پاكىستان بىخەتەرلىك قىسىملىرى جۈمە كۈنى خەيبەر پاختۇنخۋا ئۆلكىسىدىكى بىر ساقچى تەلىم-تەربىيە مەركىزىگە قىلىنغان ھۇجۇمدىن كېيىن ئېلىپ بارغان قايتۇرما ھۇجۇم ھەرىكىتىدە بەش گۇمانلىق قوراللىق ئۇنسۇرنى يوقاتتى. دائىرىلەر ھۇجۇمدىن كېيىن كەڭ كۆلەملىك تازىلاش ھەرىكىتىنىڭ باشلانغانلىقىنى بىلدۈردى.
خەيبەر پاختۇنخۋا ساقچى تەرەپنىڭ باياناتىغا قارىغاندا، بەش سائەت داۋاملاشقان ھەرىكەت جەريانىدا كەم دېگەندە ئۈچ ساقچى خادىمى ھاياتىدىن ئايرىلغان ۋە ئالتە خادىم يارىلانغان. ئىچكى ئىشلار مىنىستىرى موھسىن ناكۋى كېيىنچە ئېلان قىلغان باياناتىدا، يارىلانغانلاردىن بەزىلىرىنىڭ قازا قىلىشى بىلەن ساقچى خادىملىرى ئارىسىدىكى ئۆلۈم سانىنىڭ يەتتىگە يەتكەنلىكىنى بىلدۈردى.
ھۇجۇم دېرا ئىسمائىلخان رايونىدا يۈز بەردى. بىر ساقچى ئەمەلدارىنىڭ ئانادولۇ ئاگېنتلىقىغا بەرگەن مەلۇماتىغا قارىغاندا، تېرورچىلار پارتلاتقۇچ قاچىلانغان بىر ماشىنىنى ساقچى تەلىم-تەربىيە مەركىزىنىڭ ئاساسلىق كىرىش ئېغىزىغا سوققاندىن كېيىن، مەركەزگە كىرىشكە ئۇرۇنغان. بىخەتەرلىك قىسىملىرى تېزلىكتە ئىنكاس قايتۇرۇپ، ھۇجۇم قىلغۇچىلار بىلەن ئېتىشىشقا كىرىشكەن ۋە ئاخىرىدا بەش قوراللىق ئۇنسۇرنى يوقاتقان.
دائىرىلەر ۋەقە يۈز بەرگەن جايدىن قورال-ياراغ، پارتلاتقۇچ ۋە ئۆزىنى قوشۇپ پارتلىتىش جىلىتكىلىرىنىڭ قولغا چۈشۈرۈلگەنلىكىنى ئېلان قىلدى. پاكىستان بىخەتەرلىك قىسىملىرىغا قىلىنغان يېقىنقى ئايلاردىكى ئەڭ ئەجەللىك ھۇجۇملارنىڭ بىرى بولغان بۇ ھۇجۇمنىڭ جاۋابكارلىقىنى تېخىچە ھېچقانداق گۇرۇپپا ئۈستىگە ئالمىدى.
