رېيتېر ئاگېنتلىقىنىڭ بىلۇمبېرگدىن نەقىل كەلتۈرۈپ بەرگەن خەۋىرىگە ئاساسلانغاندا، ئىسرائىلىيە غەززەدىكى ئىككى يىللىق ئىرقىي قىرغىنچىلىقى جەريانىدا 57 مىليارد دوللاردىن ئارتۇق ئىقتىسادىي زىيانغا ئۇچرىغان.
ئىسرائىلىيە بانكىسىنىڭ 2025-يىللىق دوكلاتىدا ئېلان قىلىنغان مەلۇماتلاردا كۆرسىتىلىشىچە، 2023-يىلىدىن 2025-يىلىغىچە بولغان ئارىلىقتا تەخمىنەن 57 مىليارد دوللارغا ياكى مىللىي ئىشلەپچىقىرىش ئومۇمىي قىممىتىنىڭ %8.6 ىگە توغرا كېلىدىغان 177 مىليارد شېكېللىق زىيان كۆرۈلگەن.
ناھايىتى زور دەرىجىدە غەززەدىكى ئىرقىي قىرغىنچىلىق سەۋەبىدىن كېلىپ چىققانلىقى بىلدۈرۈلگەن بۇ زىيانلار، ئىسرائىلىيەنىڭ لىۋاننى بېسىۋېلىشىغا كەتكەن چىقىملارنىمۇ ئۆز ئىچىگە ئالىدۇ.
ئەمما دوكلاتتا، ئىسرائىلىيە باشقۇرۇلىدىغان بومبا ھۇجۇملىرىنى ئېلىپ بېرىۋاتقان، قايتۇرما ھۇجۇملارغا دۇچ كېلىۋاتقان ۋە تۆتىنچى ھەپتىسىگە قەدەم قويغان ئىرانغا قارىتىلغان ئۇرۇشنىڭ ئىقتىسادىي تەسىرى تېخى ئورۇن ئالمىغان.
ئىسرائىلىيە ئۇرۇش كابىنېتى مۇشۇ ئاينىڭ باشلىرىدا، ئۇرۇشنى مەبلەغ بىلەن تەمىنلەش ئۈچۈن 13 مىليارد دوللار ئىلاۋە قىلىپ قايتا بېكىتىلگەن 2026-يىللىق دۆلەت خامچوتىنى ماقۇللىدى. دوكلاتتا يەنە سودا ئەندىزىلىرىدىكى ئۆزگىرىشلەرمۇ تەكىتلەنگەن بولۇپ، ئىسرائىلىيەنى تېخىمۇ كۆپ تەنقىد قىلىدىغان سەككىز ياۋروپا ئىتتىپاقى دۆلىتىگە قىلىنغان ئېكسپورت 2024-يىلى 1 مىليارد دوللار، 2025-يىلى بولسا 1 مىليارد 500 مىليون دوللار ئازايغان؛ بۇنىڭ دەل ئەكسىچە باشقا بەزى دۆلەتلەر بىلەن بولغان سودا ئاشقان.
ئىسرائىلىيە بانكىسىنىڭ دوكلاتىدا: «بۇ ئەندىزە سىياسىي پوزىتسىيەلەرنىڭ مەزكۇر دۆلەتلەرگە قىلىنغان ئېكسپورت ھەجمىگە تەسىر كۆرسەتكەنلىكىنى كۆرسىتىدۇ» دېيىلگەن.
بانكا يەنە، ئالدىنقى يىلى ئىيۇن ئېيىدا ئىران بىلەن يۈز بەرگەن 12 كۈنلۈك ئۇرۇشنىڭ ئىقتىسادىي مەھسۇلات مىقدارىنى مىللىي ئىشلەپچىقىرىش ئومۇمىي قىممىتىنىڭ %0.3 نىسبىتىدە ئازايتقانلىقىنى ئەسكەرتكەن.
ئىسرائىلىيە 2023-يىلى ئۆكتەبىردە غەززەگە قارىتىلغان ئىرقىي قىرغىنچىلىقىنى باشلىغان بولۇپ، ھازىرغىچە 72 مىڭدىن ئارتۇق پەلەستىنلىكنى قەتل قىلدى، تەخمىنەن 172 مىڭ كىشىنى يارىلاندۇردى ۋە پۇقراۋى ئۇل ئەسلىھەلەرنىڭ تەخمىنەن %90 نى ۋەيران قىلدى.
