تۈركىيە جۇمھۇرىيىتى تاشقى ئىشلار مىنىستىرلىقى ئىسرائىلىيەنىڭ دەمەشق مەركىزىگە قىلغان ئەڭ يېڭى ھاۋا ھۇجۇمىنى ئەيىبلەپ، بۇ ھۇجۇملارنىڭ سۈرىيەنىڭ تىنچلىق، مۇقىملىق ۋە بىخەتەرلىك ئورنىتىش تىرىشچانلىقىغا قەستەن بۇزغۇنچىلىق قىلغانلىقىنى ئوتتۇرىغا قويدى.
مىنىستىرلىق يەكشەنبە كۈنىدىكى باياناتىدا: «ئىسرائىلىيەنىڭ سۈرىيەنىڭ جەنۇبىغا ھەربىي ئارىلىشىشىدىن كېيىن، دەمەشقنىڭ مەركىزىگە قارىتىلغان بۇ ھۇجۇملار سۈرىيەنىڭ تىنچلىق، مۇقىملىق ۋە بىخەتەرلىك ئورنىتىش تىرىشچانلىقىغا بۇزغۇنچىلىق قىلىش» دېگەن ئىبارىلەرگە ئورۇن بەرگەنىدى.
ئەنقەرە، بۇ خىل ھەرىكەتلەرنىڭ ئۇرۇش مالىمانچىلىقىدىكى دۆلەتنىڭ مۇناسىۋەتنى نورماللاشتۇرۇش يولىدا قولغا كەلتۈرگەن تېپىلغۇسىز پۇرسىتىنى خەتەرگە ئىتتىرىشى مۇمكىنلىكى توغرىسىدا ئاگاھلاندۇردى.
باياناتتا مۇنداق دېيىلدى: «سۈرىيە خەلقىنىڭ تىنچ ياشاش ۋە دۇنيا بىلەن بىرلىشىشى ئۈچۈن تارىخى پۇرسىتى بار».
تۈركىيە سۈرىيەدىكى سىياسىي ھەل قىلىش چارىسىنى قوللايدىغان بارلىق ئالاقىدار تەرەپلەرنى ھۆكۈمەتنىڭ تىنچلىقنى قوغداش تىرىشچانلىقىغا ئىجابىي تۆھپە قوشۇشقا چاقىردى.
ئىسرائىلىيەنىڭ سۈرىيەگە قاراتقان ھۇجۇملىرى
سۈرىيە دۆلەت ئاگېنتلىقى — SANA نىڭ خەۋىرىگە قارىغاندا، ئىسرائىلىيەنىڭ پايتەخت دەمەشىققە قاراتقان ئەڭ يېڭى ھاۋا ھۇجۇمىدا بىر قانچە ئادەم يارىلانغان؛ ئىسرائىلىيەنىڭ سۈرىيە ئارمىيەسى باش ئىشىتابى جايلاشقان رايونغا قىلغان ئالدىنقى ھۇجۇمىدا كەم دېگەندە ئىككى ئادەم يارىلانغانىدى.
خەۋەرلەرگە قارىغاندا، ئىسرائىلىيە يەنە پىرېزىدېنتلىق مەھكىمىسىگە يېقىن بىر جاينىمۇ بومباردىمان قىلغان.
ئىسرائىلىيە چارشەنبە كۈنى سۈرىيەنىڭ جەنۇبىدىكى سۇۋەيداغا قايتىدىن ھاۋا ھۇجۇمى قوزغاپ، سۈرىيەنىڭ ئىگىلىك ھوقۇقىغا يەنە بىر قېتىم خىلاپلىق قىلدى.
بۇ ھۇجۇملار قوراللىق دىرۇز ۋە بەدەۋىي گۇرۇپپىلىرى ئوتتۇرىسىدا يۈز بېرىپ، كەم دېگەندە 30 كىشى ھاياتىدىن ئايرىلغان توقۇنۇشلاردىن كېيىن، بىخەتەرلىكنى، پۇقرالار ۋە ئۇلارنىڭ مال-مۈلۈكىنى قوغداش ئۈچۈن سۈرىيە ئارمىيەسى رايونغا ئەسكەر ئورۇنلاشتۇرۇۋاتقان ئەسنادا يۈز بەردى.
