرىكىتى، ئامېرىكا ۋە ئىسرائىلىيەنىڭ ئىرانغا قارشى باشقۇرۇلىدىغان بومبا ئەسلىھەلىرىنى ۋە باشقا ئۇل ئەسلىھەلەرنى نىشان قىلغان كەڭ كۆلەملىك ھەربىي ھەرىكەت باشلىغىنىغا بىر ھەپتىمۇ توشمىغان بىر ۋاقىتتا ئېلىپ بېرىلدى.
ھۇجۇملار دىنىي رەھبەر ئەلى ھامانېينى ئۆز ئىچىگە ئالغان يۇقىرى دەرىجىلىك ئىران دائىرىلىرىنىڭ ئۆلۈمىنى كەلتۈرۈپ چىقاردى.
توقۇنۇش يەنە ئامېرىكالىقلار ئارىسىدىمۇ جاندىن ئايرىلىش ئەھۋاللىرىنى كەلتۈرۈپ چىقاردى؛ كۇۋەيتتىكى بىر ئامېرىكا بازىسىغا قىلىنغان ھۇجۇمدا ئالتە ئامېرىكا ئەسكىرى ھاياتىدىن ئايرىلدى.
كېڭەش پالاتاسىدىكى ئاز سانلىق دېموكراتلارنىڭ رەھبىرى چاك شۇمېر: «جۇمھۇرىيەتچىلەرنىڭ مۇتلەق كۆپ سانلىقلار تەرىپىدىن قوللىنىدىغان بىر ئىشنى قىلىش پۇرسىتى بار ئىدى، يەنى ئۇلارنىڭ ترامپنىڭ ئۇرۇشىغا قارشى چىقىش پۇرسىتى بار ئىدى. ئەمما ئۇلار ئۇنداق قىلمىدى. ئەمدى ئىران بىلەن بولغان بۇ ئۇرۇشقا دونالد ترامپقا ئوخشاشلا ئۇلارمۇ ئىگىدارچىلىق قىلىۋاتىدۇ» دېدى.
جۇمھۇرىيەتچىلەرنىڭ رەھبەرلىرى ترامپنىڭ ھوقۇقىنى چەكلەشنىڭ ئىراننى جاسارەتلەندۈرىدىغانلىقىنى ئىلگىرى سۈرۈپ ترامپنى قوللىدى.
ئاۋام پالاتاسىنىڭ جۇمھۇرىيەتچى رەئىسى مايك جونسون مۇخبىرلارغا: «مېنىڭچە ھازىرقىدەك بىر پەيتتە ئۇرۇش ھوقۇقى ھەققىدە قارار لايىھەسىنىڭ قوبۇل قىلىنىشى قورقۇنچلۇق ۋە خەتەرلىك بىر پىكىر بولاتتى... بۇ دۈشمەنلىرىمىزنى كۈچلەندۈرۈۋېتەتتى» دېدى.
بىراق، جۇمھۇرىيەتچى دۆلەت مەجلىسى ئەزاسى توماس ماسسىي دۆلەت مەجلىسىنىڭ ئۆز رولىنى جارى قىلدۇرۇشى كېرەكلىكىنى ئەسكەرتىپ مۇنداق دېدى:
«ئاساسىي قانۇنىمىزغا ئاساسەن، ئۇرۇش باشلاش ھوقۇقى پەقەت دۆلەت مەجلىسىگىلا تەۋەدۇر.»
