كونگو دېموكراتىك جۇمھۇرىيىتى ئاممىۋى سەھىيە ئىنستىتۇتىنىڭ بىلدۈرۈشىچە، ئۆتكەن 24 سائەت ئىچىدە يېڭىدىن 101 يۇقۇملانغۇچى بايقالغان بولۇپ، جەزملەشتۈرۈلگەن يۇقۇملىنىش ئومۇمىي سانى 4 مىڭ 945 كە يەتكەن.
يۇقۇم ئەڭ تېز تارقىلىۋاتقان مەزگىلگە كىردى
بىرلەشكەن دۆلەتلەر تەشكىلاتى جۈمە كۈنى ئېلان قىلغان باياناتىدا، بۇ يۇقۇمنىڭ ھەر 30 مىنۇتتا بىر كىشىنىڭ ئۆلۈشىگە سەۋەب بولۇۋاتقانلىقىنى بىلدۈرۈپ ئاگاھلاندۇردى.
ۋىرۇسنىڭ دۆلەت ئىچىدە ئەڭ تېز تارقىلىۋاتقان مەزگىلى كۆرۈلۈۋاتقان بولۇپ، كونگو دېموكراتىك جۇمھۇرىيىتىنىڭ 26 ئۆلكىسىدىن ئالتىسى يۇقۇمنىڭ تەسىرىگە ئۇچرىغان. 3 مىڭ 400 دىن ئارتۇق يۇقۇملىنىش دېلوسى يۇقۇم تۇنجى قېتىم دوكلات قىلىنغان دۆلەتنىڭ شەرقىي شىمال چېگراسىدىكى ئىتۇرى ئۆلكىسىدە بايقالغان.
كونگو دېموكراتىك جۇمھۇرىيىتى بىلەن چېگراداش ئۇگاندامۇ پايتەخت كامپالادا ئاز دېگەندە 20 يۇقۇملىنىش ئەھۋالى بايقالغانلىقىنى ئېلان قىلدى.
نۆۋەتتىكى يۇقۇمنى كەلتۈرۈپ چىقارغان، ئاز ئۇچرايدىغان «Bundibugyo» ۋارىيانتىغا قارشى ھازىرغىچە تەستىقلانغان ۋاكسىنا ياكى داۋالاش ئۇسۇلى يوق.
دۇنيا سەھىيە تەشكىلاتى مايدا كونگو دېموكراتىك جۇمھۇرىيىتى ۋە ئۇگاندادىكى ۋەزىيەتنى «خەلقئارالىق ئاممىۋى سەھىيە جىددىي ھالىتى» دەپ ئېلان قىلغان ئىدى.
ھايۋانلاردىن ئىنسانلارغا يۇقىدىغان بۇ ۋىرۇس قان، بەدەن سۇيۇقلۇقلىرى ۋە يۇقۇم بار كىشىلەر بىلەن ئۇچرىشىش ئارقىلىق داۋاملىق تارقالماقتا.
