ۋاشىنگتون «ئىران بىلەن چېتىشلىقى بار» دەپ قارالغان بۇ گۇرۇھنىڭ ئامېرىكا ۋە ئىراق نىشانلىرىغا ھۇجۇم قىلغانلىقىنى ئىلگىرى سۈرمەكتە.
ئامېرىكا تاشقى ئىشلار مىنىستىرلىقى، ۋاشىنگتون تەرىپىدىن تېررورلۇق تەشكىلاتى دەپ بېكىتىلگەن «ئىرانپەرەست» ئىراقلىق قوراللىق گۇرۇھ «كەتائىب سەييىد ئەششۇھەدا» نىڭ رەھبىرى ھەققىدە ئۇچۇر يەتكۈزگەنلەرگە 10 مىليون دوللارغىچە مۇكاپات بېرىشكە ۋەدە بەردى.
ئامېرىكا دائىرىلىرى پەيشەنبە كۈنى ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا، «ئەبۇل ئەئلا ئەلۋالائى» دەپمۇ تونۇلغان كەتائىب سەييىد ئەششۇھەدانىڭ رەھبىرى ھاشىم فىنيان رەھىم ئەسساراجى ھەققىدە ئۇچۇر ئىزدەۋاتقانلىقىنى بىلدۈردى.
ۋاشىنگتون مەزكۇر گۇرۇھنىڭ «ئىراقلىق پۇقرالارنى ئۆلتۈرگەنلىكىنى، ئىراقتىكى ئامېرىكا دىپلوماتىك بىنالىرىغا ھۇجۇم قىلغانلىقىنى، شۇنداقلا ئىراق ۋە سۈرىيەدىكى ئامېرىكا ھەربىي بازىلىرى بىلەن خادىملىرىنى ھۇجۇم نىشانى قىلغانلىقىنى» بىلدۈردى.
بۇ ھەقتە ئېلان قىلىنغان باياناتتا، ئەسساراجىنىڭ نەدە ئىكەنلىكى ھەققىدە ئۇچۇر بەرگەنلەرنىڭ «ئورنىنى يۆتكەش ۋە مۇكاپات ئېلىش ھوقۇقىغا ئىگە بولالايدىغانلىقى» قەيت قىلىندى.
ئەسساراجى پارلامېنتتا كۆپ سانلىقنى تەشكىل قىلىدىغان «ماسلاشتۇرۇش رامكىسى» ئىتتىپاقى ئىچىدە بىر ئورۇنغا ئىگە.
«ئىرانپەرەست» گۇرۇھلار ئىراقنىڭ پايتەختىدىكى ئامېرىكا ئەلچىخانىسىنى، باغداد ئايرودۇرۇمىدىكى دىپلوماتىك ۋە ئەشيا ئوبوروتى ئەسلىھەلىرىنى ھەمدە چەت ئەل شىركەتلىرى باشقۇرىدىغان نېفىتلىكلەرنى ھۇجۇم نىشانى قىلىپ كەلمەكتە.
ئون نەچچە يىل داۋاملاشقان توقۇنۇشلاردىن كېيىن، يېقىندا بىرئاز مۇقىملىققا ئېرىشكەن ئىراق، ئامېرىكا ۋە ئىسرائىلىيەنىڭ 28-فېۋرال ئىرانغا ھۇجۇم قىلىشى بىلەن پارتلىغان ئوتتۇرا شەرق ئۇرۇشى پاتقىقىغا پېتىپ قالدى.
مۇشۇ ئاينىڭ باشلىرىدا، ئۆتكەن ئايدا ئامېرىكالىق ژۇرنالىست شېللى كىتلېسوننى تۇتقۇن قىلىپ، بىر ھەپتە تۇتۇپ تۇرغاندىن كېيىن قويۇپ بەرگەن يەنە بىر ئىراقلىق قوراللىق گۇرۇھ بولغان «كەتائىب ھىزبۇللاھ» نىڭ رەھبىرى ئۈچۈنمۇ مۇشۇنىڭغا ئوخشاش مۇكاپات تەكلىپى ئوتتۇرىغا قويۇلغان ئىدى.
ئانادولۇ ئاگېنتلىقىنىڭ خەۋىرىگە قارىغاندا، ئامېرىكا ئالدىنقى ھەپتە ئىراقتىكى يەتتە نەپەر «ئىرانپەرەست» خەلق ئەسكەرلىرى قوماندانىغا «ئىراقتىكى ئامېرىكا خادىملىرىغا، ئەسلىھەلىرىگە ۋە مەنپەئەتلىرىگە قاراتقان ھۇجۇملارنى پىلانلاش، باشقۇرۇش ۋە ئىجرا قىلىش» جىنايىتى بىلەن ئېمبارگو يۈرگۈزدى.
خەزىنە مىنىستىرلىقى تەرىپىدىن ئېلان قىلغان باياناتتا: «بۈگۈنكى ھەرىكەتتە نىشانلانغان كىشىلەر ئىراقنىڭ ئەڭ زوراۋان ئىرانپەرەست خەلق ئەسكەرلىرى تەشكىلاتلىرىنىڭ رەھبەرلىرىدۇر؛ بۇلارنىڭ ئىچىدە كەتائىب ھىزبۇللاھ، كەتائىب سەييىد ئەششۇھەدا، ھەرىكەت ئەننۇجەبا ۋە ئەسائىب ئەھلى ھەق قاتارلىقلار بار» دېيىلگەن ئىدى.
