ئەرەب ئىتتىپاقداش كۈچلىرىنىڭ باياناتچىسى بىرىگادا گېنېرالى تۈركى ئەلمالىكى، ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ھۇسىيلارنىڭ سەئۇدى ئەرەبىستاننى، پۇقرالىرىنى ۋە دۆلەتنىڭ ئىقتىدارىنى نىشان قىلىش تەشەببۇسلىرىنىڭ مەسئۇلىيەتسىزلىك ۋە دۈشمەنلىك پوزىتسىيەسىنى ئەكس ئەتتۈرىدىغانلىقىنى بىلدۈردى.
مالىكى ھۇسىيلارنىڭ ئەڭ ئاخىرىدا ئەبھا، خامىس مۇشايت، جازان ۋە نەجران شەھەرلىرىدىكى پۇقراۋى ۋە سودا سارايلىرىغا قىلغان ھۇجۇملىرىدا 73 كىشىنىڭ يارىلانغانلىقىنى، بۇ ھەرىكەتلەرنىڭ سەئۇدى ئەرەبىستاننىڭ ئىگىلىك ھوقۇقىنى ئوچۇق - ئاشكارا دەپسەندە قىلىش ۋە خەۋپسىزلىكىگە تەھدىت سېلىش ئىكەنلىكىنى قەيت قىلدى. تۈركى ئەلمالىكى «تېررورچى ھۇسىي خەلق ئەسكەرلىرى» نىڭ سەۋەبسىز ئېلىپ بارغان بۇ ھۇجۇملىرىنىڭ دۆلەت ئىقتىسادىغا زىيان يەتكۈزۈشنى نىشان قىلغانلىقىنى تەكىتلەپ، ئىتتىپاقداش كۈچلىرىنىڭ بۇ تاجاۋۇزچىلىققا قەتئىيلىك بىلەن تاقابىل تۇرۇش ئۈچۈن زۆرۈر بولغان بارلىق تەدبىرلەرنى قوللىنىدىغانلىقىنى سۆزلىرىگە ئىلاۋە قىلدى.
ئىران قوللايدىغان ھۇسىيلار گۇرۇھى 2014-يىلى سېنتەبىردىن بۇيان پايتەخت سانا باشلىق يەمەننىڭ بەزى رايونلىرىنى كونترول قىلىپ كەلمەكتە. سەئۇدى ئەرەبىستان باشچىلىقىدىكى ئىتتىپاقداش كۈچلىرى بولسا 2015-يىلى مارتتىن باشلاپ يەمەن ھۆكۈمىتىنى قوللاپ كەلمەكتە.
