رۇسىيە چارشەنبە كۈنى ئامېرىكا پىرېزىدېنتى دونالد ترامپنىڭ «بېنزىن قىسىنچىلىقى رۇسىيە ئىقتىسادىنىڭ گۇمران بولۇش گىردابىغا بېرىپ قالغانلىقىنى كۆرسىتىدۇ» دېگەن ئاگاھلاندۇرۇشىنى رەت قىلدى.
ترامپ سەيشەنبە كۈنى قىلغان سۆزىدە، ئۇكرائىنادىكى ئۇرۇشنى ئاخىرلاشتۇرۇش ئىستىكىنىڭ يوقلۇقىنى ئېيتقان رۇسىيە پىرېزىدېنتى ۋلادىمىر پۇتىندىن قاتتىق ئۈمىدسىزلەنگەنلىكىنى بىلدۈرگەنىدى.
ترامپ: «بۇ ئۇرۇش ھەقىقەتەن ئاخىرلاشتۇرۇلۇشى كېرەك. سىلەرمۇ بىلىسىلەركى، ھازىر رۇسىيەدە بېنزىن ئۈچۈن ئۇزۇن ئۆچرەتلەر پەيدا بولدى. ئۇنىڭ ئىقتىسادى گۇمران بولىدۇ، مەن ئۇنىڭ ئەھۋالىنىڭ ياخشى بولۇشىنى كۆرۈشنى خالايمەن. باشقىچە ئېيتقاندا، مېنىڭ ۋلادىمىر پۇتىن بىلەن مۇناسىۋىتىم ناھايىتى ياخشى ئىدى، ئەمما ئۇ بۇ ئۇرۇشنى ئاخىرلاشتۇرۇشنى خالىمايدۇ. مېنىڭچە، بۇ ئەھۋال ئۇنى ناھايىتى ناچار كۆرسىتىپ قويىدۇ» دېدى.
رۇسىيە مۇئاۋىن باش مىنىستىرى ئالېكساندىر نوۋاك، رۇسىيەدە دۆلەت ئىچى بازىرىنى بېنزىن بىلەن تەمىنلەشنىڭ مۇقىم ئىكەنلىكىنى ئېيتىپ، «دۆلەت ئىچى بازىرىدا تەمىناتىمىز مۇقىم، بۇ ھەقتە ھېچقانداق مەسىلە كۆرمەيۋاتىمىز» دېدى.
نوۋاك ئىشلەپچىقىرىش بىلەن ئىستېمال ئوتتۇرىسىدىكى تەڭپۇڭلۇقنىڭ ساقلىنىۋاتقانلىقىنى، ھۆكۈمەت ۋە ئالاقىدار مىنىستىرلىقلارنىڭ بۇنىڭ داۋاملىشىشىغا كاپالەتلىك قىلىش ئۈچۈن پۈتۈن كۈچى بىلەن تىرىشىۋاتقانلىقىنى بىلدۈردى.
«بىز دىيالوگ ئۆتكۈزۈشكە ئوچۇق»
ئالېكساندىر نوۋاك يەنە ياۋروپا ئىقتىسادىدىكى پاسسىپ يۈزلىنىشلەرنى ئۇلارنىڭ رۇسىيە تەبىئىي گازىغا بولغان بېقىندىلىقىنى چەكلەش قارارىغا باغلىدى.
نوۋاك: «ئۇلار (ياۋروپا ئىتتىپاقى) رۇسىيە تەبىئىي گازىنىڭ ياۋروپا دۆلەتلىرىنى تەمىنلىنىشىنى چەكلەشنى قارار قىلدى. بۈگۈنكى كۈندە، تەبىئىي گاز بىلەن تەمىنلەش ئەمەلىيەتتە ئازايدى. ئىلگىرى، رۇسىيە تەبىئىي گازىنىڭ ياۋروپانىڭ ئېنېرگىيە تەڭپۇڭلۇقىدىكى نىسبىتى تەخمىنەن %44 ئىدى، ئەمما بۈگۈنكى كۈندە ئومۇمىي ئىمپورتنىڭ تەخمىنەن %19 ىنى تەشكىل قىلىدۇ. يەنى يېرىمغا قىسقاردى» دېدى ھەمدە گېرمانىيەگە ئوخشاش دۆلەتلەردىكى ئىقتىسادىي چېكىنىشكە دىققەتنى تارتىپ، تەبىئىي گاز پىششىقلاپ ئىشلەش زاۋۇتلىرى، خىمىيە سانائىتى زاۋۇتلىرى ۋە سانائەت ئىشلەپچىقىرىش ئورۇنلىرىنىڭ تاقىلىشىنىڭ ئىقتىسادىي ئېشىشنى ئاستىلاتقانلىقىنى تەكىتلىدى.
نوۋاك يەنە ئەگەر تەلەپ قىلىنسا، رۇسىيەنىڭ ياۋروپانى تەبىئىي گاز بىلەن تەمىنلەشنى ئاشۇرۇشقا تەييار ئىكەنلىكىنى تەكىتلەپ، بۇ خىل كېلىشىملەرنىڭ «ئۆزئارا مەنپەئەت يەتكۈزىدىغان، شېرىكلىك مۇناسىۋىتى ئاساسىدىكى شەرتلەر» ئاستىدا بولۇشى كېرەكلىكىنى سۆزىگە ئىلاۋە قىلدى.
نوۋاك ئېنېرگىيە ساھەسىدە يۈز بېرىۋاتقان جىددىيچىلىككە قارىماي، رۇسىيەنىڭ دىيالوگقا ئوچۇق ئىكەنلىكىنى تەكىتلىدى.
