مەدەنىيەت ۋە ساياھەت ئىشلىرى مىنىستىرى مەھمەت نۇرى ئەرسوي، ئاتاتۈركنىڭ «نۇتۇق» ناملىق ئەسىرىنىڭ ئىنگلىزچە، نېمىسچە، فىرانسۇزچە، قازاقچە، رۇسچە، ئوردۇچە، پارسچە ۋە تۈركمەنچە ئالاھىدە نەشرلىرىنىڭ تەييارلانغانلىقىنى بىلدۈردى. ئەسەر كۆرۈش ۋە ئاڭلاش ئىقتىدارى توسالغۇغا ئۇچرىغانلار ئۈچۈنمۇ پەرقلىق فورماتلاردا پايدىلىنىشقا سۇنۇلدى.
«نۇتۇق ئەسەرلىرى لايىھەسىنى تونۇشتۇرۇش پائالىيىتى» ئاتاتۈرك مەدەنىيەت، تىل ۋە تارىخ ئالىي ئورگىنىدا ئۆتكۈزۈلدى.
مىنىستىر ئەرسوي بۇ يەردە سۆزلىگەن نۇتىقىدا، خەلقنىڭ مۇستەقىللىق كۈرىشىنى، جۇمھۇرىيەتنىڭ قۇرۇلۇشىدىكى تەۋرەنمەس ئىرادىنى ۋە (جۇمھۇرىيەتنىڭ قۇرغۇچىسى) غازى مۇستاپا كامال ئاتاتۈركنىڭ ئىدىيە دۇنياسىنى كېلەچەك ئەۋلادلارغا يەتكۈزىدىغان «نۇتۇق» نىڭ 8 تىلدا ۋە ئالاھىدە لايىھەلەنگەن نەشرلىرىنى بۈگۈن ئاممىغا تونۇشتۇرغانلىقلىرىنى قەيت قىلدى.
«نۇتۇق ئەسەرلىرى لايىھەسى» ئارقىلىق بۇ مۇھىم ئەسەرنى ئوخشاش بولمىغان پايدىلىنىش ئۇسۇللىرى بىلەنمۇ جەمئىيەتنىڭ ھەرقايسى قاتلاملىرىغا يەتكۈزگەنلىكلىرىنى بىلدۈرگەن ئەرسوي: «ئەمدىلىكتە <نۇتۇق> كۆرۈش ۋە ئاڭلاش ئىقتىدارى توسالغۇغا ئۇچرىغان پۇقرالىرىمىزنىڭ پايدىلىنىشىغىمۇ سۇنۇلۇپ، ھەممە ئادەم كۆرەلەيدىغان ھالەتكە كەلتۈرۈلدى» دېدى.
«نۇتۇق» نىڭ ئىنگلىزچە، نېمىسچە، فىرانسۇزچە، قازاقچە، رۇسچە، ئوردۇچە، پارسچە ۋە تۈركمەنچە ئالاھىدە نەشرلىرىنىڭ تەييارلانغانلىقىنى بىلدۈرگەن ئەرسوي سۆزىنى داۋاملاشتۇرۇپ:
«مۇستاپا كامال پاشا ئەسىرىدە، مۇستەقىللىق ئۇرۇشى (1919 - 1923) يىللىرىدا دۆلەتنىڭ باشتىن كەچۈرۈۋاتقان ۋەزىيەتنى ئوتتۇرىغا قويغان بولۇپ، مۇستەقىللىق ئۇرۇشىنىڭ ۋە بۇ ئۇرۇشتىن كېيىن باشلانغان زامانىۋىلاشتۇرۇش تىرىشچانلىقلىرىنىڭ قانداق شارائىتلاردا ئەمەلگە ئاشقانلىقىنى ھۆججەتلەرگە تايانغان ئاساستا تەپسىلىي بايان قىلغان. بۇ كىتاب 1919 - يىلى 19 - مايدىن جۇمھۇرىيىتىمىزنىڭ قۇرۇلۇش مۇساپىسىگىچە سوزۇلغان تارىخىي يۈرۈشىمىزنىمۇ ھۆججەتلەرگە تايانغان ھالدا كۆز ئالدىمىزدا نامايان قىلىپ بەرمەكتە» دېدى.
