ۋولكسۋاگېن نازارەتچىلەر كېڭىشى دۇنيا مىقياسىدا يەنە 50 مىڭ خادىمنى قىسقارتىش لايىھەسىنى بىردەك ئاۋاز بىلەن ماقۇللىدى. بۇنىڭدىن ئىلگىرىكى قىسقارتىش پىلانلىرى بىلەن قوشقاندا، 2030-يىلىغىچە قىسقارتىلىدىغان ئومۇمىي خادىم سانى 100 مىڭغا يېتىدۇ. شىركەتنىڭ باش ئىجرائىيە ئەمەلدارى ئولىۋېر بلۇم (Oliver Blume)، «كېلەچەك پىلانى 2030» نى شىركەت تارىخىدىكى ئەڭ چوڭ ئىستراتېگىيەلىك ئىسلاھات دەپ ئاتىدى.
شىركەت دائىرىلىرى يەر شارى خاراكتېرلىك رىقابەتنىڭ كۈچىيىشى، ئېھتىياجنىڭ ئۆزگىرىشى ۋە تېخنولوگىيەلىك ئۆزگىرىشلەرنىڭ خادىم قۇرۇلمىسىنى ئىقتىسادىي رېئاللىققا ماسلاشتۇرۇشنى مەجبۇرىي قىلغانلىقىنى بىلدۈردى. ۋولكسۋاگېن يەنە يىللىق ئاپتوموبىل سېتىش نىشانىنى 9 مىليونغا چۈشۈردى. شىركەت 2035-يىلىغىچە ئاپتوموبىل مودېللىرىنى %50 قىسقارتىشنى ۋە مەھسۇلاتنىڭ مۇرەككەپلىكىنى %75 ئازايتىشنى نىشان قىلماقتا. نۆۋەتتە شىركەتنىڭ دۇنيا مىقياسىدا جەمئىي 663 مىڭ خادىمى بار.
