ئېلان قىلىنغان ئورتاق باياناتقا ئاساسلانغاندا، تۈركىيە بىلەن ئامېرىكا ۋەكىللەر ئۆمىكى سۈرىيەدىكى «ئورتاق مۇھىم ئىشلار»نى مۇزاكىرە قىلغان.
ئامېرىكا، سۈرىيە خىزمەت گۇرۇپپىسىنىڭ يېڭى نۆۋەتلىك يىغىنى دائىرىسىدە سەيشەنبە كۈنى تۈركىيە ئۈمىكىنى ۋاشىنگتوندا كۈتۈۋالغان؛ يىغىنغا تۈركىيە ۋەكىللەر ئۆمىكىگە تاشقى ئىشلار مىنىستىرلىقىنىڭ مۇئاۋىن مىنىستىرى نۇھ يىلماز، ئامېرىكا تەرەپكە بولسا، تاشقى ئىشلار مىنىستىرلىقىنىڭ مۇئاۋىن مىنىستىرى كرىستوفېر لانداۋ رىياسەتچىلىك قىلغان.
سۆھبەتلەرگە تۈركىيەنىڭ ئامېرىكادىكى باش ئەلچىسى سەدات ئۆنال ۋە ئامېرىكانىڭ تۈركىيەدىكى باش ئەلچىسى توماس بارراكمۇ قاتناشقان.
ئورتاق باياناتقا ئاساسلانغاندا، تۈركىيە بىلەن ئامېرىكا، تۈركىيە جۇمھۇر رەئىسى رەجەپ تاييىپ ئەردوغان ۋە ئامېرىكالىق مەنسەپدىشى دونالد ترامپنىڭ تەكىتلىگىنىدەك، سۈرىيەدە مۇقىملىق ۋە بىخەتەرلىك مەسىلىسىدە ھەمكارلىق ۋە ماسلىشىشنى كۈچەيتىشكە قەتئىي بەل باغلىغان.
باياناتتا: «ئامېرىكا بىلەن تۈركىيە، مۇقىم، ئۆزى ۋە قوشنىلىرى بىلەن تىنچ ئۆتىدىغان ھەمدە ئۆي-ماكانلىرىدىن ئايرىلغان مىليونلىغان سۈرىيەلىكنىڭ ئۆيلىرىگە قايتىشىغا شارائىت يارىتىپ بېرىدىغان بىر سۈرىيە بەرپا قىلىش ئورتاق قارىشىغا ئىگە» دېيىلدى.
ھەر ئىككى دۆلەتنىڭ سۈرىيەنىڭ زېمىن پۈتۈنلۈكىنى قوغداشنىڭ مۇھىملىقىنى ئېتىراپ قىلغانلىقى تەكىتلەنگەن باياناتتا مۇنۇلار قەيت قىلىندى: «تېررورلۇق تەشكىلاتلىرىغا بىخەتەر پاناھگاھ بولمايدىغان، مۇقىم ۋە بىر پۈتۈن سۈرىيە رايوننىڭ بىخەتەرلىكى ۋە گۈللىنىشىگە پايدىلىق.»
