ھالۇق گۆرگۈن ئىسپانىيەنىڭ ئومۇمىي قىممىتى 3 مىليارد دوللار (2.6 مىليارد ياۋرو) دىن ئاشىدىغان، تۈركىيەنىڭ تۇنجى يەرلىك مەشىق ئايروپىلانى «ھۈرجەت» (HÜRJET) تىن 30 دانە سېتىۋېلىش قارارىنىڭ ئەنقەرە ئۈچۈن يېڭى ئېكىسپورت پۇرسەتلىرىنى ياراتقانلىقىنى ئېيتتى.

ئەنقەرەدىكى تۈركىيە ئاۋىياتسىيە ۋە ئالەم سانائىتى شىركىتى (TUSAŞ) بازىسىدا ئۆتكۈزۈلگەن مۇخبىرلارنى كۈتۈۋېلىش يىغىنىدا سۆز قىلغان گۆرگۈن، بۇ كېلىشىمنىڭ تۈركىيەنىڭ يېقىنقى يىگىرمە يىلدىكى مۇداپىئە سانائىتى ۋە يۇقىرى تېخنىكا ساھەسىدىكى ئىلگىرىلىشىنى نامايان قىلىدىغانلىقىنى تەكىتلىدى. ئۇ يەنە، تۈركىيەنىڭ جۇمھۇر رەئىس رەجەپ تاييىپ ئەردوغاننىڭ رەھبەرلىكىدە يۇقىرى تېخنىكا ئىشلەپچىقىرىدىغان، مۇداپىئە سانائىتىدە ئۆز ئېھتىياجىنى قامدايدىغان، تەرەققىي قىلدۇرغان تېخنىكىلىرىنى دوست ۋە ئىتتىپاقداش دۆلەتلەر بىلەن ئورتاقلىشىدىغان، خەلقئارا بازاردىكى ئورنىنى كۈندىن-كۈنگە مۇستەھكەملەيدىغان بىر دۆلەتكە ئايلانغانلىقىنى ئەسكەرتتى.

مۇداپىئە سانائىتىدىكى يەرلىكلىشىش نىسبىتىنىڭ %82 بىلەن %83 ئارىسىدا ئىكەنلىكىگە دىققەت تارتقان گۆرگۈن: «بۇ ئېكىسپورت ئۆزىمىزنىڭ ئۆزگىچە لايىھەسى بىلەن ئىشلەپچىقىرىپ تەرەققىي قىلدۇرغان مەھسۇلاتىمىز ئارقىلىق ئەمەلگە ئاشتى» دېدى. ئۇ «ھۈرجەت»نى ياساشقا ھەسسە قوشقان 200 گە يېقىن شىركەت ھەققىدە توختىلىپ: «بۇلارنىڭ ھەربىرى جىددىي مەسئۇلىيەتلەرنى ئۈستىگە ئېلىپ ۋە بۇنى ئەڭ ياخشى شەكىلدە ئادا قىلىپ، دۇنيانىڭ ئېھتىياجى بولغان جەڭگىۋار مەشىق ئايروپىلانىنى روياپقا چىقاردى» دېدى.

تۈركىيەنىڭ ئېھتىياجى ئۈچۈن بۇنىڭدىن بۇرۇن «ھۈرجەت»كە بۇيرۇتما بېرىلگەنلىكى ۋە ئىشلەپچىقىرىشنىڭ داۋاملىشىۋاتقانلىقىنى بىلدۈرگەن گۆرگۈن، ياۋروپا ئىتتىپاقى ۋە شىمالىي ئاتلانتىك ئەھدى تەشكىلاتى — ناتو ئەزاسى ئىسپانىيەدىن تېخنىكىلىق باھالاش، ئىككى دۆلەت ھاۋا ئارمىيەلىرى ئارا سۆھبەت ۋە سانائەت ھەمكارلىقىنى باھالاش نەتىجىسىدە تەلەپ كەلگەنلىكىنى بىلدۈردى. گۆرگۈن: «بۇنداق يۇقىرى تېخنىكىلىق مەھسۇلاتنى ياۋروپا ئىتتىپاقى ۋە ناتو ئەزاسى ئىتتىپاقدىشىمىز ئىسپانىيەگە ئېكىسپورت قىلىۋاتقانلىقىمىزدىن خۇشالمىز. بۇ كېلىشىم پەقەت بىر مەشىق ئايروپىلانى سېتىش كېلىشىمىلا ئەمەس، بەلكى يەر يۈزى سىستېمىلىرى، تەقلىدىي مەشىق (سىمۇلياتسىيە) سىستېمىلىرى، تېخنىكىلىق كۈتۈش سىستېمىلىرى ۋە ھەمكارلىق مودېلى جەھەتتىن نۇرغۇن يېڭىلىقلارنى ئۆز ئىچىگە ئالغان بىر پۈتۈن بولاقتۇر» دېگەنلەرنى قەيت قىلدى.

ئۇ يەنە، بۇ خىل تۈرلەر ئارقىلىق تارماق ھۆددە كارخانىلىرىنىڭمۇ يولىنىڭ ئېچىلغانلىقىنى، ھازىر تەخمىنەن 185 دۆلەتكە 230 خىل مەھسۇلات ئىشلەپچىقىرىدىغان بىر ساھە قۇرۇلمىسىغا يېتىلگەنلىكىنى تىلغا ئالدى.

ئېكىسپورت ئىمكانىيەتلىرى

گۆرگۈن كېلىشىمنىڭ تېخنىكىلىق ھەمكارلىق، ئوخشاش بولمىغان پايدىلىق يۈكلەرنىڭ ياكى تارماق سىستېمىلارنىڭ بىرلەشتۈرۈلۈشى بىلەن كېيىنكى مودېللاردا بىرلىكتە تەرەققىي قىلدۇرۇلۇپ ئۈچىنچى دۆلەتلەرگە ئېكىسپورت قىلىنىشى قاتارلىق پۇرسەتلەرنى ياراتقانلىقىنى ئېيتتى.

«بۇ جەرياندا ئىسپانىيەنىڭ ئۆز ئېھتىياجىغا ئاساسەن يېڭىلانغان، ‹ئىسپانىيەگە خاسلاشتۇرۇلغان› نۇسخىسىمۇ بۇ بولاقنىڭ ئىچىدە بولىدۇ» دېگەن گۆرگۈن، تۈركىيەنىڭ ھەم تېخنىكىلىق ھەم ئىقتىسادىي پايدا يارىتىدىغان، ئۆزئارا تەڭ پايدا ئالىدىغان مودېللارنى شەكىللەندۈرۈشكە ئەھمىيەت بېرىدىغانلىقىنى تەكىتلىدى.

دۈشەنبە كۈنى ئىسپانىيە تۈركىيە ئاۋىياتسىيە ۋە ئالەم سانائىتى شىركىتى بىلەن كېلىشىم ئىمزالاپ، 2.6 مىليارد يەۋرو قىممىتىدىكى 30 دانە «ھۈرجەت» ئايروپىلانىنى سېتىۋېلىش ئىشلىرىنى رەسمىيلەشتۈرگەنىدى.