ئىسرائىلىيەنىڭ ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدىكى ئەلخەلىل ۋە بەيتۇللەھمە شەھەرلىرىدە پەلەستىنلىكلەرگە تەۋە تەخمىنەن 183 دۆنۈم يەرنى تارتىۋالغانلىقى بىلدۈرۈلدى.
پەلەستىن ئايرىمىچىلىق سېپىلى ۋە يەھۇدىي ئولتۇراق رايونلىرىغا قارشى تۇرۇش ھەيئىتى تەرىپىدىن ئېلان قىلىنغان يازما باياناتتا، تېل ئاۋىۋ ھۆكۈمىتىنىڭ ئىيوردان دەرياسىنىڭ غەربىي قىرغىقىنىڭ جەنۇبىدىكى ئەلخەلىل ۋە بەيتۇللەھمە شەھەرلىرىگە قاراشلىق يېزىلاردىكى 182.81 دۆنۈم يەرنى «دۆلەت مۈلكى» ئېلان قىلغانلىقى بىلدۈرۈلدى.
ئىسرائىلىيەنىڭ رايوندىكى قانۇنسىز كۆچمەنلەر ئولتۇراق رايونلىرىغا رەسمىي سالاھىيەت بېرىپ، ئۇنى كېڭەيتىش قەدەملىرى دائىرىسىدە پەلەستىنلىكلەرنىڭ زېمىنلىرىنى تارتىۋالغانلىقى ئەسكەرتىلگەن باياناتتا، ئىسرائىلىيەنىڭ بۇ قەدەملىرى ئارقىلىق پەلەستىن زېمىنىنى پارچىلاشنى داۋاملاشتۇرۇۋاتقانلىقى ۋە ئەمەلىي قوشۇۋېلىشنى مەجبۇرىي تېڭىۋاتقانلىقى قەيت قىلىندى.
ئىسرائىلىيە غەززە رايونىغا ھۇجۇم باشلىغان 2023 - يىلى ئۆكتەبىردىن بۇيان، ئىشغالىيەت ئاستىدىكى ئىيوردان دەرياسىنىڭ غەربىي قىرغىقى بىلەن شەرقىي قۇددۇستا پەلەستىنلىكلەرگە قارىتىلغان تۇتقۇن قىلىش، بېسىپ كىرىش ۋە ھۇجۇم قىلىش ۋەقەلىرىمۇ بارغانسېرى كۆپەيمەكتە.
