ئامېرىكانىڭ تۈركىيەدە تۇرۇشلۇق باش ئەلچىسى توم باراك تۈركىيەنىڭ ئىستانبۇلدا ئۆتكۈزۈلگەن رۇسىيە-ئۇكرائىنا ئۇرۇشىنى ئاخىرلاشتۇرۇش سۆھبەتلىرىدە «مىسلىسىز» رول ئويناۋاتقانلىقىنى ئوتتۇرىغا قويدى.
باراك دۈشەنبە كۈنى تۈركىيەنىڭ NTV تېلېۋىزىيە قانىلىغا بايانات بېرىپ: «تۈركىيە، ھەم رۇسىيە ھەم ئۇكرائىنا بىلەن ئەنئەنىۋى ھەمكارلىققا ئىگە، بۇمۇ ئۇلارنىڭ مۇھىم دىيالوگ ئورنىتىشىغا شارائىت ھازىرلايدۇ» دېدى.
ئۇ تۈركىيەنىڭ ناتونىڭ مۇھىم ئىتتىپاقدىشى سۈپىتىدە كەڭ تونۇلغانلىقىنى، بولۇپمۇ سۈرىيەدە ۋە رۇسىيە-ئۇكرائىنا توقۇنۇشىدا ۋاسىتىچىلىك قىلىش ئارقىلىق تېخىمۇ كەڭ رايونلۇق تەسىر كۆرسىتىۋاتقانلىقىنى بىلدۈردى.
ئۇ يەنە، تۈركىيە جۇمھۇر رەئىسى رەجەپ تاييىپ ئەردوغان بىلەن ئامېرىكا پىرېزىدېنتى دونالد ترامپ ئوتتۇرىسىدىكى كۈچلۈك مۇناسىۋەتكە ئىشارەت قىلىپ، ئۆزىنىڭ بۇ شېرىكچىلىكنى تېخىمۇ كۈچەيتىش ئۈچۈن تىرىشچانلىق كۆرسىتىدىغانلىقىنى تەكىتلىدى.
باراك ترامپنىڭ رۇسىيە-ئۇكرائىنا ئۇرۇشى مەسىلىسىدىكى سەۋرچانلىقىنىڭ ئازىيىۋاتقانلىقىنىمۇ سۆزلىرىگە ئىلاۋە قىلدى.
سۈنئىي چېگرالار ۋە مەغلۇپ بولغان سىياسەتلەر
سۈرىيە مەسىلىسى ھەققىدە توختالغان باراك، ئامېرىكا رايوندىكى نۆۋەتتىكى سىياسەتلىرىنىڭ ئۆتمۈشتىكى ئۇسۇللاردىن كۆرۈنەرلىك دەرىجىدە پەرقلىق بولىدىغانلىقىنى ۋە بۇرۇنقى سىياسەتلەرنىڭ زور دەرىجىدە مەغلۇپ بولغانلىقىنى ئېيتتى.
ئۇ، غەربنىڭ بىرىنچى دۇنيا ئۇرۇشىدىن بۇيانقى رايوننى ئۆز مەنپەئەتىگە ئاساسەن شەكىللەندۈرۈش تىرىشچانلىقلىرىنىڭ ئوتتۇرا شەرقتىكى نۇرغۇن كىرىزىسلەرنىڭ مەنبەسى ئىكەنلىكىنى ئىلگىرى سۈردى.
«مەن بۇنىڭ توغرا ياكى خاتا ئىكەنلىكىنى ئېيتمايمەن. ئەمما مەسىلەن، بالفور خىتابنامىسىنى مىسالغا ئالساق— بۇ، يەھۇدىي ئاھالىسى ئۈچۈن يېڭى ۋە ئەركىن بىر ۋەتەن يارىتىش ئۇرۇنۇشى ئىدى. ئاندىن، ئەنگلىيە ۋە فىرانسىيە ئەمەلدارلىرىنىڭ قەبىلىلەر ۋە دىنىي مەزھەپلەر بىلەن تولغان بىر رايوندا سۈنئىي چېگرالارنى سىزغان سايكىس-پىيكو كېلىشىمى تۈزۈلدى» دېدى.
باراك، ئوسمانلى ئىمپېرىيەسىنىڭ ئىشلەيدىغان بىر سىستېمىغا ئىگە ئىكەنلىكىنى، ئەمما بۇ چېگرالارنىڭ يەرلىك رېئاللىقلارغا سەل قارىغانلىقىنى بىلدۈردى. «ئۇلارنىڭ ئەتراپىغا سۈنئىي چېگرالار سىزىش مۇمكىن ئەمەس ئىدى، ئەمما سايكىس-پىيكو كېلىشىمى دەل مۇشۇنداق قىلدى» دېگەنلەرنى سۆزلىرىگە ئىلاۋە قىلدى.
